ഇന്ത്യയിലെ നായ്ക്കൾക്കും ഇനി ലക്ഷ്വറി ഹോട്ടൽ

Saturday, December 9, 2017 11:10 PM IST

നായ്ക്കൾക്കായുള്ള ആദ്യ ലക്ഷ്വറി ഹോട്ടൽ ഇന്ത്യയിൽ പ്രവർത്തനമാരംഭിച്ചു. ഗുഡ്ഗാവിലാണ് ഉടമകൾക്ക് തങ്ങളുടെ വളർത്തുനായ്ക്കളെ സംരക്ഷിക്കാനുള്ള ഹോട്ടൽ തുടങ്ങിയത്. നായ്ക്കൾക്കുള്ള ഹോസ്റ്റൽ സൗകര്യമാണ് ഇവിടത്തെ പ്രധാന ആകർഷണം. നായ്ക്കൾക്കായി ദക്ഷിണേഷ്യയിലെ ആദ്യ ലക്ഷ്വറി ഹോട്ടൽ എന്ന ഖ്യാതിയുമായി പ്രവർത്തനമാരംഭിച്ച ഇവിടെ ഒരു ദിവസത്തെ സംരക്ഷണത്തിന് 70 ഡോളറാണ് (4,500 രൂപ) നല്കേണ്ടത്. ശ്വാനന്മാർക്ക് വെൽവെറ്റ് ബെഡുകൾ, സ്പാ പരിചരണം, 24 മണിക്കൂറും വെറ്ററിനറി ഡോക്ടറുടെ ശ്രദ്ധ എന്നിവയുണ്ട്. ബെൽജിയത്തിൽനിന്ന് പ്രത്യേകം ഇറക്കുമതി ചെയ്ത ആൽക്കഹോളില്ലാത്ത ബിയറും ശ്വാനവീരന്മാർക്കു ലഭിക്കും.ഇതുകൂടാതെ നായ്ക്കൾക്കായി നീന്തൽക്കുളം, എണ്ണ ഉപയോഗിച്ച് ആയുർവേദ തിരുമ്മുചികിത്സ തുടങ്ങിയവയുമുണ്ട്.

നല്ലൊരു നായപ്രേമിയായ ഉടമ ഒരിക്കലും തന്‍റെ നായയെ ഒരു സാധാരണ ഹോസ്റ്റൽ സംവിധാനമുള്ളിടത്ത് കൊണ്ടുപോയി പാർപ്പിക്കാൻ ഇഷ്ടപ്പെടില്ല. അതുകൊണ്ടുതന്നെയാണ് ഇന്ത്യയിൽ ഇത്തരത്തിലൊരു സ്ഥാപനം തുടങ്ങാൻ തന്നെ പ്രേരിപ്പിച്ചതെന്ന് പെറ്റ് ഹോട്ടൽ ഉടമയും സിഇഒയുമായ ദീപക് ചൗള പറയുന്നു. ഇന്ത്യയിലെ വർധിച്ചുവരുന്ന മൃഗസ്നേഹികളുടെ എണ്ണമാണ് ഇത്തരത്തിലൊരു തീരുമാനത്തിനു പിന്നിൽ.

2002ലെ കണക്കനുസരിച്ച് 20 ലക്ഷം നായ്ക്കളായിരുന്നു വീടുകളിൽ വളർത്തിയിരുന്നതെങ്കിൽ 2016ൽ അത് 1.5 കോടിയായി ഉയർന്നിട്ടുണ്ട്. 2021 ആകുന്പോഴേക്കും ഇത് 2.6 കോടിയായി ഉയരുമെന്നാണു റിപ്പോർട്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.