വിമാനത്തിൽ പറക്കാനായി അപ്രതീക്ഷിത അതിഥി; ഒടുവിൽ ഫ്ളൈറ്റ് റദ്ദാക്കി
മസ്കറ്റിൽ ജീവിച്ച് മടുത്തത് കൊണ്ടാവും ഈ പാമ്പിന് ദുബായിലേക്ക് പറക്കാൻ തോന്നിയത്. പക്ഷെ ടിക്കറ്റ് ഒന്നും എടുക്കാതെ ചക്കാത്തിൽ രാജ്യം വിടാനുള്ള പാമ്പിന്റെ പദ്ധതിയൊന്നും വിജയിച്ചില്ലെന്നു മാത്രമല്ല പാമ്പിനെ പേടിച്ച് അധികൃതർ ഫ്ളൈറ്റ് അങ്ങു റദ്ദാക്കുകയും ചെയ്തു.

മസ്കറ്റിൽ നിന്ന് ദുബായിലേക്കുള്ള ഇകെ 0863 എമിറേറ്റ്സ് വിമാനത്തിലാണ് പാമ്പിനെ കണ്ടെത്തിയത്. വിമാനത്തിനുള്ളിലെ കാർഗോ യൂണിറ്റിനുള്ളിലായി ’ഒളിച്ചിരുന്ന’ പാമ്പിനെ ക്ലീനിംഗ് ജീവനക്കാരാണ് കാണുന്നത്. എന്നാൽ അപ്പോൾ തന്നെ പാമ്പിനെ പൂട്ടാൻ സാധിക്കാത്തത് കൊണ്ട് ഫ്ളൈറ്റ് റദ്ദാക്കി തിരച്ചിൽ നടത്തിയാണ് പിടികൂടിയത്.

കഴിഞ്ഞ നവംബറിൽ, ഒരു മെക്സിക്കൻ വിമാനത്തിലെ സീലിംഗിൽ നിന്ന് യാത്രക്കാരുടെ ഇടയിലേക്ക് നൂഴ്ന്നിറങ്ങിയ പാമ്പിന്റെ വീഡിയോ ദൃശ്യങ്ങൾ സമൂഹ മാധ്യമങ്ങളിൽ വൈറലായിരുന്നു. മസ്കറ്റ് വിമാനത്താവളത്തിലെ അതീവ സുരാക്ഷാ സംവിധാനങ്ങൾ മറികടന്ന് പാമ്പ് വിമാനത്തിനുള്ളിൽ എങ്ങനെയെത്തി എന്നു തുടങ്ങിയ ചോദ്യങ്ങളുമായി ’ഈ പാമ്പ്’ വിഷയവും സമൂഹമാധ്യമങ്ങളിൽ നിറയുകയാണ്.