റോഡ് വികസിപ്പിക്കുവാൻ ഷീറോസിനെ പെരുവഴിയിലാക്കി

Wednesday, July 18, 2018 9:53 AM IST

ഷീറോസ് കഫേ വീണ്ടും വാർത്തകളിൽ നിറയുന്നു. ആസിഡ് ആക്രമണങ്ങൾക്കിരകളായ ധീര വനിതകൾ നടത്തുന്ന കഫേ എന്ന നിലയിൽ ശ്രദ്ധേയമായ ഷീറോസിനെക്കുറിച്ച് ഇപ്പോൾ വരുന്ന വാർത്തകൾ അത്ര ശുഭകരമല്ല. ആസിഡ് ആക്രമണത്തിന് ഇരയായവർക്ക് ജോലി നല്കുന്നതിനായി ആരംഭിച്ചതാണ് ഷീറോസ് കഫേ.

എന്നാലിപ്പോൾ റോഡ് വികസനത്തിന്‍റെ ഭാഗമായി കഫേയുടെ ഒരു ഭാഗം കഴിഞ്ഞ ദിവസം ആഗ്രാ മുനിസിപ്പാലിറ്റി പൊളിച്ചുനീക്കി. വഴിയരികിലെ ഒരു ചെറിയ മുറി വാടകയ്ക്കെടുത്ത് കഫേ നടത്തിയിരുന്ന വനിതകൾക്കു കിട്ടിയ വലിയൊരു അടിയാണ് മുനിസിപ്പാലിറ്റിയുടെ ഈ നീക്കം.

ആസിഡ് ആക്രമണത്തിനിരയായ പത്തു പേരും അവരുടെ കുടുംബാംഗങ്ങളുമാണ് ഷീറോസ് ഹാംഗ് ഒൗട്ട് കഫേയെ ആശ്രയിച്ചു കഴിയുന്നത്. ആക്രമണത്തിന് ഇരയായവരുടെ മരുന്നിനും ശസ്ത്രക്രിയയ്ക്കുമെല്ലാം ആവശ്യമായ തുകയും ഈ വരുമാനത്തിൽനിന്നാണ് നീക്കി വയ്ക്കുന്നത്- കഫേയുടെ മാനേജരായ രൂപ പറഞ്ഞു.

നിലവിലെ സാഹചര്യം വച്ച് കഫേയിൽ സ്ഥലസൗകര്യം വളരെ പരിമിതമാണെന്നും അതിഥികൾക്ക് ഇതു ബുദ്ധിമുട്ട് ഉണ്ടാക്കുന്നുവെന്നും രൂപ കൂട്ടിച്ചേർത്തു. ആസിഡ് ആക്രമണത്തിന് ഇരയായവരെ പുനരധിവസിപ്പിക്കുന്നതിനായി ഇവർ ആരംഭിച്ച ഷീറോസ് ഹോമിന്‍റെ നടത്തിപ്പിനുള്ള പണവും കഫേയുടെ വരുമാനത്തിൽനിന്നാണ് വകയിരുത്തുന്നത്.

മറ്റ് ഉപജീവനമാർഗമൊന്നും ഇല്ലാത്തതിനാൽ മറ്റെവിടെയെങ്കിലും കഫേ ആരംഭിക്കുന്നതിനായി സ്ഥലം നല്കണമെന്ന് ഷീറോസ് അംഗങ്ങൾ ഉത്തർപ്രദേശ് സർക്കാരിനോട് ആവശ്യപ്പെട്ടു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.