കണ്ണില്ലാത്ത ക്രൂരത..! വളർത്തുനായകളെ ടാറിനുള്ളിൽ ഉപേക്ഷിച്ച് ഉടമ

Wednesday, August 2, 2017 6:24 AM IST

മൃഗങ്ങൾക്കെതിരയുള്ള അക്രമവും പീഡനങ്ങളും നിയമപരമായി നിരോധിച്ചിട്ടുള്ളതാണങ്കിലും നാൾക്കുനാൾ അത് വർദ്ധിച്ചുകൊണ്ടിരിക്കുകയാണെന്നുള്ളതാണ് വസ്തുത. ഇപ്പൊഴിതാ അതിനുദാഹരണമായി മാറുകയാണ് എല്ലാവർക്കും ഹൃദയഭേദകമായി നാല് വളർത്തുനായ്ക്കൾ നേരിട്ട ദുരനുഭവം.

ഈ നായ്ക്കളെ ഉടമയ്ക്ക് വേണ്ടാത്തതിനാൽ ഇവരെ കൊണ്ടിട്ടത് ടാറിനുള്ളിലേക്കായിരുന്നു. പിന്നീട് ശരീരം മുഴുവൻ ടാറിൽ മുങ്ങി അനങ്ങാൻ പോലും കഴിയാതെ കിടന്നിരുന്ന ഈ നാല് നായ്ക്കളെ ആളുകളറിയച്ചതിനെ തുടർന്ന് രക്ഷിച്ചത് ഒരു കൂട്ടം മൃഗ സ്നേഹികളായിരുന്നു. റഷ്യയിലെ നൊയബ്രസ്ക്കിലാണ് സംഭവം നടന്നത്. നാലു പേരെയും രക്ഷിക്കാനുള്ള ശ്രമത്തിനിടെ ഒരാൾ മരണമടഞ്ഞിരുന്നു.

ടാർ നായകളുടെ ശരീരത്തോട് ഒട്ടിപ്പിടിച്ചിരുന്നതിനാൽ വളരെ പ്രയാസപ്പെട്ടാണ് ഇവരെ രക്ഷിച്ചത്. ഇത് പൂർണമായും നീക്കം ചെയ്യണമെങ്കിൽ ഇവരെ മയക്കി കിടത്തണമെന്നും അല്ലാത്ത പക്ഷം ഇവർക്ക് കടുത്ത വേദന അനുഭവപ്പെടുമെന്നും മൃഗങ്ങളെ സംരക്ഷിക്കുന്നവരിലൊരാൾ അറിയിച്ചു. നായ്ക്കളുടെ വായയിൽ വരെ ടാർ ആണെന്നുള്ളതാണ് ഏറ്റവും ദുഖകരം. നിരുപദ്രവകാരികളായ ഇത്തരം നായ്ക്കളെ ദ്രോഹിക്കുന്നവർക്കെതിരെ കർശനമായി നടപടി സ്വീകരിക്കണമെന്ന ആവശ്യം ഇതോടെ വർധിച്ചിരിക്കുകയാണ്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.