ഏകജാലക പ്രവേശനം: ഓണ്ലൈൻ രജിസ്ട്രേഷൻ ആരംഭിച്ചു
സർക്കാർ, എയ്ഡഡ്, സ്വാശ്രയ ആർട്സ് ആൻഡ് സയൻസ് കോളജുകളിൽ ഏകജാലകം വഴിയുള്ള ഒന്നാം വർഷ ഇന്റഗ്രേറ്റഡ് പ്രോഗ്രാമുകളിൽ പ്രവേശനത്തിനുള്ള ഓണ്ലൈൻ രജിസ്ട്രേഷൻ ആരംഭിച്ചു. പ്രവേശനം പൂർണമായും ഓണ്ലൈൻ സംവിധാനത്തിലൂടെയാകും നടത്തുക. അതിനാൽ അപേക്ഷകർ സാക്ഷ്യപത്രങ്ങളുടെ ഡിജിറ്റൽ പകർപ്പ് അപേക്ഷയോടൊപ്പം അപ്ലോഡ് ചെയ്യണം. ഓണ്ലൈൻ അപേക്ഷ സമർപ്പിക്കുന്നതിനുള്ള അവസാന തീയതി ഓഗസ്റ്റ് 13 ആണ്. ഒന്നാം വർഷ ബിരുദ പ്രോഗ്രാമുകളിലെ ക്ലാസുകൾ സെപ്റ്റംബർ 27ന് ആരംഭിക്കും.
മാനേജ്മെന്റ്/കമ്യൂണിറ്റി വിഭാഗത്തിന് സംവരണം ചെയ്ത സീറ്റുകളിലേക്ക് അപേക്ഷിക്കുന്നവർ ഏകജാലക സംവിധാനത്തിലൂടെ അപേക്ഷിക്കണം. ലക്ഷദ്വീപിൽനിന്നുള്ള അപേക്ഷകർക്കായി ഓരോ കോളജിലും സീറ്റുകൾ സംവരണം ചെയ്തിട്ടുണ്ട്. ലക്ഷദ്വീപ് നിവാസികളായ അപേക്ഷകരും ഏകജാലക സംവിധാനത്തിലൂടെ അപേക്ഷിക്കണം.ഭിന്നശേഷിക്കാർ/സ്പോർട്സ്/കൾച്ചറൽ ക്വോട്ട വിഭാഗങ്ങളിൽ ഉൾപ്പെടുന്നവർ എന്നിവരും ഏകജാലകത്തിലൂടെ അപേക്ഷിക്കണം. ഏകജാലകത്തിലൂടെ അപേക്ഷിക്കാത്തവർക്ക് മാനേജ്മെന്റ്, കമ്മ്യൂണിറ്റി ക്വാട്ടകളിലേക്ക് അപേക്ഷിക്കാൻ സാധിക്കില്ല.
പരീക്ഷാകേന്ദ്രത്തിന് മാറ്റം
അഞ്ചാം സെമസ്റ്റർ ബിഎ, ബികോം (സിബിസിഎസ് 2018 അഡ്മിഷൻ, 2017 അഡ്മിഷൻ റീഅപ്പിയറൻസ് പ്രൈവറ്റ് രജിസ്ട്രേഷൻ) പരീക്ഷയ്ക്ക് പരുമല ദേവസ്വം ബോർഡ് പന്പ കോളജ് പരീക്ഷകേന്ദ്രമായി അപേക്ഷിച്ച വിദ്യാർഥികളിൽ പരുമല സെന്റ് ഗ്രിഗോറിയസ് കോളജ് ഓഫ് സോഷ്യൽ സയൻസസ് പരീക്ഷകേന്ദ്രമായി അനുവദിച്ചിരുന്ന വിദ്യാർഥികൾ ഇന്നു മുതൽ നടക്കുന്ന പരീക്ഷകൾക്കായി തിരുവല്ല വളഞ്ഞവട്ടം പരുമല മാർ ഗ്രിഗോറിയോസ് കോളജിലാണ് ഹാജരാകേണ്ടത്. വിവരം വെബ്സൈറ്റിൽ ലഭിക്കും.
സ്പെഷൽ പരീക്ഷ ഓഗസ്റ്റ് ആറു മുതൽ
കോവിഡ് നിയന്ത്രണങ്ങൾ മൂലം ഒന്നാം സെമസ്റ്റർ എംഎച്ച്ആർഎം (2019 അഡ്മിഷൻ റഗുലർ/2018 അഡ്മിഷൻ സപ്ലിമെന്ററി) പരീക്ഷയെഴുതാൻ സാധിക്കാതിരുന്നവർക്കായി നടത്തുന്ന സ്പെഷൽ പരീക്ഷകൾ ഓഗസ്റ്റ് ആറുമുതൽ നടക്കും. ടൈംടേബിൾ വെബ്സൈറ്റിൽ.
വൈവാവോസി
2020 ഒക്ടോബർ, നവംബർ മാസങ്ങളിൽ നടന്ന ഒന്ന്, രണ്ട്, മൂന്ന്, നാല് സെമസ്റ്റർ എംബിഎ സ്പെഷൽ മേഴ്സി ചാൻസ് പരീക്ഷയുടെ വൈവാവോസി ഓഗസ്റ്റ് മൂന്നിന് വടവാതൂർ ഗിരിദീപം ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് ലേണിംഗിൽ നടക്കും. വിശദമായ ടൈംടേബിൾ സർവകലാശാല വെബ് സൈറ്റിൽ.
ഗസ്റ്റ് അധ്യാപക ഒഴിവ്
സ്കൂൾ ഓഫ് ഇന്ത്യൻ ലീഗൽ തോട്ടിൽ നിയമം, മാനേജ്മെന്റ് എന്നീ വിഷയങ്ങൾ പഠിപ്പിക്കുന്നതിനായി യുജിസി, നെറ്റ് യോഗ്യതയുള്ള ഗസ്റ്റ് അധ്യാപകരെ ആവശ്യമുണ്ട്. ഉദ്യോഗാർഥികൾ അസൽ രേഖകളുമായി ഓഗസ്റ്റ് 16ന് രാവിലെ 11ന് സ്കൂൾ ഓഫ് ഇന്ത്യൻ ലീഗൽ തോട്ടിൽ എത്തണം. 04812310165.
അപേക്ഷ ഇന്നുകൂടി
ആഗസ്റ്റ് അഞ്ചിനു ആരംഭിക്കുന്ന മൂന്നാം സെമസ്റ്റർ യുജി (സിബിസിഎസ്) പരീക്ഷകളെഴുതുന്ന വിദ്യാർഥികൾക്ക് പരീക്ഷാകേന്ദ്രം മാറ്റത്തിനായി ഇന്നു വൈകുന്നേരം അഞ്ചുവരെ അപേക്ഷിക്കാം. വിവരം വെബ്സൈറ്റിൽ.