നായ്ക്കുട്ടികൾ വിരുന്നുകാരായ വിവാഹം!

Wednesday, April 12, 2017 1:53 AM IST

വിവാഹദിവസങ്ങളിൽ വധൂവരന്മാർക്കുശേഷം ഏറ്റവുമധികം ശ്രദ്ധിക്കപ്പെടുന്നത് വധുവിന്‍റെ കൂട്ടുകാരി(ബ്രൈഡ്സ് മെയ്ഡ്)കളാണ്. ഒരുപോലെ വസ്ത്രം ധരിച്ച് ഭംഗിയുള്ള പൂച്ചെണ്ടുകൾ പിടിച്ച് അവർ വധുവിനൊപ്പം നിൽക്കും, ഭർത്താവിനൊപ്പം വധു പടിയിറങ്ങുന്നതുവരെ. ഇതാണ് പതിവു കാഴ്ചയെങ്കിലും ഇനി പറയാൻ പോകുന്ന വിവാഹം അല്പം വ്യത്യസ്തമായിരുന്നു. നോർത്ത് കരോളൈനയിലാണ് ഈ വ്യത്യസ്ത വിവാഹം. മേഘൻ ബട്‌ലർ എന്ന അഭിഭാഷകയുടെ വിവാഹവേളയിലേക്ക് അവളുടെ എട്ടു സുഹൃത്തുകളെത്തിയത് പൂച്ചെണ്ടുകളുമായല്ല. എട്ടു നായ്ക്കുട്ടികളുമായാണ്.

മൃഗസ്നേഹികളായ മേഘനും ഭർത്താവ് ബ്രറ്റിനും രണ്ടു പൂച്ചയും രണ്ടു പട്ടിക്കുട്ടികളുമുണ്ട്. മൃഗസംരക്ഷണത്തെക്കുറിച്ച് അവബോധമുണ്ടാക്കാനാണ് പട്ടിക്കുട്ടികളുമായി സുഹൃത്തുക്കൾ വേദിയിലെത്തട്ടെ എന്ന് നവദന്പതികൾ തീരുമാനിച്ചത്.

ഉടമസ്ഥർ ഉപേക്ഷിച്ച നായകൾക്കു തണലൊരുക്കുന്ന ഒരു സുഹൃത്താണ് മേഘന്‍റെ വിവാഹത്തിനായി പട്ടികളെ എത്തിച്ചത്. "എന്‍റെ ആഗ്രഹംപോലെ തന്നെ വിവാഹത്തിനെത്തിയ അതിഥികളിൽ പലർക്കും നായകളെ ദത്തെടുക്കേണ്ടതിന്‍റെ ആവശ്യകത മനസിലായി’ മേഘൻ പറയുന്നു. എല്ലാത്തിലുമുപരിയായി ഇരുവർക്കും സന്തോഷമായത് ചടങ്ങിൽ പങ്കെടുക്കാനെത്തിയ എട്ടു നായകളെയും ദത്തെടുക്കാൻ എട്ടു കുടുംബങ്ങൾ മുന്നോട്ടു വന്നപ്പോഴാണ്. മൃഗസംരക്ഷണകേന്ദ്രത്തിനായി മേഘനും ബ്രറ്റും നല്ല തുക സംഭാവനയായി നൽകുകയും ചെയ്തു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.