ചിത്രകലയിലെ ഉദയപ്രഭാവം
ഈയിടെ തൃശൂരിൽ നടന്ന ലളിതകലാ അക്കാദമി ചിത്രകലാ ക്യാമ്പിൽ ഉദയകുമാർ വരച്ച ചിത്രം ശ്രദ്ധേയമായി. മഹാഭാരതത്തെ സമകാലീനമായി നോക്കിക്കാണുന്ന പ്രമേയങ്ങളുടെ അടിസ്‌ഥാനത്തിൽ നടന്ന നാഷണൽ ക്യാമ്പായിരുന്നു അത്. യുദ്ധമെല്ലാം കഴിഞ്ഞ് രണഭൂമിയുടെ കരാളതയിൽ മരണംകാത്ത് ശരശയ്യയിൽ കിടക്കുന്ന ഭീഷ്മർ മഹാഭാരതത്തിലെ ഉജ്‌ജ്വല കഥാപാത്രങ്ങളിലൊന്നാണല്ലോ. ആ രംഗമാണ് ഉദയകുമാർ ചിത്രീകരിച്ചത്. ഒരു വ്യത്യാസമുണ്ട്. ശരശയ്യയിൽ ഭീഷ്മരല്ല മഹാത്മാഗാന്ധിയാണ് ശയിക്കുന്നത്. ചുറ്റിലും പൊങ്ങിപ്പടർന്ന പുകയും യുദ്ധാനന്തര ശേഷിപ്പുകളും നിറങ്ങളുടെയും പ്രമേയത്തിന്റെയും തീക്ഷ്ണതയും രൂപംകൊണ്ട ചിത്രമാണത്. നമ്മുടെ രാഷ്ട്രീയ ഭീഷ്മരാണല്ലോ ഗാന്ധി. സമൂഹത്തിൽ നാം കൈവിട്ടുകളയുന്ന സത്യങ്ങളുടെ ശരമുനകളിൽ നാം ഗാന്ധിയെ കിടത്തിയിരിക്കുന്നു. സർഗാത്മകമായ സാമൂഹിക സംവാദങ്ങളായി ഉദയന്റെ ചിത്രങ്ങൾ ഇപ്പോൾ മാറിക്കൊണ്ടിരിക്കുന്നു. മൂർത്തതയ്ക്കും അമൂർത്തതയ്ക്കും ഇടയ്ക്കുള്ള മേഖലയിലാണ് ഉദയന്റെ ചിത്രങ്ങളുടെ സ്‌ഥാനം. നിറങ്ങളുടെ തീക്ഷ്ണമായ വിന്യാസം അവയിൽ കാണാം. നമ്മുടെ കണ്ണിലും മനസ്സിലും തറയ്ക്കുന്ന ചിത്രങ്ങൾ.

സമീപകാലത്തായി ചിത്രകലയ്ക്ക് കേരളത്തിൽ പുതിയൊരു ഉണർവുണ്ടായിട്ടുണ്ട്. കേരള ലളിതകലാ അക്കാദമിയുടെ പ്രവർത്തനങ്ങളും ബിനാലെ പോലുള്ള സംരംഭങ്ങളും അതിനു കാരണമാണ്. ചിത്രപ്രദർശനങ്ങളും കൂടിവരുന്നു. കേരള ലളിതകലാ അക്കാദമിയുടെ നിർവ്വാഹകസമിതി അംഗമായിരുന്ന ടി.ആർ. ഉദയകുമാർ കഴിഞ്ഞ കുറെ വർഷങ്ങളായി ചിത്രകലാസംഘാടനരംഗത്തും സജീവമാണ്. ചിത്രകലാ ക്യാമ്പുകളിലെ സാന്നിധ്യവും സഹവാസവും ഉദയകുമാറിന്റെ ചിത്രകലാ ജീവിതത്തെ ഗുണപരമായി സ്വാധീനിച്ചിട്ടുണ്ട്. അതിന്റെ തെളിവുകളാണ് ഉദയന്റെ പുതിയ ചിത്രങ്ങൾ. സവിശേഷമായ സാമൂഹികപ്രതികരണ ശേഷി പുലർത്തുന്ന ചിത്രങ്ങളാണവ. എന്നാൽ ഏതെങ്കിലും സന്ദേശങ്ങൾക്കുവേണ്ടി വരയ്ക്കപ്പെടുന്ന ചിത്രങ്ങളല്ല അവ. സർഗാത്മകമായ ഭാവമേഖലകൾ അവയിൽ ആവിഷ്ക്കരിക്കപ്പെടുന്നുണ്ട്. വർണങ്ങളുടെ തെരഞ്ഞെടുപ്പും സാന്ദ്രതയും ചിത്രത്തിന്റെ ദൃശ്യപ്പെരുമയെ വർദ്ധിപ്പിക്കുന്നു. പലപ്പോഴും അവയിലെ നിറങ്ങളുടെ ലയവും നമ്മിൽ സാരമായി ഭവിക്കുന്നു.

