താരപുത്രന്മാരുടെ 21-ാം നൂറ്റാണ്ട് : Upcoming Movies

അരുണ്‍ ഗോപി-പ്രണവ് മോഹൻലാൽ കൂട്ടുകെട്ടിലൊരുങ്ങുന്ന ഇരുപത്തിയൊന്നാം നൂറ്റാണ്ട് റിലീസിനൊരുങ്ങുന്നു. രാമലീലയ്ക്കു ശേഷം അരുണ്‍ ഗോപി സംവിധാനം ചെയ്യുന്ന ചിത്രമാണിത്.

ഒരു സർഫറിന്‍റെ കഥാപാത്രത്തെയാണ് ചിത്രത്തിൽ പ്രണവ് അവതരിപ്പിക്കുന്നത്. പ്രണവിനൊപ്പം സുരേഷ് ഗോപിയുടെ മകൻ ഗോകുൽ സുരേഷും ചിത്രത്തിൽ പ്രധാനവേഷത്തിലെത്തുന്നു. പുതുമുഖം സായ ഡേവിഡ് (റേച്ചൽ) ആണ് ചിത്രത്തിലെ നായിക.

മനോജ് കെ. ജയൻ, കലാഭവൻ ഷാജോണ്‍, ധർമജൻ ബോൾഗാട്ടി എന്നിവരും ചിത്രത്തിൽ മറ്റ് കഥാപാത്രങ്ങളെ അവതരിപ്പിക്കും. അരുണ്‍ ഗോപി തന്നെയാണ് ചിത്രത്തിന്‍റെ തിരക്കഥയും തയാറാക്കിയിരിക്കുന്നത്. അഭിനന്ദ് രാമാനുജൻ‌ ഛായാഗ്രഹണവും ഗോപിസുന്ദർ സംഗീതവുമൊരുക്കുന്നു. മുളകുപാടം ഫിലിംസിന്‍റെ ബാനറിൽ ടോമിച്ചൻ മുളകുപാടമാണ് ചിത്രം നിർമിക്കുന്നത്.

പുലിമുരുകനിലും ഒടിയനിലും മോഹന്‍ലാലിന്‍റെ വിസ്മയകരമായ സംഘട്ടന രംഗങ്ങളുടെ സ്റ്റണ്ട് മാസ്റ്റര്‍ പീറ്റര്‍ ഹെയ്നാണ് ഈ ചിത്രത്തിൽ ആക്‌ഷൻ കൈകാര്യം ചെയ്യുന്നത്. കഥാപാത്രത്തിന്‍റെ പൂർണതയ്ക്കായി പ്രണവ് ഇന്തോനേഷ്യയിലെ ബാലിയില്‍ പോയി സര്‍ഫിംഗ് വശമാക്കിയിരുന്നു. ഗോവ, കാഞ്ഞിരപ്പള്ളി, ഹൈദരാബാദ്, ദക്ഷിണാഫ്രിക്ക എന്നിവിടങ്ങളിലായാണ് ചിത്രീകരണം പൂർത്തിയായത്.