"അയാം ദി സോറി മോനേ...' മോഷ്ടിച്ച ബൈക്ക് കുട്ടിക്ക് തിരിച്ചുനല്കി കള്ളൻ, ഒപ്പമൊരു കുറിപ്പും

Thursday, August 10, 2017 2:29 AM IST

മകന്‍റെ ബൈക്ക് കള്ളൻ കൊണ്ടുപോയ ദുഃഖത്തിൽ ആ കാനഡക്കാരി അമ്മ ഫേസ്ബുക്കിൽ ഇങ്ങനെ കുറിച്ചു: ""ഇന്നു രാവിലെ മുതൽ എന്‍റ കുട്ടിയുടെ പ്രിയപ്പെട്ട ബൈക്ക് കാണാനില്ല. ആരോ പൂട്ടു തകർത്ത് മോഷ്ടിച്ചു കൊണ്ടുപോയതാണെന്നാണ് കരുതുന്നത്. എന്‍റെ മകൻ അതീവ ദുഃഖിതനാണ്. ഇത്തിരി പഴയതാണെങ്കിലും അത് നന്നായി ഓടുന്നുണ്ടായിരുന്നു. ആരു കൊണ്ടുപോയതാണെങ്കിലും കൃഷ്ണമണി പോലെ സൂക്ഷിക്കണേ.''

പിന്നീടാണ് നാടകീയ സംഭവങ്ങൾ അരങ്ങേറിയത്. ഏതാനും ദിവസം കഴിഞ്ഞുള്ള ഒരു പ്രഭാതത്തിൽ മുറ്റത്ത് അതാ മകന്‍റെ പ്രിയപ്പെട്ട ബൈക്ക്. അതിന്‍റെ ഇന്ധന ടാങ്കിൽ, പശ്ചാത്താപത്തിന്‍റെ പരകോടിയിലുള്ള ഒരു കത്തും ഒട്ടിച്ചുവച്ചിട്ടുണ്ടായിരുന്നു;

""ക്ഷമ ചോദിക്കുന്നു. നിങ്ങളുടെ കൗമാരക്കാരനായ മകന് ഒരു ബൈക്കിന്‍റെ ആവശ്യകത എത്ര വലുതാണെന്ന് ഞാൻ ചിന്തിക്കണമായിരുന്നു. പൂട്ടു തകർത്താണ് മോഷ്ടിച്ചത്. പുതിയ പൂട്ട് ഘടിപ്പിച്ചിട്ടുണ്ട്. താക്കോൽ ബൈക്കിൽ വച്ചിട്ടുണ്ട്. ഫേസ്ബുക്ക് പോസ്റ്റ് വായിച്ചപ്പോൾ ഉടൻ ബൈക്ക് തിരിച്ചു തരണമെന്ന് തോന്നി. നിങ്ങളുടെ മകന്‍റെ തകർന്ന ഹൃദയം സുഖമാകുന്നതിന് അതുവേണമെന്നു തോന്നുന്നു. ഓടിച്ചാനന്ദിക്കൂ കുട്ടീ. ഇത് നിങ്ങളുടെ അവകാശമാണ്.''

ചെയ്ത പ്രവൃത്തികളെക്കുറിച്ച് പശ്ചാത്തപിക്കുന്ന യുവാക്കൾ മികച്ച പാഠങ്ങൾ പഠിക്കുന്നു എന്ന എങ്ങും തൊടാത്ത ഒരു പ്രസ്താവനയിലൂടെ കത്ത് ചുരുക്കുകയും ചെയ്തു. ബൈക്ക് തിരിച്ചുകിട്ടിയെന്ന സന്തോഷവാർത്ത ആ അമ്മ ഫേസ്ബുക്കിലൂടെത്തന്നെ എല്ലാവരെയും അറിയിക്കുകയും ചെയ്തു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.