ഇതാ വന്നെത്തി ഒരു പൊന്നോണം. അതിന് ഓണക്കോടി മാത്രം പോരാ, ഒരു കെങ്കേമം ഓണസദ്യകൂടി വേണം. ഈ വിഭവങ്ങൾ എല്ലാം ഒന്നു പരീക്ഷിച്ചു നോക്കൂ.
ഓലൻ
കുന്പളങ്ങ കഷണം - രണ്ടു കപ്പ്, വെള്ളരിക്ക കഷണം - അരക്കപ്പ്, നീണ്ട പയർ രണ്ടിഞ്ച് നീളത്തിൽ മുറിച്ചത് - അരക്കപ്പ്, പച്ചമുളക്, ഉപ്പ്. വൻ പയർ - ഒരു കപ്പ് വേവിച്ചത്. തേങ്ങയുടെ രണ്ടാം പാൽ - ഒരു കപ്പ്, ഒന്നാം പാൽ - ഒരു കപ്പ്, വെളിച്ചെണ്ണ - ൊരു ടേബിൾസ്പൂണ്, കറിവേപ്പില.
ഉണ്ടാക്കുന്ന വിധം
പച്ചക്കറികളും ഉപ്പും പച്ചമുളകും കൂടി രണ്ടാം പാലിൽ വേവിക്കുക. ഇതിലേക്ക് വെന്ത പയർ ചേർത്ത ്ഇളക്കി ഒന്നാംപാൽ ചേർത്ത് ഒന്നു തിളച്ചാൽ ഇറക്കിവയ്ക്കാം. ഇതിലേക്ക് വെളിച്ചെണ്ണയും കറിവേപ്പിലയും ചേർത്തിളക്കുക.
അവിയൽ
പലതരം പച്ചക്കറികൾ രണ്ടിഞ്ച്് നീളത്തിൽ അരിഞ്ഞത് - അരക്കിലോ. ഇതിൽ വാഴയ്ക്ക, ചേന, മത്തൻ, പടവലം, മുരിങ്ങക്കായ് എന്നിവ ആകാം. സവാള - ഒന്ന്, പച്ചമുളക് - നാല് (നീളത്തിൽ കീറിയത്. തേങ്ങ ചുരണ്ടിയത് - ഒരു കപ്പ്, ജീരകം - ഒരു ടീസ്പൂണ്. മഞ്ഞൾ - അര ടീസ്പൂണ്, ഉപ്പ്, കറിവേപ്പില, തൈര് - അരക്കപ്പ്, വെളിച്ചെണ്ണ - ഒരു ടേബിൾസ്പൂണ്.
ഉണ്ടാക്കുന്ന വിധം
തേങ്ങയും ജീരകവും ഒന്ന് ചതച്ചെടുക്കുക. പച്ചക്കറികളും ഉപ്പും മഞ്ഞളും ഉള്ളിയും പച്ചമുളകും ചേർത്ത് ആവശ്യത്തിന് വെള്ളം ചേർത്ത് വേവിച്ചെടുക്കുക. ഇതിലേക്ക് തേങ്ങ ചേർത്ത് ഇളക്കി ഒന്നുകൂടി തിളപ്പിക്കുക. കുറുകിയാൽ ഇറക്കിവയ്ക്കുക. എണ്ണയും കറിവേപ്പിലയും ചേർത്ത് യോജിപ്പിക്കുക.
കാളൻ
പച്ച നേന്ത്രക്കായ തൊലി പൊളിച്ച് നീളത്തിൽ നടുകെ മുറിച്ച് കാൽ ഇഞ്ച് കഷണങ്ങളാക്കിയത് - രണ്ടു കപ്പ്. കുരുമുളകു പൊടി - അര ടീസ്പൂണ്, മഞ്ഞൾ - അര ടീസ്പൂണ്, ഉപ്പ്, തേങ്ങചുരണ്ടിയത് - ഒരു മുറി. ജീരകം - ഒരു ടീസ്പൂണ്, പച്ചമുളക് - നാല്, തൈര് - ഒന്നരക്കപ്പ്, വെളിച്ചെണ്ണ - രണ്ട് ടേബിൾസ്പൂണ്, കടുക് - അര ടീസ്പൂണ്, ഉണക്കമുളക് - അഞ്ച്, കറിവേപ്പില.
