ഖത്തറിനെ പിന്തള്ളി മക്കാവു ലോകത്തിലെ ഏറ്റവും സന്പന്ന സ്ഥലമാകും

Monday, August 13, 2018 5:12 PM IST

ലോകത്തിലെ ഏറ്റവും സന്പന്നസ്ഥലം എന്ന പദവി ഖത്തറിനു നഷ്ടപ്പെടും. 2020 ആകുന്പോഴേക്കും ഖത്തറിനെ പിന്തള്ളി ചൈനീസ് ചൂതാട്ടകേന്ദ്രമായ മക്കാവു ഒന്നാമതെത്തുമെന്നാണ് ഏറ്റവും പുതിയ റിപ്പോർട്ടുകൾ. ആഗോള കാസിനോ ഹബ്ബായ മക്കാവുവിന്‍റെ ആളോഹരി വരുമാനം 2020 ആകുന്പോഴേക്കും 1,43,116 ഡോളറാകുമെന്നാണ് അന്താരാഷ്‌ട്ര നാണ്യനിധി‍യുടെ (ഐഎംഎഫ്) വിലയിരുത്തൽ. മക്കാവു ഒന്നാമതെത്തുന്പോൾ ആളോഹരി വരുമാനം 1,39,151 ഡോളറുമായി ഖത്തർ രണ്ടാം സ്ഥാനത്താകുമെന്നും ഐഎംഎഫ് വിലയിരുത്തുന്നു.

പോർച്ചുഗീസ് അധീനതയിലായിരുന്ന മക്കാവു ചൈനയുടെ പക്കൽ തിരിച്ചെത്തിയതോടെ ചൂതാട്ടകേന്ദ്രമായി മാറുകയായിരുന്നു. രണ്ടു പതിറ്റാണ്ടായി ചൂതാട്ടം നിയമാനുസൃതമാണ്. ചൈനയിൽ കാസിനോകൾക്ക് നിയമസാധുതയുള്ള ഒരേയൊരു കേന്ദ്രം മക്കാവു ആണ്. 2001ൽനിന്ന് മക്കാവുവിന്‍റെ ജിഡിപി മൂന്നു മടങ്ങിലധികമാണ് വർധിച്ചതെന്നും ഐഎംഎഫ് പറയുന്നു.

2023ൽ മക്കാവുവിന്‍റെ ആളോഹരി വരുമാനം 1,72,681 ഡോളറും ഖത്തറിന്‍റേത് 1,58,117 ഡോളറുമാകുമെന്നും ഐഎംഎഫ് കണക്കുകൂട്ടുന്നു. ആഗോള ധനകാര്യകേന്ദ്രമായ സിംഗപ്പൂരിന്‍റെ ആളോഹരി വരുമാനം 1,17,535 ഡോളറും ഹോങ്കോംഗിന്‍റേത് 80,000 ഡോളർ ആകുമെന്നുമാണ് വിലയിരുത്തൽ.

യൂറോപ്യൻ രാജ്യങ്ങളായ ലക്സംബെർഗ്, അയർലൻഡ്, നോർവേ എന്നിവ 2020 ആകുന്പോഴേക്കും ആദ്യ പത്തിൽ ഇടംപിടിക്കുമെന്നാണ് വിലയിരുത്തൽ. യുഎസ് പന്ത്രണ്ടാം സ്ഥാനത്തായിരിക്കുമെന്നും ഐഎംഎഫ് കണക്കുകൂട്ടുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.