ഞാനിപ്പോൾ ബിഎസ്‌സി അഗ്രികൾച്ചർ നാലാം വർഷം പഠിക്കുന്നു. ഈ പ്രോഗ്രാം പൂർത്തിയാക്കിയതിനുശേഷം എനിക്ക് റൂറൽ ഡെവലപ്മെന്റിലോ റൂറൽ മാനേജ്മെന്റിലോ എംബിഎ പഠിക്കണമെന്ന് ആഗ്രഹമുണ്ട്. കേന്ദ്ര /സംസ്ഥാന സർക്കാരുകളുടെ ഉടമസ്ഥതയിലുള്ളതും റൂറൽ മാനേജ്മെന്‍റിൽ എംബിഎ പ്രോഗ്രാം നൽകുന്നതുമായ കോളജുകൾ/ സർവകലാശാലകൾ ഏതെല്ലാം?
അരുണ്‍ ജസ്റ്റിൻ കോട്ടയം.
ബിഎസ്‌സി അഗ്രികൾച്ചർ പഠിച്ചതിനുശേഷം മാനേജ്മെന്‍റ് പഠനം ആഗ്രഹിക്കുന്ന വിദ്യാർഥികൾക്ക് തെരഞ്ഞെടുക്കാൻ പറ്റുന്ന മികച്ചൊരു മാനേജ്മെന്‍റ് ഓപ്ഷനാണ് എംബിഎ/പിജിഡിഎം റൂറൽ മാനേജ്മെന്‍റ്/റൂറൽ ഡെവലപ്മെന്‍റ്.
രാജ്യത്തിന്‍റെ വിവിധ ഭാഗങ്ങളിൽ നല്ല രീതിയിൽ പ്രവർത്തിക്കുന്ന സർക്കാർ, സ്വകാര്യ സർവകലാശാലകളും കോളജുകളും എംബിഎ അല്ലെങ്കിൽ പോസ്റ്റ് ഗ്രാജുവേറ്റ് ഡിപ്ലോമ ഇൻ റൂറൽ മാനേജ്മെന്‍റ് / റൂറൽ ഡെവലപ്മെന്‍റ് നൽകുന്നുണ്ട്.
രാജ്യത്തെ എണ്ണംപറഞ്ഞ സർവകലാശാലകളും ഇൻസ്റ്റിറ്റ്യൂട്ടുകളും കോളജുകളും റൂറൽ ഡെവലപ്മെന്റിലോ റൂറൽ മാനേജ്മെന്റിലോ എംബി എ പ്രോഗ്രാമുകളോ പിജിഡിഎം പ്രോഗ്രാമുകളോ നൽകുന്നുണ്ട്.
പ്രീമിയർ സ്ഥാപനങ്ങൾ എന്ന് വിളിക്കപ്പെടുന്ന കേന്ദ്രസംസ്ഥാന സർക്കാരുകൾ നടത്തുന്ന പബ്ലിക് സർവകലാശാലകളാണിവ. താഴെപ്പറയുന്നവയാണ് അതിൽ പ്രധാനപ്പെട്ട ഏതാനും സർവകലാശാലകൾ.
1) ഇൻസ്റ്റിറ്റ്യൂട്ട് ഓഫ് റൂറൽ മാനേജ്മെന്‍റ്, ആനന്ദ്, ഗുജറാത്ത്
പോസ്റ്റ് ഗ്രാജുവേറ്റ് ഡിപ്ലോമ ഇൻ മാനേജ്മെന്‍റ് ( റൂറൽ മാനേജ്മെന്‍റ് ) എന്ന പ്രോഗ്രാമാണ് ഈ ഇൻസ്റ്റിറ്റ്യൂട്ട് നൽകുന്നത്.
2) ഡോ. രാജേന്ദ്ര പ്രസാദ് സെൻട്രൽ അഗ്രികൾച്ചർ യൂണിവേഴ്സിറ്റി, സമസ്ത്തിപുർ, ബിഹാർ.
ഇതൊരു സെൻട്രൽ യൂണിവേഴ്സിറ്റിയാണ് എംബിഎ റൂറൽ മാനേജ്മെന്‍റ് ആണ് സ്ഥാപനം ഓഫർ ചെയ്യുന്ന പ്രോഗ്രാം.
3) ഗാന്ധിഗ്രാം റൂറൽ ഇൻസ്റ്റിറ്റ്യൂട്ട്, ഗാന്ധിഗ്രാം, തമിഴ്നാട്.
