ഇസ്രയേലിന്‍റെ ചാന്ദ്രദൗത്യം ഡിസംബറിൽ ആരംഭിക്കും

Friday, July 13, 2018 9:41 AM IST

ഇസ്രയേലിന്‍റെ ആദ്യ ചാന്ദ്രദൗത്യം ഡിസംബറിൽ ആരംഭിക്കുമെന്ന് ഇസ്രേലി സംഘടനയായ സ്പേസ് ഐഎൽ അറിയിച്ചു. ഡിസംബറിൽ വിക്ഷേപിക്കുന്ന പേടകത്തിന് 585 കിലോഗ്രാം ഭാരമാണുണ്ടാകുക. സാഹചര്യങ്ങൾ അനുകൂലമായാൽ പേടകം 2019 ഫെബ്രുവരി 13ന് ചന്ദ്രോപരിതലത്തിൽ ഇറങ്ങും.

അമേരിക്കൻ സംരംഭകനായ എലോൺ മസ്കിന്‍റെ സ്പേസ് എക്സ് ആണ് ഈ ഉദ്യമത്തിൽ ഇസ്രയേലിനെ സഹായിക്കുക. ചന്ദ്രന്‍റെ കാന്തികമണ്ഡലത്തെക്കുറിച്ചുള്ള പഠനമാണ് പേടകം നടത്തുക. ചന്ദ്രനെക്കുറിച്ചു പഠിക്കുന്നതിനു മുന്പേ പേടകം ഇസ്രയേൽ പതാക ചന്ദ്രോപരിതലത്തിൽ ഉറപ്പിക്കുമെന്ന് സ്പേസ് ഐഎൽ അറിയിച്ചു.

ഗൂഗിൾ ലൂണാർ എക്സ്പ്രൈസ് പദ്ധതിയുടെ കീഴിലാണ് ഈ സ്പേസ് ഐഎൽ ചന്ദ്രദൗത്യത്തിന് തയാറെടുത്തത്. ശാസ്ത്രജ്ഞരെയും സംരംഭകരെയും പ്രോത്സാഹിപ്പിക്കുന്നതിനായി ഏർപ്പെടുത്തിയ പദ്ധതിയാണ് ഗൂഗിൽ ലൂണാർ എക്സ്പ്രൈസ്. ചന്ദ്രദൗത്യങ്ങൾക്കായി മൂന്നു കോടി ഡോളറാണ് പദ്ധതിയിലൂടെ നല്കുക.

ചന്ദ്രദൗത്യം നടത്താൻ ഗൂഗിൾ അനുവദിച്ചിരുന്ന കാലാവധി മാർച്ചിൽ അവസാനിച്ചതായിരുന്നു. ഗൂഗിൾ നിർദേശിച്ച സമയത്തിനുള്ളിൽ ഒരു സംഘടനയ്ക്കും ചന്ദ്രദൗത്യം നടത്താൻ സാധിച്ചില്ല. പ്രത്യേക അപേക്ഷപ്രകാരമാണ് ഇസ്രയേലിന് അവസരം നല്കുന്നത്. 9.5 കോടി രൂപയാണ് സ്പേസ് ഐഎലിന്‍റെ പദ്ധതിക്കു ചെലവാകുക.

ഇതിൽ ഏറിയപങ്കും സംഭാവന ചെയ്യുന്നത് ഇസ്രേലി ശതകോടീശ്വരനായ മോറിസ് കാനാണ്. സ്പേസ് ഐഎൽ എന്ന സ്വകാര്യ സംഘടനയാണ് ഇപ്പോൾ ഉപഗ്രഹം അയയ്ക്കുന്നതെങ്കിലും പദ്ധതി വിജയിച്ചാൽ ഈ സംഘടന ഇസ്രയേൽ എയ്റോസ്പേസ് ഇൻഡസ്ട്രീസിന്‍റെ ഭാഗമാകും.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.