മലാല ഫൗണ്ടേഷനൊപ്പം പ്രവർത്തിക്കാൻ ആപ്പിളും

Sunday, July 15, 2018 10:47 AM IST

ബ്രസീലിലെയും ഇന്ത്യയിലെയും പെൺകുട്ടികളുടെ വിദ്യാഭ്യാസത്തിനായി മലാല ഫൗണ്ടേഷൻ നടത്തുന്ന പ്രവർത്തനങ്ങളിൽ ആപ്പിളും സഹകരിക്കും. മലാല ഫണ്ടുമായി സഹകരിച്ച് ടെക് കമ്പനി ആപ്പിൾ കഴിഞ്ഞ ദിവസം ബ്രസീലിൽ പെൺകുട്ടികളുടെ വിദ്യാഭ്യാസപുരോഗതിക്കായുള്ള പ്രവർത്തനങ്ങൾക്ക് തുടക്കംകുറിച്ചു.

ലാറ്റിനമേരിക്കയിലും ഇന്ത്യയിലും വൈകാതെ പ്രവർത്തനം വ്യാപിപ്പിക്കാനാണ് തീരുമാനം. ബ്രസീലിൽ 10 ആപ്പിൾ ഡെവലപ്പർ അക്കാഡമിയിലൂടെയാണ് വിദ്യാഭ്യാസപ്രവർത്തനങ്ങളിൽ ആപ്പിൾ ഏർപ്പെടുന്നത്.

മലാല ഫണ്ടിന്‍റെ പ്രവർത്തനങ്ങളുമായി സഹകരിച്ച് കുറഞ്ഞത് ഒരു ലക്ഷം പെൺകുട്ടികൾക്കെങ്കിലും മികച്ച വിദ്യാഭ്യാസം നല്കുകയാണ് തങ്ങളുടെ ലക്ഷ്യമെന്ന് ആപ്പിളിന്‍റെ വൈസ് പ്രസിഡന്‍റ് ലിസ ജാക്സൺ പറഞ്ഞു. സാങ്കേതികവിദ്യയും പഠനസൗകര്യങ്ങളുമാണ് ആപ്പിൾ ഒരുക്കുക.

നിലവിൽ മലാല ഫൗണ്ടേഷന്‍റെ പ്രവർത്തനങ്ങൾ ഇന്ത്യയിൽ നടക്കുന്നുണ്ട്. എന്നാൽ, ആപ്പിളിന്‍റെ പ്രവർത്തനങ്ങൾ ഇന്ത്യയിലേക്ക് എന്ന് എത്തുമെന്നത് ഇപ്പോൾ പറയാനാവില്ല. എന്നാൽ, മലാല ഫണ്ട് എപ്പോൾ ആവശ്യപ്പെടുന്നുവോ അപ്പോൾ ആപ്പിൾ വിളിപ്പുറത്തുണ്ടാകും- ലിസ പറഞ്ഞു.

അതേസമയം, ഇന്ത്യയിലെ മണിപ്പുർ, ജാർഖണ്ഡ്, ഛത്തീസ്ഗഡ്, ആന്ധ്രപ്രദേശ്, ജമ്മു കാഷ്മീർ എന്നിവിടങ്ങളിൽ സ്വതന്ത്രമായി ആപ്പിൾ സന്നദ്ധപ്രവർത്തനങ്ങൾ നടത്തുന്നുണ്ട്. ജനുവരിയിലാണ് മലാല ഫണ്ടുമായി സഹകരിച്ച് ഇന്ത്യയിലും ലാറ്റിനമേരിക്കയിലും ബ്രസീലിലും പ്രവർത്തിക്കുമെന്ന് ആപ്പിൾ പ്രഖ്യാപിച്ചത്. ആപ്പിൾ സിഇഒ ടിം കുക്ക് അന്ന് മലാലയെ സന്ദർശിച്ചിരുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.