ബാലൻ വക്കീലായി ദിലീപ് എത്തുന്നു : Upcoming Movies

ദിലീപിനെ നായകനാക്കി ബി. ഉണ്ണികൃഷ്ണൻ സംവിധാനം ചെയ്യുന്ന കോടതിസമക്ഷം ബാലൻ വക്കീൽ ഈമാസം 21ന് തീയറ്ററുകളിലെത്തും. വിക്കുള്ള ഒരു വക്കീലിന്‍റെ കഥാപാത്രത്തെയാണ് ചിത്രത്തിൽ ദിലീപ് അവതരിപ്പിക്കുന്നത്. ദിലീപിന്‍റെ സ്റ്റൈലിഷ്, ആക്‌ഷൻ രംഗങ്ങൾ ഉൾപ്പെടുത്തി പുറത്തിറങ്ങിയ ചിത്രത്തിന്‍റെ ട്രെയിലർ തരംഗമായി മാറിയിരുന്നു.

മംമ്തയാണ് നായിക. അനുരാധ സുദർശൻ എന്ന കഥാപാത്രത്തെയാണ് മംമ്ത അവതരിപ്പിക്കുന്നത്. പ്രിയ ആനന്ദും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. കൂടാതെ സൈജു കുറുപ്പ്, അജു വര്‍ഗീസ്, ലെന, ബിന്ദു പണിക്കര്‍ തുടങ്ങിയവരും ചിത്രത്തില്‍ അഭിനയിക്കുന്നു.

പാസഞ്ചറിനു ശേഷം ദിലീപ് വക്കീൽ വേഷത്തിലെത്തുന്ന ചിത്രമെന്ന പ്രത്യേകതയും കോടതിസമക്ഷം ബാലൻ വക്കീലിനുണ്ട്. പ്രമുഖ ബോളിവുഡ് നിര്‍മ്മാണ കമ്പനിയായ വയാകോം 18 മോഷന്‍ പിക്‌ചേഴ്സാണ് ചിത്രം നിർമിക്കുന്നത്.

അഖില്‍ ജോര്‍ജാണ് സിനിമയുടെ ഛായാഗ്രഹണം നിര്‍വ്വഹിച്ചിരിക്കുന്നത്. ബി.കെ. ഹരിനാരായണന്‍റെ വരികൾക്ക് ഗോപി സുന്ദറും രാഹുല്‍ രാജും ചേര്‍ന്നാണ് സംഗീതം നല്കുന്നത്.