ഉപേക്ഷിതമായ ഒരു നഗരത്തിലൂടെ ആളില്ലാത്ത റിക്ഷയുമായി പോകുന്ന റിക്ഷാക്കാരൻ കടന്നുവരുന്ന ചിത്രം നീലയുടെ സവിശേഷമായ മിശ്രണത്തിലൂടെയാണ് വരച്ചിരിക്കുന്നത്. മേഘങ്ങൾ പാറുന്ന അന്തരീക്ഷത്തിലൂടെയാണ് റിക്ഷാക്കാരൻ കടന്നുപോകുന്നത്. മേഘങ്ങൾക്കപ്പുറം കാഴ്ചയിൽ അസ്തമയ സൂര്യൻ. ഇത് കാലങ്ങൾക്കുശേഷം ശിഥിലമായ ഉപേക്ഷിത നഗരമാകാം. ഓർമ്മയുടെ സർഗാത്മകമായ വിചനസ്‌ഥലമാകാം. പല രീതിയിൽ വായിക്കാൻ കഴിയുന്ന ചിത്രമാണിത്. അതിനാൽതന്നെയാണ് ഉദയകുമാർ മികച്ചചിത്രകാരനാകുന്നത്. കാരണം മികച്ച സർഗ്ഗാത്മക രചനകൾ നിയതമായ ഭാഷാ അർത്ഥതലങ്ങളെ മറികടക്കുന്നു. സമുദ്രത്തിൽ പൊളിഞ്ഞുവീണുകൊണ്ടിരിക്കുന്ന കപ്പൽ ഉദയകുമാർ വരയ്ക്കുന്നു. അതിൽ ഒന്നു രണ്ടു നാവികരുമുണ്ട്. പുലിവേഷം ധരിച്ച അവർ ദൂരദർശിനിയിലൂടെ രക്ഷായാനം തിരയുന്നുണ്ട്. മനുഷ്യ നാശത്തിന്റെതന്നെ കപ്പൽച്ഛേദത്തിലേക്ക് പ്രതീകാത്മകമായി വന്നെത്തുന്ന ചിത്രമാണത്.

