ഫിലാഡൽഫിയയിൽ കാർഡിനൽ വിതയത്തിൽ മെമ്മോറിയൽ ബാസ്കറ്റ്ബോൾ ടൂർണമെന്‍റ് 25 ന്
Wednesday, November 22, 2017 1:23 PM IST
ഫിലാഡൽഫിയ: എസ്എംസിസി ഫിലാഡൽഫിയാ ചാപ്റ്റർ ദേശീയതലത്തിൽ നടത്തിവരുന്ന കാർഡിനൽ വിതയത്തിൽ മെമ്മോറിയൽ ബാസ്കറ്റ്ബോൾ ടൂർണമെന്‍റ് നവംബർ 25ന് (ശനി) നടക്കും. ഫിലാഡൽഫിയാ നോർത്തീസ്റ്റ് റാക്കറ്റ് ക്ലബ് (NERC, 9379 Krewstown Road, Philadelphia PA 19115) ഇൻഡോർ ബാസ്കറ്റ്ബോൾ കോർട്ടിൽ ഉച്ചകഴിഞ്ഞ് രണ്ടു മുതലാണ് മത്സരം.

അമേരിക്കയിൽ സീറോ മലബാർ സഭയുടെ അത്മായ സംഘടനയായ സീറോ മലബാർ കത്തോലിക്കാ കോണ്‍ഗ്രസിന്‍റെ (എസ്എംസിസി) വളർച്ചക്ക് ദേശീയതലത്തിലും രൂപതാതലത്തിലും വളരെയധികം സംഭാവനകൾ നൽകുകയും അതിന്‍റെ പ്രഥമ ഗ്രാൻഡ് പേട്രൻ സ്ഥാനം ഏറെക്കാലം വഹിക്കുകയും ചെയ്ത സീറോ മലബാർ സഭാ മേജർ ആർച്ച്ബിഷപ്പും കർദിനാളുമായിരുന്ന അന്തരിച്ച മാർ വർക്കി വിതയത്തിലിന്‍റെ സ്മരണാർഥം നടത്തുന്ന അഞ്ചാമത് ദേശീയ ബാസ്കറ്റ്ബോൾ ടൂർണമെന്‍റാണിത്.

എസ്എംസിസി ചാപ്റ്റർ സ്പിരിച്വൽ ഡയറക്ടറും സീറോ മലബാർ ഫൊറോനാ പള്ളി വികാരിയുമായ ഫാ. വിനോദ് മഠത്തിപ്പറന്പിൽ ടൂർണമെന്‍റ് ഉദ്ഘാടനം ചെയ്യും. പ്ലേ ഓഫ് മൽസരങ്ങൾക്കുശേഷം നടക്കുന്ന ഫൈനലിൽ വിജയിക്കുന്ന ടീമിന്ë ജോസഫ് കൊട്ടുകാപ്പള്ളി സ്പോണ്‍സർ ചെയ്യുന്ന കർദ്ദിനാൾ വിതയത്തിൽ മെമ്മോറിയൽ എവർ റോളിംഗ് ട്രോഫിയും റണ്ണർ അപ് ടീമിന്ë എസ്എംസിസി എവർ റോളിംഗ് ട്രോഫിയും ലഭിക്കും. മത്സരത്തിൽ വ്യക്തിഗതമികവു പുലർത്തുന്നവർക്ക് പ്രത്യേക ട്രോഫികളും ലഭിക്കും.

ഫിലാഡൽഫിയ ചാപ്റ്റർ പ്രസിഡന്‍റ് ജോർജ് വി. ജോർജിന്‍റെ നേതൃത്വത്തിൽ ഫാ. വിനോദ് മഠത്തിപ്പറന്പിൽ, ട്രസ്റ്റിമാരായ ഷാജി മിറ്റത്താനി, മോഡി ജേക്കബ്, റോഷിൻ പ്ലാമൂട്ടിൽ, ജോസ് തോമസ്, സെക്രട്ടറി ടോം പാറ്റാനിയിൽ, പാരീഷ് കൗണ്‍സിൽ അംഗങ്ങൾ, ഭക്തസംഘടനാഭാരവാഹികൾ, മരിയൻ മദേഴ്സ്, സീറോമലബാർ യൂത്ത്, യുവജനങ്ങൾ എന്നിവരെ ഉൾപ്പെടുത്തി വിപുലമായ കമ്മിറ്റി ടൂർണമെന്‍റിന്‍റെ വിജയത്തിനായി പ്രവർത്തിക്കുന്നു.

റിപ്പോർട്ട്: ജോസ് മാളേയ്ക്കൽ
Copyright @ 2022 , Rashtra Deepika Ltd.