മലവെള്ളപ്പാച്ചിലിൽ കുടുങ്ങിയ യുവാവിനെയും വളർത്തുനായയെയും രക്ഷിച്ച് ഫയർഫോഴ്സ്

ദുരന്തമേഖലകളിൽ കുടുങ്ങിക്കിടക്കുന്നവരെ അതിസാഹസികമായി രക്ഷപെടുത്തുന്ന സംഭവങ്ങൾ നമുക്ക് ചുറ്റും നിരന്തരം സംഭവിച്ചുകൊണ്ടിരിക്കുന്നതാണ്. മാത്രമല്ല ജീവനുള്ള എന്തിനെയും അപകടങ്ങളിൽ നിന്നും രക്ഷപെടുത്തുക എന്നുള്ളത് മനുഷ്യനുൾപ്പെടെയുള്ള ഓരോരുത്തരുടെയും കടമയുമാണ്. അതിനുള്ള ഏറ്റവും വലിയ ഉദാഹരണമാണ് അതിശക്തമായ പ്രളയത്തിൽ കാറിനുള്ളിൽ കുടുങ്ങിയ ഒരാളെയും അദ്ദേഹത്തിന്‍റെ വളർത്തുനായയെയും സാഹസികമായി രക്ഷിക്കുന്ന ദൃശ്യങ്ങൾ.

അമേരിക്കയിലെ കൊളറാഡോ സ്വദേശിയായ ഡേവിഡ് റൂക്ക്സ് എന്നയാളാണ് മരണത്തിന്‍റെ മുന്പിൽ നിന്നും സാഹസികമായി രക്ഷപെട്ടത്. തന്‍റെ വാഹനത്തിന്‍റെ സമീപം അദ്ദേഹം നിൽക്കുന്പോൾ സമീപത്തേക്ക് വെള്ളം ഇരച്ചു കയറുന്നത് അദ്ദേഹത്തിന്‍റെ ശ്രദ്ധയിൽപെടുകയായിരുന്നു. ഉടൻ തന്നെ തന്‍റെ വളർത്തുനായയെയും കൈയിൽ എടുത്തുകൊണ്ട് വാഹനത്തിനുള്ളിലേക്ക് അദ്ദേഹം ചാടിക്കയറി. പെട്ടെന്ന് തന്നെ കാറിനെ മൂടാൻ തക്ക വിധത്തിൽ അതിശക്തമായ ഒഴുക്കോടെ അവിടം മുഴുവൻ വെള്ളമാകുകയായിരുന്നു. മാത്രമല്ല രക്ഷപെടാൻ പറ്റാത്ത തക്ക വിധത്തിൽ അദ്ദേഹം കാറിനുള്ളിൽ കുടുങ്ങിപ്പോകുകയും ചെയ്യ്തു.

ഈ സമയം ഇവിടെയുണ്ടായിരുന്ന ഒരു സമീപവാസി ഉടൻ തന്നെ ഫയർഫോഴ്സിൽ വിവരമറിയിക്കുകയായിരുന്നു. ഫയർഫോഴ്സ് ഉദ്യോഗസ്ഥർ എത്തുന്പോൾ കാർ ഒരു മരക്കുറ്റിയിൽ ഇടിച്ച് നിൽക്കുകയായിരുന്നു. ഉടൻ തന്നെ ഫയർഫോഴ്സ് ഉദ്യോഗസ്ഥർ കരയിൽ നിന്നും കാറിനു സമീപത്തേക്ക് ലാഡർ നീട്ടുന്പോൾ ഡേവിഡ് തന്‍റെ വളർത്തുനായയെ ഫയർഫോഴ്സ് ഉദ്യോഗസ്ഥരുടെ കൈകളിലേക്ക് നൽകി. അതിനു ശേഷമാണ് അദ്ദേഹം കാറിനുള്ളിൽ നിന്നും പുറത്തേക്കു വരുന്നത്. ഇരുവരെയും എടുത്തുകൊണ്ട് ലാഡർ അന്തരീക്ഷത്തിലേക്ക് ഉയരുന്നതും വീഡിയോയിൽ കാണാം. ഒരു മണിക്കൂർ നീണ്ട പരിശ്രമത്തിനു ശേഷമാണ് ഇവർ ദൗത്യം പൂർത്തിയാക്കിയത്.

സമീപം നിന്ന ഒരാൾ പകർത്തിയ 12 മിനിട്ട് ദൈർഘ്യമുള്ള ദൃശ്യങ്ങൾ ഫേസ്ബുക്കിൽ പോസ്റ്റ് ചെയ്തതിനെ തുടർന്ന് വൈറലാകുകയായുരുന്നു. അവിശ്വസനീയമായ ഈ ദൃശ്യങ്ങൾക്ക് പ്രതികരണവുമായി നിരവധിയാളുകളാണ് രംഗത്തെത്തിയിരിക്കുന്നത്.