പ്രഭാതം തൂവൽകുടഞ്ഞ പൂമരക്കൊമ്പ്.., പൊന്നുകൊണ്ടൊരു പങ്കായവും
നാല്പത്തിരണ്ടുപേർ (അതോ കൂടുതലോ) പൂമരംകൊണ്ടുണ്ടാക്കിയ കപ്പലും, കപ്പലിലെ കുപ്പായക്കാരിയെ നോക്കാൻ പൊക്കിയ പങ്കായവും പ്രിയഗാനത്തിൽ നിറയുമ്പോൾ ഓർമപുതുക്കേണ്ട രണ്ടു പഴയപാട്ടുകളുണ്ട്. അതിലൊന്നിൽ പ്രഭാതം തൂവൽ കുടഞ്ഞിട്ട പൂമരക്കൊമ്പാണുള്ളത്., അടുത്തതിൽ പഞ്ചമിയുടെ തോണിയിലെ പൊന്നുകൊണ്ടുള്ള പങ്കായവും! പൂമരംകൊണ്ട് കപ്പലുണ്ടാക്കാനാവുമോ. ഇല്ലേ എന്ന യുക്‌തിയൊന്നും ആസ്വാദനത്തെ ബാധിക്കില്ല എന്നുറപ്പിക്കുന്നുണ്ട് ആ പാട്ടിന്റെ ജനപ്രീതി. ലക്ഷക്കണക്കിനുതവണ പ്ലേചെയ്യപ്പെട്ടിരിക്കുന്നു യുട്യൂബിൽ ആ ലളിതസുന്ദരഗാനം. അതേസമയം നാം കണ്ട പഴയപാട്ടുകൾ വരച്ചിടുന്ന വർണചിത്രങ്ങൾക്ക് എന്തൊരഴകാണ്!

കവിത വരയ്ക്കുന്നൊരാൾ

1979ൽ പുറത്തിറങ്ങിയ മനസാ വാചാ കർമണാ എന്ന ഐ.വി. ശശി ചിത്രത്തിലേതാണ് പ്രഭാതം പൂമരക്കൊമ്പിൽ തൂവൽ കുടഞ്ഞു എന്ന പാട്ട്. ബിച്ചു തിരുമല എഴുതി എ.ടി. ഉമ്മർ ഈണമിട്ട ഈ ഗാനം എസ്. ജാനകിയുടെ ശബ്ദത്തിന്റെ മുഴുവൻ സൗകുമാര്യവും കാട്ടിത്തരുന്നു. പുലരിയുടെ പ്രസരിപ്പു നിറഞ്ഞ വരികളും സംഗീതവും. ജാനകിയുടെ ആലാപനംകൂടിയാകുമ്പോൾ കവി എഴുതിയപോലെ പൂന്തെന്നലേറി പൂന്തുമ്പി പാറിവരുന്നതു കാണാം.

സിനിമാരംഗത്ത് തിരക്കിന്റെ കൊടുമുടി കയറിത്തുടങ്ങിയ വേളയിലാണ് ഈ പാട്ട് തന്നെത്തേടി വന്നതെന്ന് ഗാനരചയിതാവ് ബിച്ചു തിരുമല ഓർമിക്കുന്നു. അവസരങ്ങളും അംഗീകാരങ്ങളും ഒരുമിച്ചുവന്ന കാലം. സിനിമയിൽ പ്രഭാതത്തിന്റെയും പ്രണയത്തിന്റെയും മൂഡുള്ള പാട്ടുവേണം. ‘‘എഴുതാനിരുന്നാൽ ആശയങ്ങൾ ചിത്രങ്ങളായി മനസിലേക്കു വരുന്നതാണ് എന്റെ അനുഭവം. ദൈവാധീനത്താൽ ആ ചിത്രങ്ങളുടെ ഉറവയ്ക്ക് ഒരിടത്തും തടസമുണ്ടാവില്ല. സിനിമാപ്പാട്ടാണെങ്കിൽ അത് സ്ക്രീനിൽ കണ്ടാൽ എങ്ങനെയിരിക്കുമെന്നുപോലും മനസിൽ ചിത്രരൂപത്തിൽ തെളിയും. ഞാനും എന്റെ ചുറ്റുപാടും കൂട്ടുകാരുമെല്ലാം അതിലുണ്ടാകും. പിന്നെ അതുവച്ച് പാട്ടെഴുതുകയേ വേണ്ടൂ’’– ബിച്ചു തിരുമല പറയുന്നു. പ്രഭാതസൂര്യൻ ഒരു പക്ഷിയെപ്പോലെ വന്ന് പൂമരച്ചില്ലകളിൽ ചിറകുകുടയുകയാണ്. സൂര്യനില്ലെങ്കിൽ, വെളിച്ചമില്ലെങ്കിൽ ഭൂമിയില്ല. കിരണങ്ങൾ അഴകിന്റെ കനകാഭിഷേകവുമായെത്തുമ്പോൾ പൂക്കളും പൂമണവും മനസിന്റെ ആഗ്രഹങ്ങളായെത്തുന്ന പൂത്തുമ്പികളുമുണ്ട്... കുളിരേകുന്ന കാറ്റും ഓളങ്ങളുമുണ്ട്... കവിയുടെ മനസിൽ ആ പാട്ടുവിടർന്നത് ഇങ്ങനെയൊക്കെയാണ്.

