എന്നെ നിങ്ങൾ സഹായിക്കണം; ലോകത്തിനു മുന്നിൽ കൈ നീട്ടി മഡോണ

Wednesday, August 1, 2018 9:50 AM IST

സുമനസുകളുടെ മുന്നിൽ കൈ നീട്ടി പ്രശസ്ത പോപ് ഗായിക മഡോണ. ആഫ്രിക്കൻ രാജ്യമായ മലാവിയിലെ സന്നദ്ധപ്രവർത്തനങ്ങൾക്കുവേണ്ടി 60,000 ഡോളർ കണ്ടെത്തുകയാണ് മഡോണയുടെ ശ്രമം. ഇതിനായി കഴിഞ്ഞ ദിവസം ധനശേഖരണ പദ്ധതിക്കു തുടക്കമിടുകയും ചെയ്തു.

തിങ്കളാഴ്ച മഡോണ തന്‍റെ ഫേസ്ബുക്ക് പേജിലൂടെ പ്രഖ്യാപിച്ച പദ്ധതിക്ക് 24 മണിക്കൂറിനുള്ളിൽ 10,000 ഡോളർ സമാഹരിക്കാൻ കഴിഞ്ഞിട്ടുണ്ട്. ലഭിക്കുന്ന തുക പൂർണമായും തന്‍റെ റെയ്സിംഗ് മലാവി ഫൗണ്ടേഷന്‍റെ അനാഥാലയത്തിലെ പ്രവർത്തനങ്ങൾക്കായാണ് വിനിയോഗിക്കുകയെന്ന് മഡോണ പറഞ്ഞു.

അറുപതാം ജന്മദിനം പ്രമാണിച്ചാണ് മഡോണ ധനസമാഹരണ പദ്ധിക്കു തുടക്കംകുറിച്ചത്. ഈ മാസം 16നാണ് ജന്മദിനം. നമ്മുടെ സഹായം ഏറെ ആവശ്യമായവർക്ക് തന്‍റെ ജന്മദിനത്തിൽ നല്കാൻ കഴിയുന്ന നല്ലൊരു സമ്മാനമായിരിക്കും ഇത്. ലഭിക്കുന്ന ഓരോ ഡോളറും ഭക്ഷണം, സ്കൂൾ, യൂണിഫോം, ആരോഗ്യസംരക്ഷണം എന്നിവയ്ക്കുവേണ്ടിയായിരിക്കും വിനിയോഗിക്കുക: മഡോണ കൂട്ടിച്ചേർത്തു. ഇതുവരെ 200ൽപരം പേർ സംഭാവന നല്കിയിട്ടുണ്ടെന്നാണ് റിപ്പോർട്ട്.

2006ലാണ് റെയ്സിംഗ് മലാവി എന്ന സംഘടന മഡോണ ആരംഭിച്ചത്. മലാവിയിലെ പെൺകുട്ടികളുടെ ആരോഗ്യ-വിദ്യാഭ്യാസപ്രവർത്തനങ്ങൾക്കുവേണ്ടിയാണ് സംഘടന പ്രവർത്തിക്കുന്നത്. 2017ൽ മലാവിയിലെ നാലു പെൺകുട്ടികളെ മഡോണ ദത്തെടുക്കുകയും ചെയ്തിരുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.