ദീപാവലി ദിനത്തിൽ നിറക്കൂട്ടണിഞ്ഞ് സിംഗപ്പൂർ; കിടിലൻ ചിത്രങ്ങൾ

Thursday, October 19, 2017 6:38 AM IST

രാജ്യം മുഴുവൻ ദീപാവലി ആഘോഷലഹരിയിലാണ്. തിന്മയ്ക്കെതിരായ നന്മയുടെ വിജയം ആഘോഷിച്ച് എങ്ങും വർണദീപങ്ങൾ തെളിയുമ്പോൾ വിദേശ ഇന്ത്യക്കാരും ആഘോഷം ഒട്ടും കുറയ്ക്കുന്നില്ല. ഇതിനു തെളിവാണ് ഇന്ത്യൻ ജനത ഏറ്റവുമധികം പാർക്കുന്ന രാജ്യങ്ങളിലൊന്നായ സിംഗപ്പൂരിൽ നിന്നുള്ള മനോഹരചിത്രങ്ങൾ.

സിംഗപ്പൂരിൽ ദീപാവലി ആഘോഷങ്ങളുടെ ഭാഗമായി മെട്രോ റെയിൽവേ സ്റ്റേഷനുകളും ട്രെയിനുകളും ബസുകളും നിറക്കൂട്ടണിഞ്ഞതാണ് ചിത്രങ്ങളിൽ. പല തരത്തിലുള്ള വിളക്കുകൾ പുഷ്പങ്ങൾ കൊണ്ട് നിർമിച്ച പല രൂപങ്ങൾ, ആനയുടെ രൂപങ്ങൾ എന്നിവ കൊണ്ട് അലങ്കരിച്ച സ്റ്റേഷനുകളുടെയും ട്രെയിനുകളുടെയും ചിത്രങ്ങൾ സിംഗപ്പൂർ ഗതാഗത മന്ത്രാലയം സോഷ്യൽ മീഡിയയിലൂടെ പങ്കുവച്ചു. ഈ മാസം മുഴുവനും ട്രെയിനിലും ബസിലും ഈ വർണങ്ങൾ നിറഞ്ഞു നിൽക്കും.

"പ്രകാശത്തിന്‍റെ ഉത്സവമായ ഈ വർഷത്തെ ദീപാവലി അതിവിശിഷ്ടമായി ആഘോഷിക്കു..' എന്ന് ലാൻഡ് ട്രാൻസ്പോർട്ട് അതോറിറ്റി അധികൃതർ ഫേസ്ബുക്കിൽ കുറിച്ചു. ഹെറിറ്റേജ് അസോസിയേഷൻ, എസ്ബിഎസ് ട്രാൻസിറ്റ് ലിമിറ്റഡ്, ലിറ്റിൽ ഇന്ത്യ ഷോപ്പ്കീപ്പേഴ്സ് എന്നിവരുടെയും സഹകരണത്തോടെയാണ് ദീപാവലി അലങ്കാരങ്ങൾ നടത്തിയത്.

ഈ ചിത്രങ്ങൾ ഫേസ്ബുക്കിൽ വൈറലായതോടെ നിരവധിയാളുകളാണ് അഭിനന്ദനവുമായി രംഗത്തെത്തിയിരിക്കുന്നത്. ഇന്ത്യൻ ജനസംഖ്യയിൽ വലിയൊരു ശതമാനം സിംഗപ്പൂരിൽ താമസിക്കുന്നുണ്ട്. ലിറ്റിൽ ഇന്ത്യ എന്ന പേരിൽ അറിയപ്പെടുന്ന ജില്ല തന്നെ ഇവിടെ ഉണ്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.