ഷിക്കാഗോ: അമേരിക്കയിലെ ആദ്യകാല മലയാളി പ്രസ്ഥാനമായ ഷിക്കാഗോ മലയാളി അസോസിയേഷന്റെ 2018-20 വർഷത്തെ ഭാരവാഹി തെരഞ്ഞെടുപ്പ് ഓഗസ്റ്റ് 5 ഞായറാഴ്ച രാവിലെ 11 മുതൽ മൗണ്ട് പ്രോസ്പെക്ടറിലുള്ള സിഎംഎ ഹാളിൽ നടത്തപ്പെടും.
മൗണ്ട് പ്രോസ്പെക്ടസിലെ സിഎംഎ ഹാളിൽ കൂടിയ ജനറൽബോഡി യോഗമാണ് തെരഞ്ഞെടുപ്പിന് ആവശ്യമായ നടപടികൾ തീരുമാനിച്ചത്. ഇലക്ഷൻ കമ്മിറ്റിയിലേക്ക് മുൻ പ്രസിഡന്റുമാരായ ജോസഫ് നെല്ലുവേലിൽ (ചെയർമാൻ) (847 334 0456), പി.ഒ. ഫിലിപ്പ് ( 630 660 0689) , ജോയി വാച്ചാച്ചിറ(630 731 6649) എന്നിവരെ ഐക്യകണ്ഠ്യേന തെരഞ്ഞെടുത്തു.
പ്രസിഡന്റ്, സെക്രട്ടറി, ട്രഷറർ, വൈസ് പ്രസിഡന്റ്, ജോയിന്റ് സെക്രട്ടറി, ജോയിന്റ് ട്രഷറർ എന്നീ എക്സിക്യൂട്ടീവ് സ്ഥാനങ്ങളും വനിതാ പ്രതിനിധികൾ 2 , സീനിയർസ് (60 വയസും അതിനു മുകളിലും) 1 , യൂത്ത് ( 18 മുതൽ 30 വയസു വരെ) 1 എന്നിവരുൾപ്പെടെ 17 ബോര്ഡ് അംഗങ്ങളും ഉൾപ്പെടുന്ന 23 അംഗ ഡയറക്ടർ ബോർഡിനെ തെരഞ്ഞെടുക്കുവാനാണ് ഇലക്ഷൻ നടത്തുന്നത്. 2017 ജനുവരി ഒന്നിനു മുന്പ് സിഎംഎയിൽ അംഗങ്ങളായവർക്ക് ബോർഡ് അംഗമായി മത്സരിക്കാവുന്നതാണ്.
എക്സിക്യൂട്ടീവ് സ്ഥാനങ്ങളിലേക്ക് മത്സരിക്കുന്നവർ ഒരു പ്രവശ്യമെങ്കിലും ബോർഡ് അംഗമായി പ്രവർത്തിക്കുന്നവരായിരിക്കണം. 2018 ജനുവരി 31നു മുന്പ് ഈ സംഘടനയിൽ അംഗങ്ങളായവർക്കെല്ലാം വോട്ടവകാശം ഉണ്ടായിരിക്കും.
തെരഞ്ഞെടുപ്പ് സംബന്ധിച്ച എല്ലാ വിവരങ്ങളും, നോമിനേഷൻ ഫോറവും വെബ്സൈറ്റായ www.chicagomalayaleeassociation.org-ൽ നിന്നും മേയ് 20 മുതൽ ലഭിക്കുന്നതാണ്. നോമിനേഷനുകൾ സ്വീകരിക്കുന്ന അവസാന തീയതി ജൂണ് 19 ആണ്. സൂക്ഷ്മ പരിശോധനയ്ക്കുശേഷം മത്സരിക്കാനർഹരായവരുടെ പേരുകൾ ജൂണ് 20 വൈകുന്നേരം തന്നെ പ്രസിദ്ധപ്പെടുത്തും.
നോമിനേഷനുകൾ പിൻവലിക്കാവുന്ന അവസാന തീയതി ജൂണ് 27. മത്സരാർഥികളുടെ ലിസ്റ്റ് പ്രസിദ്ധീകരിക്കുന്നത് 2ജൂലൈ ഒന്നിനാണ്. തെരഞ്ഞെടുപ്പ് ഓഗസ്റ്റ് 5 ഞായഴാഴ്ച രാവിലെ 11 മുതൽ വൈകിട്ട് 9 വരെ മൗണ്ട് പ്രോസ്പെക്ടസിലുള്ള സിഎംഎ ഹാളിൽ (834 E Road Rd, Suite 13, Mt Prospect, IL 60056) വച്ചു നടത്തുന്നതും ഉടൻ തന്നെ വോട്ടെണ്ണൽ നടത്തി ഫലം പ്രഖ്യാപിക്കുന്നതുമായിരിക്കും.
പ്രസിഡന്റ് രഞ്ജൻ എബ്രഹാം അധ്യക്ഷത വഹിച്ച ജനറൽ ബോഡി യോഗത്തിൽ സെക്രട്ടറി ജിമ്മി കണിയാലി റിപ്പോർട്ട് അവതരിപ്പിച്ചു . ട്രഷറർ ഫിലിപ്പ് പുത്തൻപുരയിൽ കണക്കു സംബന്ധിച്ച ചോദ്യങ്ങൾക്കു മറുപടി നൽകി. വൈസ് പ്രസിഡന്റ് ജോണ്സൻ കണ്ണൂക്കാടൻ കൃതജ്ഞത പറഞ്ഞു. വളരെയധികം അംഗങ്ങൾ പങ്കെടുത്ത യോഗത്തിനു ജിതേഷ് ചുങ്കത്, ഷാബു മാത്യു തുടങ്ങിയവർ നേതൃത്വം നൽകി.
നോമിനേഷൻ സംബന്ധിച്ച കൂടുതൽ വിവരങ്ങൾക്ക് ഇലക്ഷൻ കമ്മിറ്റി ചെയർമാൻ ജോസഫ് നെല്ലുവേലിൽ 847 334 0456 എന്ന നന്പരിൽ ബന്ധപ്പെടാവുന്നതാണ്.
റിപ്പോർട്ട് : ജിമ്മി കണിയാലി