തലയിലെ ശസ്ത്രക്രിയയ്ക്കിടെ ഗിത്താർ വായിച്ച് ബംഗളൂരു സ്വദേശി

Friday, July 21, 2017 3:38 AM IST

ശസ്ത്രക്രിയയ്ക്കിടെ ഗിത്താർ വായിച്ച് രോഗി! ബംഗുളൂരുവിലാണ് കൗതുകമുണർത്തിയ സംഭവം അരങ്ങേറിയത്. മുപ്പത്തിരണ്ടുകാരനായ ഗിത്താറിസ്റ്റാണ് തലയോട്ടി തുളച്ചുള്ള ശസ്ത്രക്രിയയ്ക്കിടയിൽ സംഗീതവിരുന്നൊരുക്കിയത്. മാധ്യമശ്രദ്ധനേടാനാണ് കക്ഷി ഗിത്താർ വായിച്ചെന്നു കരുതിയാൽ തെറ്റി. തലച്ചോറിലെ രോഗബാധിതമായ കോശങ്ങൾ ഡോക്ടർമാർക്ക് കൃത്യമായി മനസിലാക്കാനാണ് ഇങ്ങനെയൊരു സാഹസം നടത്തിയത്.

ഒരു വർഷം മുന്പ് ഗിത്താർ വായിക്കുന്നതിനിടെ കൈവിരലുകൾ കോച്ചിവലിഞ്ഞതിനെത്തുടർന്നാണ് യുവാവ് ചികിത്സ തേടിയത്. തലച്ചോറിനുണ്ടാകുന്ന ഡിസ്റ്റോണിയ എന്ന രോഗാവസ്ഥയാണ് വിരലുകൾ കോച്ചിവലിയാൻ കാരണമെന്നായിരുന്നു കണ്ടെത്തൽ. ഇതിനേത്തുടർന്നു തലച്ചോറിലെ രോഗബാധിതമായ കോശങ്ങൾ കരിച്ചുകളയുന്നതിനാണ് യുവാവ് ശസ്ത്രക്രിയയ്ക്കു വിധേയനായത്. ലോക്കൽ അനസ്തേഷ്യ നല്കിയശേഷം ഗിത്താർ വായിക്കാൻ ഡോക്ടർമാർ ആവശ്യപ്പെടുകയായിരുന്നു. രോഗബാധിത കോശങ്ങൾ കൃത്യമായി മനസിലാക്കാനാണ് രോഗിയെക്കൊണ്ടു ഗിത്താർ വായിപ്പിച്ചതെന്നു ശസ്ത്രക്രിയയ്ക്കു നേതൃത്വം നൽകിയ ഡോ. സൻജീവ് ലാൽ പറഞ്ഞു.

എന്തായാലും ശസ്ത്രക്രിയ വിജയമായിരുന്നുവെന്നാണ് റിപ്പോർട്ട്. ഇലക്‌ട്രോഡുകൾ ഉപയോഗിച്ച് കോശങ്ങൾ കരിച്ചയുടനേതന്നെ തന്‍റെ കൈവിരലുകൾ പൂർവസ്ഥിതിയിലായെന്നും അടുത്ത ദിവസംതന്നെ താൻ സംഗീത പരിപാടികൾ ആരംഭിക്കുമെന്നും യുവാവ് അറിയിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.