ഉസ്ബെക് സ്വദേശിനിക്കു ഗൂഗിൾ ട്രാൻസ്ലേറ്റർ തുണയായി

Thursday, May 24, 2018 10:07 AM IST

മുട്ടുമാറ്റിവയ്ക്കൽ ശസ്ത്രക്രിയയ്ക്കു വിധേയയാകുന്നതിനായാണു ഗവ് കാജറോണ്‍ എന്ന അന്പത്തെട്ടുകാരി സ്വദേശമായ ഉസ്ബെക്കിസ്ഥാനിൽനിന്ന് ഇന്ത്യയിലെത്തുന്നത്. അസ്ഥിരോഗ ചികിത്സകൾക്കു പേരുകേട്ട ഹൈദരാബാദിലെ ഉദൈ ഒമ്നി ആശുപത്രിയിലാണ് ഇവർ ചികിത്സ തേടിയത്.

എന്നാൽ തന്‍റെ മാതൃഭാഷയായ ഉസ്ബെക്ക് ഒഴികെ മറ്റൊരു ഭാഷയും വശമില്ലാത്ത ഗവ് കാജറോണിന് താൻ ആശുപത്രിയിലെത്തിയത് എന്തിനാണെന്ന് അറിയിക്കാൻപോലും സാധിച്ചിരുന്നില്ല. ഒടുവിൽ ആശുപത്രിയിലെ ഡോക്ടർമാർ ഗൂഗിൾ ട്രാൻസലേറ്ററിന്‍റെ സേവനം കാജറോണിനു ലഭ്യമാക്കിയതോടെയാണ് പ്രശ്നം പരിഹരിച്ചത്.

മെഡിക്കൽ റിക്കാർഡുകളൊന്നും കൈവശം കരുതാതിരുന്ന കാജറോണിന് ഗുരുതര കരൾ രോഗമുണ്ടെന്നുള്ളതിന്‍റെ സൂചന ലഭിച്ചതുപോലും ഗൂഗിൾ ട്രാൻസലേറ്റർ ഉപയോഗിച്ചുള്ള സംസാരത്തിലൂടെയായിരുന്നെന്ന് ഡോക്ടർമാർ പറഞ്ഞു. കരൾരോഗമുണ്ടെന്നുളള വിവരം അറിയാതെ മുട്ടുമാറ്റിവയ്ക്കൽ നടത്തിയിരുന്നെങ്കിൽ രോഗിയുടെ ജീവൻ പോലും അപകടത്തിലായേനെയെന്നും ഉദൈ ഒമ്നി ആശുപത്രിയിലെ ഡോക്ടർമാർ അറിയിച്ചു.

എന്തായാലും മുട്ടുമാറ്റിവയ്ക്കൽ ശസ്ത്രക്രിയയ്ക്കു ശേഷം ആശുപത്രിയിൽ വിശ്രമത്തിലാണു ഗവ് കാജറോണിപ്പോൾ. രണ്ടാഴ്ചക്കുശേഷം ഗവ് കാജറോണിന് സ്വദേശത്തേക്കു മടങ്ങാൻ കഴിയുമെന്നാണു ഡോക്ടർമാർ അറിയിച്ചിരിക്കുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.