ഇറാക്കിലെ മലയാളി നഴ്സുമാരുടെ ദുരിതകഥ പറയുന്ന മഹേഷ് നാരായണൻ ചിത്രം ടേക്ക് ഓഫിന് ആശംസയുമായി മുൻ മുഖ്യമന്ത്രി ഉമ്മൻ ചാണ്ടി. യുഡിഎഫ് സർക്കാരിന്‍റെ കാലത്തു നേരിട്ട ഏറ്റവും വലിയ വെല്ലുവിളി വെള്ളിത്തിരയിലേക്കു പകർത്തുന്പോൾ വൻ വിജയമാകുമെന്നു പ്രതീക്ഷിക്കുന്നതായി ഉമ്മൻ ചാണ്ടി ഫേസ്ബുക്കിൽ കുറിച്ചു.
ഇറാക്കിലെ ഭീകരാക്രമണങ്ങളുടെ മധ്യത്തിൽനിന്നു മലയാളി നഴ്സുമാരെ സുരക്ഷിതമായി നാട്ടിൽ എത്തിക്കുക എന്നത് കഴിഞ്ഞ യുഡിഎഫ് സർക്കാരിന്‍റെ ഏറ്റവും വലിയ വെല്ലുവിളികളിൽ ഒന്നായിരുന്നു. എന്തും ചെയ്യുവാൻ മടിക്കാത്ത ഭീകരിൽ നിന്നും മലയാളി നഴ്സുമാരെ ഒരു പോറൽ പോലും ഏൽക്കാതെ നാട്ടിൽ എത്തിച്ചപ്പോൾ മാത്രമാണ് എല്ലാവർക്കും ആശ്വാസമായത്. 34 മലയാളി നഴ്സുമാരെയും കൊണ്ട് കേന്ദ്രസർക്കാരിന്‍റെ പ്രത്യേക വിമാനം നെടുന്പാശേരി വിമാനത്താവളത്തിൽ ലാൻഡ് ചെയ്തപ്പോഴാണ് ഏതാനും ദിവസങ്ങൾ മുൾമുനയിൽ നിന്ന മലയാളികൾക്കു സമാധാനമായത്. ഈ സംഭവം ചിത്രീകരിക്കുന്ന ’ടേക്ക് ഓഫ്’ സിനിമ, ഭീകരതയ്ക്കെതിരേ മനുഷ്യസ്നേഹത്തിന്‍റെയും സമാധാനത്തിന്‍റെയും സന്ദേശമാകുമെന്നു പ്രതീക്ഷിക്കുന്നു ഉമ്മൻ ചാണ്ടി ഫേസ്ബുക്കിൽ കുറിച്ചു. ചിത്രത്തിന്‍റെ ട്രെയിലറും അദ്ദേഹം പോസ്റ്റ് ചെയ്തിട്ടുണ്ട്.
ഇറാക്കിലെ മലയാളി നഴ്സുമാരുടെ ദുരിതകഥ പറയുന്ന ടേക്ക് ഓഫ് 24നാണ് റിലീസ് ചെയ്യുന്നത്. ഇറാക്കിലെ ആശുപത്രികളിലെ മലയാളി നഴ്സുമാരുടെ ജീവിതവും ഭീകരരുടെ തേർവാഴ്ചയുമാണ് ചിത്രത്തിൽ പരാമർശിക്കുന്നത്. കുഞ്ചാക്കോ ബോബൻ, ഫഹദ് ഫാസിൽ, പാർവതി എന്നിവർ ചിത്രത്തിൽ മുഖ്യകഥാപാത്രങ്ങളെ അവതരിപ്പിക്കുന്നു.
ആന്‍റോ ജോസഫ് ഫിലിം കന്പനിയുടെയും രാജേഷ് പിള്ള ഫിലിംസിന്‍റെയും ബാനറിൽ ആന്‍റോ ജോസഫും ഷെബിൻ ബക്കറും ചേർന്നാണ് ചിത്രം നിർമിക്കുന്നത്. എറണാകുളം, ദുബായ്, ബാഗ്ദാദ് എന്നിവിടങ്ങളായിരുന്നു പ്രധാന ലൊക്കേഷനുകൾ. ഇത് ആദ്യമായാണ് ഒരു മലയാള സിനിമ ബാഗ്ദാദിൽ ചിത്രീകരിക്കുന്നത്.
ഉമ്മൻ ചാണ്ടിയുടെ ഫേസ്ബുക്ക് പോസ്റ്റ്:
|