ശസ്ത്രക്രിയയ്ക്ക് ഇനി കുഞ്ഞൻ യന്ത്രക്കൈകൾ

Wednesday, August 23, 2017 12:00 AM IST

ശസ്ത്രക്രിയാ രംഗത്ത് അത്ഭുതങ്ങൾ സൃഷ്ടിച്ചേക്കാവുന്ന ഒരു കണ്ടുപിടിത്തത്തിന്‍റെ ത്രില്ലിലാണ് വൈദ്യശാസ്ത്രം. താക്കോൽദ്വാര ശസ്ത്രക്രിയകളിൽ ഉപയോഗിക്കാവുന്ന, ലോകത്തിലെ ഏറ്റവും ചെറിയ യന്ത്രക്കൈ നിർമിച്ചുകൊണ്ടാണ് ശാസ്ത്ര ലോകത്തിന്‍റെ പുത്തൻ കാൽവയ്പ്. ബ്രിട്ടനിലെ കേംബ്രിഡ്ജ്ഷയറിലുള്ള ഒരുപറ്റം എൻജിനീയർമാരും നൂറോളം ശാസ്ത്രജ്ഞരുമടങ്ങുന്ന സംഘമാണ് കണ്ടുപിടിത്തത്തിനു പിന്നിൽ.

വെഴ്സിയസ് എന്നു വിളിപ്പേരുള്ള ഈ യന്ത്രക്കൈ മനുഷ്യകരം പോലെ തന്നെ വഴക്കമുള്ളതാണ്. പരന്പരാഗത ശസ്ത്രക്രിയാ രീതികളിൽനിന്ന് വ്യത്യസ്തമായി പരാജയസാധ്യതയും രോഗിയുടെ സുഖപ്പെടൽ കാലയളവും കുറവുള്ള താക്കോൽദ്വാര ശസ്ത്രക്രിയകളുടെ വിശ്വാസ്യത വീണ്ടുമുയർത്താൻ വെഴ്സിയസിനാകുമെന്ന് ഉപജ്ഞാതാക്കൾ അവകാശപ്പെടുന്നു.

താക്കോൽപ്പഴുതിലൂടെ ശരീരത്തിനുള്ളിൽ കടക്കുന്ന യന്ത്രക്കൈയുടെ പ്രവർത്തനങ്ങൾ ഓപ്പറേഷൻ തിയറ്ററിനുള്ളിലിരുന്ന് ഒരു ത്രീഡി സ്ക്രീനിലൂടെ സർജനു നിയന്ത്രിക്കാനാകും. ഇപ്പോൾ നിലവിലുള്ള സർജിക്കൽ യന്ത്രക്കൈകളുടെ മൂന്നിലൊന്ന് വലുപ്പമേ വെഴ്സിയസിനുള്ളൂ. പക്ഷേ, ഇതിന്‍റെ വില ആശുപത്രികൾക്ക് താങ്ങാൻ കഴിയുമോ എന്നാണ് ഇപ്പോൾ ചർച്ച. 16.52 കോടി രൂപയാണ് ഉപകരണത്തിന്‍റെ വില. ഇപ്പോൾ ഉപയോഗിച്ചു വരുന്ന ഉപകരണത്തിന് 2.5 ലക്ഷം രൂപയേയുള്ളൂ.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.