പുലികളിയുടെ വേഷംധരിച്ച മനുഷ്യർ പല ചിത്രങ്ങളിലും കടന്നുവരുന്നു. പരിണാമ ദശയിൽ വീണ്ടും പ്രാകൃതമായ അവസ്‌ഥകളിലേക്ക് മടങ്ങുന്ന മനുഷ്യരെ ഇവരിൽ നമുക്ക് കാണാം. കടപുഴകിയ മരത്തിൽ മൊബൈൽഫോൺ വിളിച്ച് ഗ്രാമഫോൺ റിക്കാർഡ് പാട്ടുകേട്ടിരിക്കുന്ന ഈ വിധം മനുഷ്യരെ മറ്റൊരു ചിത്രത്തിൽ കാണാം. മരത്തിലാകാട്ടെ ചുവപ്പു നിറങ്ങളിലുള്ള വലിയ കൂണുകൾ വിരിഞ്ഞിരിക്കുന്നു. ഉപേക്ഷിതമായ തരിശുനിലങ്ങൾപോലെ തോന്നിക്കുന്ന ഭൂമി ഉദയന്റെ ചിത്രങ്ങളിൽ കാണാം. ഈ തരിശിടങ്ങളിൽ ജലം നഷ്ടപ്പെട്ട ഭൂമിയിൽ കാണുന്ന പഴയ വള്ളങ്ങൾ. അവയിൽ വിടർന്നു നിൽക്കുന്ന കൂണുകൾ. അവയിൽ ചുറ്റിപ്പടരുന്ന പുരാതനമായ വള്ളികൾ. വെള്ളമില്ലാത്ത മണ്ണിൽ ഉറച്ച ജലയാനങ്ങൾ. സസ്യങ്ങളില്ലാത്ത ഭൂപ്പരപ്പുകൾ. മനുഷ്യരെ കാത്തിരിക്കുന്ന ഊഷരഭൂമികൾ ഉദയന്റെ ചിത്രങ്ങളിൽ കാണാൻ കഴിയും. യഥാർഥത്തിൽ ഭൂമിയുടെ ഭാവിയെക്കുറിച്ചുള്ള ഉൽക്കണ്ഠകളുടെ തീക്ഷ്ണമായ ആവിക്ഷ്കാരം ഉദയകുമാറിന്റെ സമകാലീന ചിത്രങ്ങളിലെല്ലാമുണ്ട്.

ചുവപ്പും മഞ്ഞയും പോലുള്ള നിറങ്ങളിൽ പച്ചനിറമൊന്നുമില്ല. തരിശിടങ്ങളിൽ കൊത്തിപ്പെറുക്കുന്ന കിളികൾ. അശോകസ്തംഭത്തിനു കീഴിൽ വീണുറങ്ങുന്ന ബുദ്ധനും അശരണനായ ഗാന്ധിയും ചൂടിൽ ചുവന്ന സൂര്യബിംബവും എല്ലാറ്റിനും മേലെ പറന്നുയരുന്ന കറുത്ത കഴുകനുമെല്ലാം ചേർന്നുവരുന്ന ഒരു ചിത്രമുണ്ട്. ഈ ചിത്രങ്ങളെല്ലാംതന്നെ സമകാലീന ജീവിതത്തോട് ഒട്ടനവധി ചോദ്യങ്ങൾ ഉന്നയിക്കുന്ന ചിത്രങ്ങളാണ്. ഫാന്റസിയുടെ തലം ഇവയിലുണ്ടെങ്കിലും പരിസരങ്ങളിലെല്ലാമുള്ള യാഥാർത്ഥ്യങ്ങളിൽനിന്ന് രൂപംകൊള്ളുന്ന ചിത്രങ്ങളാണിവ. അവ ഓരോ സമയയാഥാർഥ്യവും വിശദമായ ഭാവിദർശനങ്ങളുമായിത്തിരുന്നു.

കേരളത്തിലെ ചിത്രകല നവീനമായ ഉണർവുകളിലൂടെ കടന്നുപോകുന്ന ഒരു വേളയാണിത്. തന്റെ ചിത്രകലാജീവതത്തിന്റെ പരിണാമദശയിലാണ് ഉദയകുമാർ നിൽക്കുന്നത്. ഭാവനയിലും ആവിഷ്കാരത്തിലും തനതായ സർഗ ഘടനയിലേക്ക് ഉദയകുമാർ എത്തിക്കൊണ്ടിരിക്കുന്നു. യാഥാർഥ്യത്തിനും ഫാന്റസിക്കും അപ്പുറത്തുള്ള സത്യത്തിന്റെ ആവിഷ്കാരമാണ് ഇപ്പോൾ ഉദയകുമാർ നടത്തുന്നത്.

കെ.ബി. പ്രസന്നകുമാർ