ചിരിപ്പിക്കാൻ ഒരു മാംഗല്യം

Review

Friday, September 21, 2018 4:08 PM IST

അസാധാരണത്വം ഒന്നുമില്ലാത്ത ഒരു കഥയില്ലാ കഥയാണ് മാംഗല്യം തന്തുനാനേന. സൗമ്യ സദാനന്ദന്‍റെ കന്നി സംവിധാന സംരംഭത്തിൽ നായകൻ കുഞ്ചാക്കോ ബോബനാണെങ്കിലും മിന്നിത്തിളങ്ങിയത് ഹരീഷ് കണാരനാണ്. കാരണം സാധാരണ ഒരു സിനിമയെ കോമഡിയുടെ ട്രാക്കിലാക്കി പ്രേക്ഷക പ്രീതിയിലെത്തിച്ചത് ഹരീഷിന്‍റെ വൺമാൻ ഷോയാണ്.

കല്യാണവും അതിനെ തുടർന്ന് കുടുംബത്തിലുണ്ടാകുന്ന വിവിധ പ്രശ്നങ്ങളുമാണ് ചിത്രത്തിന്‍റെ കഥാസാരം. കണ്ടുപഴകിയ വിഷയമാണെങ്കിലും സംവിധായക നന്നായി തന്നെ വിഷയം അവതരിപ്പിച്ചിട്ടുണ്ട്. നർമത്തിന്‍റെ അകന്പടിയിൽ ബോറടിപ്പിക്കാതെ കഥ അവതരിപ്പിച്ചതാണ് ചിത്രത്തെ പ്രേക്ഷക പക്ഷത്ത് ചേർത്തു നിർത്തുന്നത്. ശാന്തികൃഷ്ണയുടെയും കുഞ്ചാക്കോ ബോബന്‍റെയും അമ്മ-മകൻ കെമിസ്ട്രിയും ചിത്രത്തിന് മുതൽക്കൂട്ടായി. ഒറ്റത്തവണ കണ്ടിരിക്കാൻ പാകത്തിന് വേണ്ടതെല്ലാം സൗമ്യ ആദ്യ ചിത്രത്തിൽ ചേരുംപടി ചേർത്തിട്ടുണ്ട്.

റോയി(കുഞ്ചാക്കോ ബോബൻ)യുടെയും ക്ലാര(നിമിഷ സജയൻ)യുടെയും ആഘോഷപൂർവമായ കല്യാണത്തോടെയാണ് മാംഗല്യം തന്തുനാനേന തുടങ്ങുന്നത്. വിവാഹത്തിന് ശേഷം നവദന്പതികൾ നേരിടുന്ന പ്രശ്നങ്ങളാണ് നർമത്തിൽ ചാലിച്ച് സംവിധായിക പറയുന്നത്. സാന്പത്തിക മാന്ദ്യത്തിൽപെട്ട് വിദേശത്തുണ്ടായിരുന്ന റോയിക്ക് നഷ്ടപ്പെടുന്നതോടെയാണ് കഥ തുടങ്ങുന്നത്. നായകന്‍റെ കൂട്ടാളിയായി ഹരീഷ് കണാരൻ എത്തുന്നതോടെ കഥ കോമഡി ട്രാക്കിലാകുകയും ചെയ്യും. സീരിയസ് മൂഡിലേക്ക് പോകുന്ന ചിത്രത്തെ വീണ്ടും വീണ്ടും കോമഡി ട്രാക്കിലേക്ക് വലിച്ചിടുന്നതും ഹരീഷ് കണാരന്‍റെ സാന്നിധ്യമാണ്.

ശാന്തികൃഷ്ണ ചിത്രത്തിൽ മികവുറ്റ പ്രകടനം തന്നെയാണ് പുറത്തെടുത്തിരിക്കുന്നത്. നായകന്‍റെ അമ്മയായി കൗണ്ടർ അടിക്കേണ്ടയിടത്ത് കൗണ്ടർ അടിച്ചും സെന്‍റിമെൻസ് രംഗങ്ങൾ കൈയടക്കത്തോടെ അവതരിപ്പിച്ചും ശാന്തികൃഷ്ണ കൈയടി നേടി. യുവതാരം നിമിഷ സജയന്‍റെ നായിക വേഷവും പുതുമ നിറഞ്ഞതായി.

സ്വർണവും സ്ത്രീകളും തമ്മിലുള്ള ബന്ധം എത്രത്തോളമെന്ന് പറയേണ്ടതില്ലല്ലോ... ഇവിടെ നായികയെ മുൻനിർത്തി ആ ബന്ധത്തിന്‍റെ തീവ്രത സംവിധായിക ഒരിക്കൽകൂടി കാട്ടിത്തരുന്നുണ്ട്. വൈകാരിക രംഗങ്ങളിൽ ഇത്തിരി കൈവിട്ടു പോയെങ്കിലും നിമിഷ വഴക്കാളിയായ ഭാര്യയായി ചിത്രത്തിൽ നിറഞ്ഞു നിൽക്കുകയാണ്.

അരവിന്ദ് കൃഷ്ണ ഒരുക്കിയ കളർഫുൾ ഫ്രെയിമുകളുടെ അകന്പടിയോടെയാണ് കഥ മുന്നോട്ടു നീങ്ങുന്നത്. ആദ്യ പകുതിയിൽ ലോണ്‍ അടയ്ക്കാനുള്ള നായകന്‍റെ നെട്ടോട്ടമാണ് കാണാൻ കഴിയുക. കുഞ്ചാക്കോ ബോബൻ ജോലി നഷ്ടമായ ഭർത്താവിന്‍റെ വേഷം കൈയടക്കത്തോടെ സ്ക്രീനിൽ അവതരിപ്പിച്ചിട്ടുണ്ട്. രണ്ടാം പകുതിയിൽ പണത്തിന് പിന്നാലെയുള്ള ഓട്ടമാണ് നടക്കുന്നത്. തിരക്കഥയിലെ പോരായ്മകൾ രണ്ടാം പകുതിയിൽ നിഴലിച്ചതോടെ ചിത്രം അല്പം കൈവിട്ടുപോയിട്ടുണ്ട്.

കുടുംബസമേതം കാണാൻ കഴിയുന്ന ചിരിപ്പിക്കുന്ന ചിത്രമാണ് മാംഗല്യം തന്തുനാനേന. റോയിയും ക്ലാരയും വിവാഹത്തിന് ശേഷം തുടങ്ങുന്ന ഓട്ടത്തിൽ കുടുംബസമേതം പ്രേക്ഷകർക്ക് പങ്കെടുക്കാം.

വി.ശ്രീകാന്ത്

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.