അമേരിക്കയിൽ ഇന്ത്യൻ കന്പനികളുടെ മൂലധന നിക്ഷേപം 18 ബില്യണ്‍
Tuesday, November 21, 2017 6:28 AM IST
ഷിക്കാഗോ: ഇന്ത്യൻ കന്പനികൾ അമേരിക്കയിൽ 18 ബില്യണ്‍ ഡോളറിന്‍റെ നിക്ഷേപം നടത്തിയതിലൂടെ 1,13,000 തൊഴിലവസരങ്ങൾ സൃഷ്ടിക്കുവാൻ കഴിഞ്ഞതായി ഷിക്കാഗോയിൽ നിന്നുള്ള ഡമോക്രാറ്റിക് കോണ്‍ഗ്രസ് അംഗവും ഇന്ത്യൻ വംശജനുമായ രാജാ കൃഷ്ണമൂർത്തി വെളിപ്പെടുത്തി.

ഇന്ത്യൻ റൂട്ട്സ്, അമേരിക്കൻ സോയിൽ എന്ന ശീർഷകത്തിൽ കോണ്‍ഫെഡറേഷൻ ഓഫ് ഇന്ത്യൻ ഇൻഡസ്ട്രി വാരാന്ത്യം പുറത്തുവിട്ട റിപ്പോർട്ടിലാണ് ഇതുസംബന്ധിച്ച് വിവരങ്ങൾ ഉൾപ്പെടുത്തിയിരിക്കുന്നത്.

ഷിക്കാഗോയിൽ മാത്രം 195 മില്യണ്‍ ഡോളറിന്‍റെ നിക്ഷേപം നടത്തിയതിലൂടെ 3800 തൊഴിലവസരങ്ങൾ സൃഷ്ടിച്ചിട്ടുണ്ടെന്നും മൂർത്തി പറഞ്ഞു.

അമേരിക്ക, പുർട്ടെറിക്കൊ, കരീബിയൻ. ഐലന്‍റ്, യുഎസ് ടെറിട്ടറി തുടങ്ങിയ സ്ഥലങ്ങളിൽ നൂറിൽപരം കന്പനികളാണ് വ്യവസായങ്ങൾ ആരംഭിച്ചിരിക്കുന്നത്. 1,13,423 തൊഴിലാളികളാണ് ഇത്രയും വ്യവസായ മേഖലകളിൽ പ്രവർത്തിക്കുന്നത്. ഏറ്റവും കൂടുതൽ മൂലധനനിക്ഷേപം നടത്തിയിരിക്കുന്നത് ന്യൂയോർക്കിലാണ് (1.57 ബില്യണ്‍), ന്യൂജേഴ്സി (1.56 ബില്യണ്‍), മാസ്ചുസെറ്റ്സ് (951 മില്യണ്‍), കാലിഫോർണിയ (542 മില്യണ്‍). കൂടുതൽ കന്പനികൾ കൂടുതൽ നിക്ഷേപം നടത്തുവാൻ സന്നദ്ധരായി മുന്നോട്ടു വരുന്നുണ്ടെന്നും കൃഷ്ണമൂർത്തി പറഞ്ഞു.

റിപ്പോർട്ട്: പി.പി. ചെറിയാൻ
Copyright @ 2022 , Rashtra Deepika Ltd.