കാൻസർ മാറാൻ നാരങ്ങാനീര്..‍? ആ വാട്സ്ആപ്പ് പോസ്റ്റ് വിശ്വസിക്കരുതെന്ന് ഡോ. ഗംഗാധരൻ

Monday, January 29, 2018 11:50 AM IST

കാൻസർ ഭേദമാകാൻ കീമോ തെറാപ്പിക്കു പകരം നാരങ്ങാ നീര് മതിയെന്ന തരത്തിൽ‌ സോഷ്യൽ മീഡിയയിൽ കുറച്ചു ദിവസങ്ങളായി പോസ്റ്റുകൾ പ്രചരിക്കുകയാണ്. കാൻസർ രോഗചികിത്സാ വിദഗ്ധൻ ഡോ. വി.പി. ഗംഗാധരന്‍റെ പേരിൽ, അദ്ദേഹത്തിന്‍റെ ചിത്രം സഹിതമാണ് ഈ പോസ്റ്റുകൾ പ്രത്യക്ഷപ്പെട്ടത്. എന്നാൽ ഇത് ശുദ്ധനുണയാണെന്ന് പ്രതികരിച്ച് അദ്ദേഹം തന്നെ രംഗത്തെത്തിയിരിക്കുകയാണ്.

തന്‍റെ പേരും ചിത്രവും സഹിതം ഫേസ്ബുക്കിലൂടെയും വാട്സ്ആപ്പിലൂടെയും വ്യാജസന്ദേശം പ്രചരിപ്പിക്കുന്നതിനെതിരേ ഡോ. വി.പി. ഗംഗാധരൻ സൈബർ സെല്ലിൽ പരാതി നൽകി. പരാതിയുടെ അടിസ്ഥാനത്തിൽ ഇതുമായി ബന്ധപ്പെട്ടു പ്രചരിക്കുന്ന സന്ദേശത്തിന്‍റെ വിവരങ്ങളും സന്ദേശം കൈമാറി വന്ന അക്കൗണ്ടുകളുടെ വിവരങ്ങളും ശേഖരിച്ചുവരുകയാണെന്ന് സൈബർ സെൽ എസ്ഐ പ്രമോദ് ദീപികയോടു പറഞ്ഞു.

ചൂടുവെള്ളത്തിൽ ചെറുനാരങ്ങാനീരു കലക്കി രാവിലെ ആഹാരത്തിനു മുന്പ് പതിവായി കഴിച്ചാൽ അതു കീമോതെറാപ്പി ചെയ്യുന്നതിനേക്കാൾ ആയിരം മടങ്ങ് ഫലപ്രദമാണെന്നാണു സമൂഹമാധ്യമങ്ങളിൽ പ്രചരിക്കുന്ന സന്ദേശത്തിലുള്ളത്. പഞ്ചസാര ഒഴിവാക്കിയാൽ കാൻസറിൽനിന്നു രക്ഷനേടാമെന്നും സന്ദേശത്തിലൂടെ പറയുന്നുണ്ട്. ഡോ. വി.പി. ഗംഗാധരന്‍റെ പേരും ചിത്രവും സഹിതമാണ് സന്ദേശം പ്രചരിച്ചുകൊണ്ടിരിക്കുന്നത്. തന്‍റെ അറിവോടെയല്ല സന്ദേശം പ്രചരിക്കുന്നതെന്നും ഇതു കാൻസർ ചികിത്സയെക്കുറിച്ച് സമൂഹത്തിൽ തെറ്റിദ്ധാരണ പരത്താൻ ഇടയാക്കുമെന്നും ചൂണ്ടിക്കാട്ടിയാണു ഡോ. വി.പി. ഗംഗാധരൻ പരാതി നൽകിയിരിക്കുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.