ഇനി കൂളായി ബസ് കാത്തുനിൽക്കാം!

Wednesday, May 17, 2017 3:19 AM IST

ചുട്ടു പൊള്ളുന്ന വെയിലിൽ ഇനി കാത്തു നിന്നു ചൂടാകേണ്ട. കൂളായി ബസ് കാത്തു നിൽക്കാൻ ഡൽഹിയിൽ എയർ കണ്ടീഷൻ ചെയ്ത് ബസ് സ്റ്റോപ്പ് ഒരുങ്ങി. ഡൽഹിയിലെ ലജ്പത് നഗറിലാണ് ഇന്ത്യയിലെ ആദ്യത്തെ എസി ബസ് സ്റ്റോപ്പ്. ഡൽഹി സർക്കാരും സിഎസ്ആറും എസി കന്പനിയായ ദൈകിൻ ഇന്ത്യയും ചേർന്നാണ് ലജ്പത്നഗർ റിംഗ് റോഡിലെ ബസ് സ്റ്റോപ്പ് പൂർണമായും ശീതീകരിച്ചത്.

ബസ് സ്റ്റോപ്പിനു ചുറ്റും സുതാര്യമായ പോളിത്തീൻ ഷീറ്റിട്ടാണ് എസി വച്ചിരിക്കുന്നത്. വലിയ ജനറേറ്ററുകൾ ഉപയോഗിച്ചാണ് രണ്ട് ടവർ എസികൾ പ്രവർത്തിപ്പിക്കുന്നത്. പകൽ സമയം മാത്രമേ എസി പ്രവർത്തിപ്പിക്കൂ. ഇന്നലെ ഡീസൽ തീർന്നതു കാരണം വൈകുന്നേരം അഞ്ചു മണിയോടെ എസിയുടെ പ്രവർത്തനം നിലച്ചു.

ഈ ദിവസങ്ങളിൽ 45 ഡിഗ്രിക്കും മുകളിലാണ് ഡൽഹിയിലെ താപനില. വരും ദിവസങ്ങളിൽ ചൂട് ഇതിലും കൂടും. ഡൽഹിയിൽ എസി ബസുകൾ സർവീസ് നടത്തുന്നുണ്ടെങ്കിലും എസി ബസ് സ്റ്റോപ്പ് എന്ന ആശയം തികച്ചും നൂതനമാണ്.

മേയ് 13നാണ് ലജ്പത് നഗറിലെ ബസ് സ്റ്റോപ്പ് എയർ കണ്ടീഷനാക്കിയത്. പരീക്ഷണാടിസ്ഥാനത്തിൽ തുടങ്ങിയ ശീതീകരണ നടപടികൾ ഡൽഹിയിൽ വ്യാപിപ്പിക്കാനുള്ള പദ്ധതിയും ആലോചനയിലുണ്ട്. കടുത്ത അന്തരീക്ഷ മലിനീകരണം നേരിടുന്ന ഡൽഹിയിൽ നേരത്തേ എയർ പ്യൂരിഫൈഡ് ബസ്റ്റോപ്പ് വോഡഫോണിന്‍റെ പങ്കാളിത്തത്തോടെ സ്ഥാപിച്ചിരുന്നു.

ഡൽഹിയിലെ വിവിധ സ്ഥലങ്ങളിൽ ബസ് സ്റ്റോപ്പുകൾ എയർ കണ്ടീഷൻ ആക്കാനുള്ള പദ്ധതിയുണ്ടെന്ന് ദൈകിൻ ഇന്ത്യ മാർക്കറ്റിംഗ് മാനേജർ അനുജ് മംഗള പറഞ്ഞു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.