ദുൽഖറിന്‍റെ "സോളോ’ എത്തുന്നു : Upcoming Movies

ബോളിവുഡിൽ ശ്രദ്ധേയ ചിത്രങ്ങളൊരുക്കിയ മലയാളിസംവിധായകൻ ബിജോയ് നമ്പ്യാർ ദുൽഖറിനെ നായകനാക്കി മലയാളത്തിലൊരുക്കുന്ന പുതിയ ചിത്രമായ "സോളോ' ഒക്‌ടോബർ അഞ്ചിനു തിയറ്ററുകളിലെത്തും. മലയാളത്തിലും തമിഴിലുമായി ഒരേസമയം ഒരുങ്ങിയ ചിത്രം മലയാളം പതിപ്പിന് 2.34 മണിക്കൂറും തമിഴ് പതിപ്പിന് 2.32 മണിക്കൂറുമാണു ദൈർഘ്യം. തമിഴ് പതിപ്പിന് യു/എ സർട്ടിഫിക്കറ്റാണു സെൻസർ ബോർഡ് നൽകിയതെങ്കിൽ മലയാളം പതിപ്പിന് ക്ലീൻ-യു സർട്ടിഫിക്കറ്റാണ് ലഭിച്ചത്. എസ്പിഐ സിനിമാസ് വഴിയാണു തമിഴ്നാട്ടിൽ വിതരണം.

പ്രഖ്യാപിച്ചതു മുതൽ പ്രേക്ഷകശ്രദ്ധയിലുള്ള പ്രോജക്ട് നാലു ഭാഗങ്ങളുള്ള ചലച്ചിത്രസമുച്ചയമാണ്. ശിവ, രുദ്ര, ശേഖർ, ത്രിലോക് എന്നിങ്ങനെ ശിവന്‍റെ പര്യായങ്ങൾ പേരുകളാക്കിയ നാലു കഥാപാത്രങ്ങളെയാണ് ദുൽഖർ "സോളോ’യിൽ അവതരിപ്പിക്കുന്നത്.

കബാലി നായിക ധൻസിക ആദ്യമായി മലയാളത്തിലെത്തുന്നുവെന്ന പ്രത്യേകതയും ചിത്രത്തിനുണ്ട്. കൂടാതെ നേഹ ശർമ, ശ്രുതി ഹരിഹരൻ, ആരതി വെങ്കിടേഷ്, ആശ ജയറാം തുടങ്ങിയവരും ചിത്രത്തിലെത്തുന്നു. ബിജോയുടെ തന്നെ നിർമാണകമ്പനിയായ ഗെറ്റ്എവേ ഫിലിംസും അബാം ഫിലിസും സംയുക്‌തമായാണു ചിത്രം നിർമിക്കുന്നത്.