അനുഷ്ക ഇനി കോഹ്‌ലിക്കു സ്വന്തം; വിവാഹം ഇറ്റലിയിൽ

Monday, December 11, 2017 8:40 AM IST

അഭ്യൂഹങ്ങൾക്കൊടുവിൽ ഇന്ത്യൻ ക്രിക്കറ്റ് ടീം നായകൻ വിരാട് കോഹ്ലി ബോളിവുഡ് നടി അനുഷ്ക ശർമയുടെ കഴുത്തിൽ മിന്നുചാർത്തി. ഇറ്റലിയിലെ മിലാനിൽ തിങ്കളാഴ്ച രാവിലെയാണ് വിവാഹചടങ്ങുകൾ നടന്നതെന്ന് ദേശീയമാധ്യമങ്ങൾ റിപ്പോർട്ട് ചെയ്യുന്നു. ബന്ധുക്കളും അടുത്ത സുഹൃത്തുക്കളും മാത്രമാണ് ചടങ്ങിൽ പങ്കെടുത്തത്.

ഇറ്റലിയിലെ ടസ്കനിയിൽ ഏക്കറുകളോളം വരുന്ന എസ്റ്റേറ്റിൽ ഇതിനുള്ള തയാറെടുപ്പുകൾ തകൃതിയായി നടക്കുന്നതായി നേരത്തെ റിപ്പോർട്ടുകൾ പുറത്തുവന്നിരുന്നു. എസ്റ്റേറ്റും അതിലുള്ള ഹോട്ടലും പൂർണമായും കോഹ്ലിയും കൂട്ടരും ബുക്ക് ചെയ്തിട്ടുണ്ടായിരുന്നു. കനത്ത സുരക്ഷയാണ് വിവാഹവേദിക്ക് ഏർപ്പെടുത്തിയിരുന്നത്.

വളരെ അടുത്ത ബന്ധുക്കളെയും സുഹൃത്തുക്കളെയും മാത്രമേ വിവാഹത്തിനു ക്ഷണിച്ചിരുന്നുള്ളൂ. ക്രിക്കറ്റ് ലോകത്തുനിന്ന് സച്ചിൻ തെണ്ടുൽക്കർക്കും യുവ്രാജ് സിംഗിനും മാത്രമാണ് ക്ഷണമുണ്ടായിരുന്നത്. വിരാടിന്‍റെ കൂടെ കളിക്കുന്ന ആരെയും വിവാഹത്തിനു ക്ഷണിച്ചിട്ടില്ല. ബോളിവുഡിൽനിന്ന് വളരെ കുറച്ചുപേർ മാത്രമാണ് വിവാഹത്തിൽ പങ്കെടുത്തത്.

വെള്ളിയാഴ്ച പുലർച്ചെ അനുഷ്കയെയും കുടുംബാംഗങ്ങളെയും മുംബൈ രാജ്യാന്തര വിമാനത്താവളത്തിൽ കണ്ടതുമുതലാണ് ഈ വാർത്ത ചുഴലിക്കാറ്റുപോലെ ആഞ്ഞടിച്ചത്. കോഹ്ലിയും അനുഷ്കയും ഇറ്റലിയിലെത്തിയിരുന്നു. മുന്തിരിത്തോട്ടങ്ങളും പഴയകൊട്ടാരങ്ങളും നിറഞ്ഞ ടസ്കനിയിലെ ഒരു വലിയ വില്ലയിലാണ് ഇരുവരും തങ്ങുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.