ത്രില്ലടിപ്പിക്കാൻ ഇര എത്തുന്നു : Upcoming Movies

മലയാളത്തിലെ രണ്ടു പുതുതലമുറക്കാരായ ഉണ്ണി മുകുന്ദനെയും ഗോകുൽ സുരേഷ് ഗോപിയെയും പ്രധാന കഥാപാത്രങ്ങളാക്കി നവാഗതനായ സൈജു സി.എസ്. സംവിധാനംചെയ്യുന്ന ഇര റിലീസിനൊരുങ്ങുന്നു. ചിത്രം യു.കെ. സ്റ്റുഡിയോസ് മാർച്ച് രണ്ടിന് പ്രദർശനത്തിനെത്തിക്കും.

പ്രശസ്ത സംവിധായകൻ വൈശാഖ്, തിരക്കഥാകൃത്ത് ഉദയകൃഷ്ണ എന്നിവരുടെ നേതൃത്വത്തിലുള്ള വൈശാഖ്- ഉദയകൃഷ്ണ പ്രൊഡക്ഷൻസാണ് ഈ ചിത്രം നിർമിക്കുന്നത്. ഇരയും ഇരയെത്തേടുന്നവരും തമ്മിലുള്ള ഏറ്റുമുട്ടലുകളാണ് ചിത്രം പറയുന്നത്. നിരവധി സസ്പെൻസ് മുഹൂർത്തങ്ങളും കെട്ടുറപ്പുള്ള കഥയും ആക്ഷനും ചെയ്സുമൊക്കെ കോർത്തിണക്കിയാണ് ഇര ഒരുക്കിയിരിക്കുന്നത്.

എസ്പി രാജീവൻ എന്ന കഥാപാത്രത്തെയാണ് ഇവിടെ ഉണ്ണി മുകുന്ദൻ അവതരിപ്പിക്കുന്നത്. ഡോ. ആര്യൻ എന്ന കഥാപാത്രമായാണ് ഗോകുൽ സുരേഷ് ഗോപി എത്തുന്നത്. സ്ത്രീ കഥാപാത്രങ്ങൾക്കും ഈ ചിത്രത്തിൽ ഏറെ പ്രാധാന്യമുണ്ട്. മിയാ ജോർജാണ് ഒരു പ്രധാന വേഷം ചെയ്യുന്നത്. നിരഞ്ജനാ അനൂപ്, ലെന, മെറീന മൈക്കിൾ, നിരഞ്ജനാ ദാസ് എന്നിവരാണു മറ്റു നടിമാർ.

കൈലേഷ്, ശങ്കർ രാമകൃഷ്ണൻ, ഇ.പി. രാജേന്ദ്രൻ, അലൻസിയർ, ജയൻ, പ്രശാന്ത് അലക്സാണ്ടർ, നിർമൽ പാലാഴി, വിനോദ് കോവൂർ എന്നിവരും ഈ ചിത്രത്തിലെ പ്രധാന താരങ്ങളാണ്. നവീൻ ജോസിന്‍റേതാണു തിരക്കഥ. ഹരി നാരായണന്‍റെ ഗാനങ്ങൾക്ക് ഗോപിസുന്ദർ ഈണം പകരുന്നു.