മലയാളി സന്തോഷവാനല്ലെന്ന് മോഹൻലാൽ; മനസിലായത് ഭൂട്ടാനിലെത്തിയപ്പോൾ

Monday, August 21, 2017 3:45 AM IST

ലോകത്ത് സന്തോഷത്തിനു മാത്രമായ ഒരു ദേശം ഇപ്പോൾ ഉണ്ടോ..? ചോദിക്കുന്നത് ലാലേട്ടനാണ്. അങ്ങനെയൊരു ദേശമുണ്ടെന്നും അവിടെയാണ് താനെന്നും കൂടി അദ്ദേഹം പറയുന്നു. ഹിമാലയ രാജ്യമായ ഭൂട്ടാനാണ് ആ ദേശം. ഭൂട്ടാനിൽ അവധി ചെലവഴിക്കുന്ന താരം ബ്ലോഗിലൂടെയാണ് തന്‍റെ ചിന്തകൾ പങ്കുവയ്ക്കുന്നത്.

മറ്റു രാജ്യങ്ങളെല്ലാം മൊത്തം ആഭ്യന്തര ഉത്പാദനം തങ്ങളുടെ ദേശത്തിന്‍റെ പുരോഗതിയുടെ അടയാളമായി കണക്കാക്കുന്പോൾ ഭൂട്ടാൻ സ്വന്തം ദേശത്തിന്‍റെ ആനന്ദത്തെയാണ് പുരോഗതിയായി കാണുന്നത്. ലോകം ദുഃഖമാണെന്ന് പറഞ്ഞ ബുദ്ധനെ ആരാധിക്കുന്ന ഒരു ദേശം മുൻഗണന നല്കുന്നത് സന്തോഷത്തിനാണെന്നും മോഹൻലാൽ പറയുന്നു.

ഭൂട്ടാൻ അവരുടെ ജീവിതത്തിൽ ആനന്ദവും സന്തോഷവും നിലനിർത്തുന്നതും അതിനെ ദേശത്തിന്‍റെ അഭിമാനത്തിന്‍റെ മാനകമായി ഉയർത്തിക്കാണിക്കുന്നതും മനസിലാക്കാനാണ് താൻ അവിടെയെത്തിയത്. എന്തുകൊണ്ടാണ് ഇവർ സന്തോഷവാന്മാരായിരിക്കുന്നതെന്നും ഓണത്തിന്‍റെ ദേശമായ നാം സന്തോഷത്തിൽ നിന്നും ഏറെ അകലെയായിരിക്കുന്നത് എന്തുകൊണ്ടാണെന്നും തനിക്കു മനസിലായെന്നും മോഹൻലാൽ പറയുന്നു. അടുത്ത ബ്ലോഗിൽ അത് വായനക്കാർക്കായി പങ്കുവയ്ക്കാമെന്ന ഉറപ്പോടെയാണ് താരം ബ്ലോഗ് അവസാനിപ്പിക്കുന്നത്.

വി.എ.ശ്രീകുമാര്‍ മേനോന്‍ സംവിധാനം ചെയ്യുന്ന 'ഒടിയന്‍റെ' ചിത്രീകരണം വാരണാസിയില്‍ തുടങ്ങും മുന്‍പേ ഒരാഴ്ചത്തെ വിശ്രമത്തിനായാണ് മോഹൻലാൽ ഭൂട്ടാനിൽ എത്തിയത്. ഈ മാസം 27ന് ഒടിയന്‍റെ ചിത്രീകരണത്തിനായി അദ്ദേഹം വാരണാസിയിലേക്ക് പറക്കും.

മോഹൻലാലിന്‍റെ ബ്ലോഗ്:

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.