തെറ്റാണെങ്കിലും സമ്മതിക്കില്ല..! രാജസ്ഥാനിലെ പത്താം ക്ലാസ് ചോദ്യപേപ്പറിൽ കൂട്ട അക്ഷരത്തെറ്റ്

ജയ്പുരിലെ പത്താം ക്ലാസ് കുട്ടികളുടെ ഡിസ്ട്രിക്ട് ലെവൽ പരീക്ഷയൊക്കെ വേറെ ലെവലാണ്. ചോദ്യപേപ്പർ കൈയിൽ കിട്ടുന്നവർ ആദ്യം ഒന്നു ഞെട്ടും, കുറച്ചു നേരം ചിന്തിക്കും, പിന്നെ കുറച്ചു നേരം ചിരിക്കും. എന്നിട്ടേ പരീക്ഷയെഴുതി തുടങ്ങാനാകൂ. അക്ഷരപ്പിശകും മണ്ടത്തരങ്ങളും കൊണ്ട് ഈ ചോദ്യക്കടലാസ്, കുട്ടികൾക്കു മുന്നിൽ ഒരു വലിയ ചോദ്യചിഹ്നമായി ഉയർന്നു നിൽക്കുന്നു.

ഇംഗ്ലീഷ് പരീക്ഷയുടെ ചോദ്യപേപ്പറിൽ, പ്രധാനമന്ത്രി നരേന്ദ്രമോദിയുടെ ജീവിതരേഖയെ അടിസ്ഥാനമാക്കിയുള്ള ചോദ്യങ്ങളാണ് ആകെ വിനയായിരിക്കുന്നത്. ജനപ്രീതിയുള്ള നേതാവ് എന്നു സൂചിപ്പിക്കാനായി ഉപയോഗിക്കാറുള്ള ’ക്രൗഡ് പുള്ളർ’ എന്ന വാക്ക് ചോദ്യപേപ്പറിൽ croad puller എന്നാണ്. അങ്ങനെയൊരു വാക്ക് ഒരു നിഘണ്ടുവിലും ഇതുവരെയില്ല. മോദി ഒരു മികച്ച പ്രഭാഷകനാണെന്നു സൂചിപ്പിക്കാൻ ’സ്പോക്കർ’ എന്നാണ് ഉപയോഗിച്ചിരിക്കുന്നത്. ’സ്പീക്കർ’ എന്നാണു വേണ്ടിയിരുന്നത്. lotus ആകട്ടെ lotoaus ആയി മാറി. Deliberately രൂപാന്തരം പ്രാപിച്ച് delibrately ആയി. വയലൻസ് എഴുതിയിരിക്കുന്നത് voilence എന്നാണ്. പ്രധാനമന്ത്രിയുടെ സ്വന്തം സംസ്ഥാനത്തിന്‍റെ പേരു പോലും ശരിയായി എഴുതാൻ കഴിഞ്ഞില്ല എന്നതാണ് ഏറെ രസകരം. Gujarat, gujarati എന്നീ പദങ്ങൾ gujrat, gujrati എന്നിങ്ങനെയാണ് പ്രയോഗിച്ചിരിക്കുന്നത്.

ജയ്പുർ ജില്ലാ വിദ്യാഭ്യാസ ഓഫീസർ രാം രത്തനോട് വിശദീകരണം ചോദിച്ചാൽ ഇതൊക്കെ പതിവല്ലേ എന്ന ഉത്തരമാണു കിട്ടുക. രാജസ്ഥാൻ പബ്ലിക് സർവീസ് കമ്മീഷൻ (ആര്‌പിഎസ്‌സി), രാജസ്ഥാൻ ബോർഡ് ഓഫ് സെക്കൻഡറി എഡ്യുക്കേഷൻ (ആർബിഎസ്ഇ), മറ്റ് പരീക്ഷാ ബോഡികൾ എന്നിവരും തെറ്റുകൾ വരുത്തുന്നില്ലേ എന്നൊരു മറുചോദ്യവും. ഇതൊരു ജില്ലാതല വിഭാഗം മാത്രമാണ്. ഇവിടെ ഇതൊന്നും ഒരു തെറ്റേയല്ല എന്ന് രത്തൻ സ്വയം ന്യായീകരിക്കുന്നു.