പതിവു ശൈലിയായ മിതത്വവുമായാണ് എ.ടി. ഉമ്മർ ഈ ഗാനത്തെയും സമീപിച്ചത്. പ്രശസ്തമായ ബിച്ചു തിരുമല–ശ്യാം കൂട്ടുകെട്ടുപോലെതന്നെ സുന്ദരഗാനങ്ങളാണ് ബിച്ചു– എ.ടി. ഉമ്മർ കൂട്ടുകെട്ടിലും പിറന്നിട്ടുള്ളത്. ഇരുവരും തമ്മിൽ ഹൃദയഹാരിയായ ഒരു ഹാർമണിയുണ്ടായിരുന്നു. (ബിച്ചു ചെന്നൈയിലും ഉമ്മർ ആന്ധ്രയിലും ഇരുന്ന് തയാറാക്കിയതാണ് അംഗീകാരം എന്ന ചിത്രത്തിലെ നീലജലാശയത്തിൽ എന്ന സൂപ്പർഹിറ്റ് ഗാനമെന്നറിയുമ്പോൾ വിശ്വസിക്കാൻ പ്രയാസമാകും. അതും അന്നത്തെ കാലത്ത്. തിരുവനന്തപുരത്തെ വീട്ടിൽ എഴുതിവച്ച പാട്ട് ചെന്നൈയിലിരുന്ന് ഫോണിൽ കേട്ടു വീണ്ടും പകർത്തിയാണ് വരികൾ ഉമ്മറിനു നൽകിയതെന്ന് ബിച്ചു ഓർമിക്കുന്നു).

പാട്ടൊരുക്കിക്കഴിഞ്ഞാൽ പിന്നീടതിനെക്കുറിച്ച് വലിയ സംസാരമൊന്നും പതിവില്ല ഇരുവർക്കും. അല്ലെങ്കിൽതന്നെ വലിയ തിരക്കാണ്. പാട്ട് നല്ലതായിരിക്കുമെന്ന് രണ്ടുപേർക്കും ഉറപ്പുമാണ്. കാര്യമായ അഭിപ്രായപ്രകടനങ്ങൾ സംവിധായകൻ ഐ.വി. ശശിയും നടത്താറില്ല. പാട്ടിഷ്‌ടമായെങ്കിൽ അത് അദ്ദേഹത്തിന്റെ മുഖത്തു കാണാം. ഈ പാട്ടിനും ശശി ആ ഒതുക്കിയ ചിരി സമ്മാനിച്ചു. അതേസമയം റെക്കോർഡിംഗ് കഴിഞ്ഞ ശേഷം ‘ഗംഭീരം.., ഗംഭീരം’ എന്നായിരുന്നു ഗായിക എസ്. ജാനകിയുടെ പ്രതികരണം. തന്റെ വരികൾ പാടാൻ ജാനകിക്ക് പ്രത്യേക സന്തോഷമായിരുന്നെന്നും ബിച്ചു തിരുമല പറയുന്നു. അന്ന് ഒരുപാടു ഹൃദയങ്ങളിൽ പ്രകാശവും കുളിർകാറ്റും പൂമണവും നിറച്ച പാട്ടാണ് പ്രഭാതം പൂമരക്കൊമ്പിൽ... ഇന്നുകേൾക്കുമ്പോഴും അതിനു മാറ്റമൊന്നുമില്ല.

ഇതിലേ വന്ന തോണി

‘കപ്പലിന്റെ പങ്കായ’ത്തെക്കുറിച്ചല്ല, പഞ്ചമിയുടെ തോണിയിലെ പൊന്നുകൊണ്ടുള്ള പങ്കായത്തെക്കുറിച്ചാണ് പാമരം പളുങ്കുകൊണ്ട് എന്ന പാട്ട് പറഞ്ഞുതന്നത്. കനവെല്ലാം കണ്ണിലിട്ട് കാത്തിരുന്ന കണ്ണനെ കൂട്ടിനിരുത്തിവന്ന തോണിക്കും എന്തൊരഴകാണ്! പാമരം പളുങ്കുകൊണ്ട്.., പന്നകം കരിമ്പുകൊണ്ട്... പങ്കായം പൊന്നുകൊണ്ടും!!

ത്രിവേണി എന്ന ചിത്രം 1970ലാണ് പുറത്തിറങ്ങിയത്. വയലാറിന്റെ വരികളിൽനിന്ന് ഇറങ്ങിവന്ന തോണി ദേവരാജൻ മാസ്റ്ററുടെ സംഗീതമാകുന്ന പുഴയിലൂടെ പി. സുശീല അതിമനോഹരമായി തുഴഞ്ഞു. ഗാനം സൂപ്പർ ഹിറ്റായിരുന്നു. ഫോക്കിഷ് ആയ വരികൾക്ക് ചേരുന്ന ഈണവും ആലാപനവും കൂട്ടായപ്പോൾ മലയാളിക്ക് എന്നും ഓർത്തുവയ്ക്കാനുള്ള ഒരു പാട്ടു പിറന്നു. പി. സുശീലയുടെ എവർഗ്രീൻ ആയി കണക്കാക്കുന്ന ഗാനങ്ങളിൽ ഇതെന്നും മുൻപന്തിയിലുണ്ട്.

ഹരിപ്രസാദ്