രക്‌തസ്രാവം നിർത്താൻ ജെൽ!.
രക്‌തം കണ്ടാൽ ചിലർക്കു തലകറങ്ങും. ചില മുറിവുകളിൽനിന്ന് അമിത രക്‌തസ്രാവം ഉണ്ടായേക്കാം. പ്രശ്നങ്ങൾ അനവധിയാണ്. ഇവയ്ക്കെല്ലാം കൂടി ഒരു പരിഹാരവുമായാണ് ജോ ലാണ്ടോലിന എത്തുന്നത്. 22 വയസാണു കക്ഷിയുടെ പ്രായം. പക്ഷേ, തല വേറെ ലെവലാ. കക്ഷി ഒരു ജെൽ കണ്ടുപിടിച്ചു വെറ്റിജെൽ. തലമുടി സ്പൈക്ക് ആക്കാനുള്ള ജെല്ലല്ല. പിന്നെയോ ഇവനെ മുറിവിൽ പുരട്ടിയാൽ പിന്നെ വെറും 12 സെക്കൻഡ്, രക്‌തസ്രാവം നിലയ്ക്കും.

സംഭവം ഇത്തിരി തമാശയാണെങ്കിലും ഈ ജെല്ലിന്റെ പ്രത്യേകത കണ്ടില്ലാന്നു നടിക്കാൻ കഴിയില്ല. പിന്നെ ജോ ചെറിയ പുള്ളിയൊന്നുമല്ല. സുനെറിസ് എന്ന ബയോടെക്ക് കമ്പനിയുടെ സ്‌ഥാപക സിഇഒയാണ്. വെറ്റിജെൽ നിർമിക്കുന്നതും ജോയുടെ കമ്പനി തന്നെ. ഉടൻ തന്നെ ജോയും കൂട്ടരും ജെൽ ലോകത്തിന്റെ വിവിധ ഭാഗങ്ങളിലേക്കു കയറ്റിയയച്ചു തുടങ്ങും.

12 സെക്കൻഡുകൊണ്ട് ഈ ഇന്ദ്രജാലം എങ്ങനെ കാട്ടുന്നുവെന്നു ജോയോട് ആരെങ്കിലും ചോദിച്ചാൽ ജോ പുഞ്ചിരിക്കും. അതു ട്രേഡ് സീക്രട്ടാണ് എന്ന മട്ടിൽ. പിന്നെ പതിയെ പുഞ്ചിരിച്ചുകൊണ്ടു പറയും. സംഭവം സിംപിളാണ്. എന്നാൽ ഭയങ്കര പവർഫുള്ളാണ്.