ഭംഗി കൂട്ടാൻ താജ്മഹലിനു ഫേഷ്യൽ!

ലോകാദ്ഭുതങ്ങളിലെ ഇന്ത്യൻ സാന്നിധ്യമായ താജ്മഹലിന്റെ ഭംഗി കുറയുന്നുവെന്ന വാർത്തകൾ വരാൻ തുടങ്ങിയിട്ട് നാളേറെയായി. താജ്മഹലിന്റെ മാർബിൾ കല്ലുകളിൽ മഞ്ഞ, കറുപ്പ്, പച്ച നിറങ്ങളിൽ പൊട്ടുകൾ രൂപപ്പെട്ട് ഭംഗി കുറഞ്ഞിരുന്നു. സമീപത്തുകൂടിയൊഴുകുന്ന യമുനാ നദിയിലെ മലിനജലത്തിൽ പെരുകുന്ന ഒരുതരം ഷഡ്പദമാണ് മാർബിളിലെ പച്ച നിറത്തിനു കാരണം. ഈ ഷഡ്പദങ്ങളെ തുരത്താൻ ഇന്ത്യൻ പുരാവസ്തു വകുപ്പിന് കുറച്ചൊന്നുമല്ല പണിപ്പെടേണ്ടിവന്നത്. വെണ്ണക്കൽ നിർമിതിയുടെ നിറം വീണ്ടെടുക്കാനുള്ള ശ്രമത്തിലാണ് ഇന്ത്യൻ പുരാവസ്തു വകുപ്പ്. താജ്മഹലിന്റെ പ്രധാന മിനാരത്തിനു ഫേഷ്യൽ ചെയ്യാനാണ് തീരുമാനം. മണ്ണുകൊണ്ടു പൊതിഞ്ഞുള്ള ഒരു പ്രത്യേക ചികിത്സ – മഡ്പാക് തെറാപ്പി. ഒരു വർഷമെടുക്കും ഇതു പൂർത്തിയാകാൻ.

വകുപ്പിന്റെ ശാസ്ത്രശാഖയാണ് ഇത് കൈകാര്യം ചെയ്യുക. താജ്മഹലിന്റെ നാലു മിനാരങ്ങളിൽ മൂന്നെണ്ണത്തിൽ മണ്ണു പൂശിക്കഴിഞ്ഞു. നാലാമത്തേതിലെ ജോലികൾ അവസാനിച്ചാൽ പ്രധാന കെട്ടിടത്തിൽ ജോലികൾ ആരംഭിക്കും. 2017 ഏപ്രിലിൽ പണികൾ പൂർത്തിയാക്കാനാണ് ശ്രമം.

മഡ്പാക് തെറാപ്പിക്കു ശ്രമം തുടങ്ങിയത് 2015 ഏപ്രിലിലാണ്. ഇന്ത്യയും അമേരിക്കയും സംയുക്‌തമായി നടത്തിയ നിരീക്ഷണത്തിൽ അന്തരീക്ഷത്തിലെ പൊടിപടലങ്ങളിൽ അടിഞ്ഞിരിക്കുന്ന കാർബൺ സംയുക്‌തങ്ങളാണ് താജ്മഹലിലെ മഞ്ഞ നിറത്തിനു കാരണമെന്നു കണ്ടെത്തിയിരുന്നു. പിന്നീട് പ്രാണികൾ മൂലം പച്ച നിറവും മാർബിളിൽ കാണപ്പെട്ടു. ഇപ്പോഴും ഇതൊക്കെ താജ്മഹലിന്റെ ശോഭ കെടുത്തുന്നുണ്ട്.

ചർമകാന്തിക്കായി സ്ത്രീകൾ ഉപയോഗിക്കുന്ന മുൾട്ടാണി മിട്ടി തന്നെയാണ് മഡ്പാക്കിലുള്ളത്. മിനാരങ്ങളിൽ രണ്ടു മില്ലിമീറ്റർ കനത്തിൽ മുൾട്ടാണി മിട്ടി തേച്ചു പിടിപ്പിക്കുന്നു. ഉണങ്ങിയ ശേഷം ഇത് നേർത്ത നൈലോൺ ബ്രഷ്, ശുദ്ധീകരിച്ച വെള്ളം എന്നിവ ഉപയോഗിച്ച് നന്നായി കഴുകും. അമേരിക്കയിലും ഇറ്റലിയിലും ഉപയോഗിച്ചു വിജയിച്ച ചികിത്സയാണിത്.