ഉണ്ടാക്കുന്ന വിധം
ഏത്തക്കായ് മുറിച്ചതും ഉപ്പും കുരുമുളകും മഞ്ഞൾപ്പൊടിയും ചേർത്ത് പാകത്തിന് വെള്ളം ഒഴിച്ച് വേവിക്കുക. തേങ്ങ, ജീരകം, പച്ചമുളക് എന്നിവ അരച്ചത് തൈരിൽ കലക്കി വെന്ത കൂട്ടിലേക്ക് ഒഴിച്ച് ചെറുതീയിൽ ഒന്നു തിളപ്പിച്ച് ഇറക്കിവയ്ക്കുക. എണ്ണ ചൂടാക്കി കടുകും കറിവേപ്പിലയും ഉണക്കമുളകും ഇട്ട് പൊട്ടിയാൽ ഈ കറിയിലേക്ക് ഒഴിക്കുക. കാളൻ കുറുകിയിരിക്കണം.
ഇഞ്ചിക്കറി
പൊടിയായി അരിഞ്ഞ ഇഞ്ചി - 150 ഗ്രാം. പച്ചമുളക് - മൂന്ന്, വെളുത്തുള്ളി - മൂന്നല്ലി, മുളകുപൊടി - മൂന്ന് ടീസ്പൂണ്, മല്ലി - രണ്ട് ടീസ്പൂണ്, മഞ്ഞൾ - അര ടീസ്പൂണ്, വാളൻപുളി ഒരു ചെറുനാരങ്ങാ വലിപ്പം എടുത്ത് കുതിർത്തത്. ശർക്കര ചീകിയത് - രണ്ട് ടേബിൾസ്പൂണ്, കായം - അര ടീസ്പൂണ്, വെളിച്ചെണ്ണ, ഒരു ടേബിൾസ്പൂണ്, കടുക് - ഒരു ടീസ്പൂണ്, ഉണക്കമുളക്, കറിവേപ്പില.
ഉണ്ടാക്കുന്ന വിധം
ഇഞ്ചിയും പച്ചമുളകും വെളുത്തുള്ളിയും സ്വല്പം എണ്ണയിൽ വഴറ്റുക. ഇതിലേക്ക് മസാലപ്പൊടികൾ ചേർത്തിളക്കുക. പിന്നെ പുളി പിഴിഞ്ഞ വെള്ളം ശർക്കര, ഉപ്പ്, കായം എന്നിവ ചേർത്ത് ഇളക്കി വറ്റിയാൽ വാങ്ങാം. അവസാനം വെളിച്ചെണ്ണയിൽ കടുകും ഉണക്കമുളകും കറിവേപ്പിലയും ഇട്ട് താളിച്ച് ഇഞ്ചിക്കറിയിലേക്ക് ഒഴിക്കുക.
വെള്ളരിക്ക കിച്ചടി
വെള്ളരി ചെറുതായി അരിഞ്ഞത്
- മൂന്നു കപ്പ്
തൈര് - ഒന്നരക്കപ്പ്
പച്ചമുളക് - നാല്
തേങ്ങ ചുരണ്ടിയത് - മുക്കാൽ കപ്പ്
കടുക് - മൂന്ന് ടീസ്പൂണ്
എണ്ണ, കറിവേപ്പില, ഉപ്പ്
ഉണ്ടാക്കുന്ന വിധം
വെള്ളരിക്ക ഉപ്പും പാകത്തിന് വെള്ളവും ചേർത്ത് വേവിച്ചെടുക്കുക. വെന്ത കൂട്ടിലേക്ക് അരപ്പും തൈരുംകൂടി ചേർത്ത് ഇളക്കി പാകത്തിന് കുറുക്കിയെടുക്കുക. അവസാനം ബാക്കിവന്ന കടുക് അതായത് ഒരു ടീസ്പൂണ് എണ്ണയിൽ ഇട്ട് പൊട്ടി കറിവേപ്പിലയും ഇട്ട് താളിച്ച് കറിയിലേക്ക് ഒഴിക്കുക.