ഇൻസ്റ്റിറ്റ്യൂട്ട് നൽകുന്നത് റൂറൽ ഡെവലപ്മെന്‍റ് ആൻഡ് മാനേജ്മെന്‍റ് എന്ന വിഷയത്തിൽ എംബിഎ പ്രോഗ്രാം ആണ്.
4) ഗുജറാത്ത് വിദ്യാപീഠം, ഗാന്ധിനഗർ. (സെന്‍റർ ഫോർ സ്റ്റഡീസ് ഇൻ റൂറൽ മാനേജ്മെന്‍റ്)
റൂറൽ മാനേജ്മെന്‍റിൽ എംബിഎ പ്രോഗ്രാം നൽകുന്നുണ്ട്. കേന്ദ്ര വിദ്യാഭ്യാസ മന്ത്രാലയത്തിന്‍റെ ഉടമസ്ഥതയിലാണ് ഈ വിദ്യാപീഠം പ്രവർത്തിക്കുന്നത്. ഇന്ത്യയുടെ സ്വാതന്ത്ര്യ സമരവുമായി വളരെ ബന്ധമുള്ളതാണ് ഈ വിദ്യാപീഠം. മഹാത്മാഗാന്ധിയാണ് ഈ വിദ്യാപീഠം സ്ഥാപിച്ചത്.
5) സാന്പൽപുർ യൂണിവേഴ്സിറ്റി, ഒറീസ.
ഒറീസ സർക്കാരിന്‍റെ നിയന്ത്രണത്തിൽ ഉള്ളതാണ് ഈ സർവകലാശാല; റൂറൽ മാനേജ്മെന്‍റിൽ എംബിഎ പ്രോഗ്രാം നല്കുന്നു.
6) യൂണിവേഴ്സിറ്റി ഓഫ് ലക്നോയുടെ ഇൻസ്റ്റിറ്റ്യൂട്ട് ഓഫ് മാനേജ്മെന്‍റ് സയൻസ്
റൂറൽ മാനേജ്മെന്‍റിൽ എംബിഎ പ്രോഗ്രാം നൽകുന്നുണ്ട്. ഇത് ഉത്തർപ്രദേശ് സർക്കാരിന്‍റെ നിയന്ത്രണത്തിലുള്ള ഗവണ്‍മെന്‍റ് സർവകലാശാലയാണ്.
ഈ സർവകലാശാലകൾ ഓരോന്നും അവരുടേത് മാത്രമായതോ അല്ലെങ്കിൽ പൊതുവായി നടക്കുന്നതോ ആയ മാനേജ്മെന്‍റ് പ്രവേശന പരീക്ഷകളിൽ അപേക്ഷകർ നേടുന്ന സ്കോറിന്റെയും വ്യക്തിഗത ഇന്‍റർവ്യുന്‍റെയും ഗ്രൂപ്പ് ഡിസ്കഷന്‍റെയും ഒക്കെ ഉള്ള മികവിന്‍റെ അടിസ്ഥാനത്തിലാണ് വിദ്യാർഥികളെ പ്രവേശിപ്പിക്കുന്നത്.
സർക്കാർ നിയന്ത്രണമുള്ള സർവകലാശാലകൾ അല്ലാതെ ധാരാളം സ്വകാര്യ സർവകലാശാലകളും റൂറൽ മാനേജ്മെന്‍റിൽ എംബിഎ പ്രോഗ്രാം നൽകുന്നുണ്ട്. അതിൽ പ്രധാനപ്പെട്ട ചിലത് താഴെ പറയുന്നു.
സേവ്യഴ്സ് സ്കൂൾ ഓഫ് റൂറൽ മാനേജ്മെന്‍റ്, ഒറീസ.
കെഐഐടി സ്കൂൾ ഓഫ് റൂറൽ മാനേജ്മെന്‍റ്, ഭുവനേശ്വർ.
ഇൻസ്റ്റിറ്റ്യൂട്ട് ഓഫ് റൂറൽ മാനേജ്മെന്‍റ്, ജയ്പുർ, രാജസ്ഥാൻ
ഐസിഎഫ്എഐ യൂണിവേഴ്സിറ്റി, ത്രിപുര.
അഡ്വ. ബാബു പള്ളിപ്പാട്ട് കരിയർ ഗൈഡ് ([email protected])