പ്രഫ. യമുന കൃഷ്ണന് ഇൻഫോസിസ് അവാർഡ്
Thursday, November 23, 2017 1:42 PM IST
ഷിക്കാഗോ: ഇൻഫോസിസിന്‍റെ 2017 അവാർഡുകൾക്കായി തെരഞ്ഞെടുക്കപ്പെട്ട ആറു പേരിൽ ഷിക്കാഗോ യൂണിവേഴ്സിറ്റിയിലെ ഇന്ത്യൻ അമേരിക്കൻ പ്രഫസർ യമുന കൃഷ്ണനും ഉൾപ്പെടുന്നു. ഇൻഫോസിസ് ഫൗണ്ടേഷൻ ട്രസ്റ്റി ബോർഡ് പ്രസിഡന്‍റ് കെ. ഡാനിഷ് ആണ് വിജയികളുടെ പേരുവിവരങ്ങൾ പ്രഖ്യാപിച്ചത്.

ആറു കാറ്റഗറികളിലായി 236 നോമിനേഷനുകളാണ് ലഭിച്ചത്. വിജയികൾക്ക് ഓരോ കാറ്റഗറിയിലും 65 ലക്ഷം രൂപയും ഇരുപത്തി രണ്ട് കാരറ്റ് ഗോൾഡ് മെഡലും പ്രത്യേക സർട്ടിഫിക്കറ്റുകളുമാണ് സമ്മാനമായി ലഭിക്കുക.

പ്രദീപ് കോൽസ് (കലിഫോർണിയ യൂണിവേഴ്സിറ്റി), അമത്യ സെൻ (ഹാർവാർഡ്), ഇന്ദർ വർമ (സാൾക്ക് ഇൻസ്റ്റിറ്റ്യൂട്ട് ഓഫ് ബയോളജിക്കൽ സയൻസ്), ശ്രീനിവാസ് വർധൻ (ന്യൂയോർക്ക് യൂണിവേഴ്സിറ്റി), ശ്രീനിവാസ് കുൽക്കർണി (കലിഫോർണിയ ഇൻസ്റ്റിറ്റ്യൂട്ട് ഓഫ് ടെക്നോളജി), കൗശിക് ബസു (കോണൽ യൂണിവേഴ്സിറ്റി) എന്നിവർ ഉൾപ്പെടുന്ന ജൂറിയാണ് തെരഞ്ഞെടുപ്പിന് നേതൃത്വം വഹിച്ചത്.

ഫിസിക്കൽ സയൻസ് വിഭാഗത്തിലാണ് യമുന കൃഷ്ണൻ വിജയിയായത്. ഡിഎൻഎ ആർകിടെക്ചർ വിഭാഗത്തിൽ യമുന നടത്തിയ ഗവേഷണങ്ങളാണ് അവാർഡിനർഹയാക്കിയത്. സ്തനാർബുദം, എച്ച്ഐവി, അൾഷിമേഴ്സ് തുടങ്ങിയ രോഗങ്ങൾക്ക് കാരണമായ സെല്ലുകളെക്കുറിച്ചാണ് ഇവർ പഠനം നടത്തിയത്.

2018 ജനുവരി 10ന് ബംഗളൂരുവിൽ നടക്കുന്ന പ്രത്യേക സമ്മേളനത്തിൽ വിജയികൾക്ക് അവാർഡ് സമ്മാനിക്കു. 130 കോടി മുതൽ മുടക്കി 2009 ൽ സ്ഥാപിച്ചതാണ് ഈ നോണ്‍ പ്രോഫിറ്റ് ഓർഗനൈസേഷൻ.

റിപ്പോർട്ട്: പി.പി. ചെറിയാൻ
Copyright @ 2022 , Rashtra Deepika Ltd.