കാബേജ് തോരൻ
കാബേജ് കൊത്തിയരിഞ്ഞത്
- അരക്കിലോ
സവാള അരിഞ്ഞത് - ഒന്ന്
തേങ്ങ ചുരണ്ടിയത് - ഒരു കപ്പ്
പച്ചമുളക് കീറിയത് - അഞ്ച്
മഞ്ഞൾപ്പൊടി - മുക്കാൽ ടീസ്പൂണ്
ഉപ്പ്, താഴിക്കാൻ വെളിച്ചെണ്ണ
- ഒരു ടേബിൾസ്പൂണ്
കടുക് - ഒരു ടീസ്പൂണ്
ജീരകം - ഒരു ടീസ്പൂണ്
ഉണക്കമുളക് - രണ്ട്
കറിവേപ്പില
ഉണ്ടാക്കുന്ന വിധം
കാബേജ് ഉപ്പും മഞ്ഞളും ചേർത്ത് വറ്റിച്ച് തേങ്ങാക്കൂട്ട് ഇതിൽ യോജിപ്പിച്ച് ഒന്നുകൂടി വേവിക്കുക. അവസാനം താളിക്കാനുള്ള എണ്ണ ചൂടാക്കി കടുക്, ജീരകം, ഉണക്കമുളക്, കറിവേപ്പില എന്നിവ യഥാക്രമം ചേർത്ത് തയാറാക്കിയ തോരൻ ഇതിൽ ഇട്ട് ഒന്നു ചിക്കിയെടുക്കുക.
നാരങ്ങാ അച്ചാർ
ചെറുനാരങ്ങാ - 12 എണ്ണം (ആവിയിൽ പുഴുങ്ങിയത്)
വെളുത്തുള്ളി - 12 അല്ലി
ഇഞ്ചി അരിഞ്ഞത് - ഒരു ടേബിൾസ്പൂണ്
മുളകുപൊടി - മൂന്ന് വലിയസ്പൂണ്
മഞ്ഞൾ, ഉപ്പ്, കായം, കടുക് - ഒരു ടീസ്പൂണ്
എണ്ണ - ഒരു കപ്പ്
കറിവേപ്പില
ഉണ്ടാക്കുന്ന വിധം
നാരങ്ങാ തണുത്തശേഷം ഓരോന്നും നാലു കഷണങ്ങളാക്കി വയ്ക്കുക. എണ്ണ ചൂടാക്കി ആദ്യം കടുകും കായവും ചേർത്ത് പൊട്ടിയാൽ വെളുത്തുള്ളിയും ഇഞ്ചിയും ഇട്ട് വഴറ്റി മസാലപ്പൊടികളും ഉപ്പും ചേർത്തിളക്കി നാരങ്ങാ ചേർത്ത് ഇളക്കി എല്ലാം പാകമായാൽ ഇറക്കിവയ്ക്കാം. ഇത് ഒരാഴ്ച മുന്പ് ഉണ്ടാക്കിയാൽ നല്ലതായിരിക്കും.
പായസം
കടലപ്പരിപ്പ് - ഒരു കപ്പ്
പച്ചരി - കാൽ കപ്പ്
ശർക്കര ഉരുക്കിയത് - രണ്ടു കപ്പ്
തേങ്ങയുടെ ഒന്നാംപാൽ - ഒരു കപ്പ്
രണ്ടാം പാൽ - രണ്ടു കപ്പ്
ചുക്കും ജീരകവുംകൂടി പൊടിച്ചത് - ഒരു ടീസ്പൂണ്
തേങ്ങാക്കൊത്ത് നെയ്യിൽ വറുത്തത് - രണ്ട് ടേബിൾസ്പൂണ്
ഉണ്ടാക്കുന്ന വിധം
കടലപ്പരിപ്പ് ഒന്നു ചെറുതായി വറുത്തെടുക്കുക. ഇത് തിളച്ച വെള്ളത്തിൽ അരിയുടെ കൂടെ വേവിക്കുക. മുക്കാൽ വേവായാൽ രണ്ടാംപാൽ ചേർത്ത് നല്ലപോലെ വേവിക്കുക. അതിലേക്ക ്ശർക്കര ചേർത്ത് ഇളക്കി കുറുകിയാൽ ഒന്നാം പാലും ചേർത്ത് പാകമായാൽ ഇറക്കിവയ്ക്കാം. ഇതിലേക്ക് ബാക്കിയുള്ളവകൂടി ചേർത്ത് വിളന്പാം.
-ഓമന ജേക്കബ്