തേഞ്ഞിപ്പലം: നൂതന സാങ്കേതിക ആശയങ്ങളിലൂടെ ആരോഗ്യ, വിദ്യാഭ്യാസ, പരിസ്ഥിതി പ്രശ്നങ്ങള്ക്ക് പരിഹാരം കാണാന് കാലിക്കട്ട് സര്വകലാശാലാ എന്ജിനിയറിംഗ് കോളജ് ഐഡിയാത്തോണ് സംഘടിപ്പിക്കുന്നു. എന്ജിനിയറിംഗ് കോളജിലെ ഇലക്ട്രോണിക്സ് കമ്യൂണിക്കേഷന് വിഭാഗം ഐഇഡിസിയുമായി സഹകരിച്ച് ' സ്പാര്ക് @ഐഇടി ' എന്ന പേരില് 29നാണ് പരിപാടി നടത്തുക. കേരള സ്റ്റാര്ട്ട് അപ്പ് മിഷന്റെ ഇന്നൊവേറ്റീവ് പ്രീമിയര് ലീഗിന്റെ ഭാഗമായാണ് പരിപാടി. വിദ്യാര്ഥികള് ഓണ്ലൈനായി അവതരിപ്പിച്ചവയില് നിന്നാണ് മികച്ച മൂന്ന് ആശയങ്ങള് അടുത്ത ഘട്ടത്തിലെ മത്സരത്തിനായി തിരഞ്ഞെടുക്കുക. വിജയികള്ക്ക് കാഷ് അവാര്ഡ് നല്കും.
സര്വകലാശാലയില് തൊഴില്മേള ഇന്ന്
തേഞ്ഞിപ്പലം: കാലിക്കട്ട് സര്വകലാശാലാ പ്ലേസ്മെന്റ് സെല്ലും ജിടെക്കും ചേര്ന്ന് സംഘടിപ്പിക്കുന്ന തൊഴില്മേള ഇന്ന് സര്വകലാശാലാ സെമിനാര് കോംപ്ലക്സില് നടക്കും. രാവിലെ ഒമ്പതരക്ക് വൈസ് ചാന്സലര് ഡോ. എം.കെ. ജയരാജ് ഉദ്ഘാടനം ചെയ്യും. ഐടി, ബാങ്കിംഗ്, ഇൻഷ്വറന്സ്, എഡ്യുക്കേഷന്, മീഡിയ, കണ്സ്ട്രക്ഷന്, ഹോസ്പിറ്റാലിറ്റി, ഹെല്ത്ത് കെയര്, സെയില്സ് ആന്ഡ് മാര്ക്കറ്റിംഗ് മേഖലകളില് നിന്നായി അമ്പതോളം സ്ഥാപനങ്ങളാണ് ഉദ്യോഗാര്ഥികളെ തേടുന്നത്. ഫോണ്: 9388183944.
പരീക്ഷാഭവനില് സുരക്ഷ കര്ശനമാക്കി
തേഞ്ഞിപ്പലം: കാലിക്കട്ട് സര്വകലാശാലാ പരീക്ഷാഭവനില് കഴിഞ്ഞ ദിവസമുണ്ടായ സംഘര്ഷത്തിന്റെ പശ്ചാത്തലത്തില് സുരക്ഷ കര്ശനമാക്കാന് തീരുമാനം. വൈസ് ചാന്സലര്, പ്രൊ വൈസ് ചാന്സലര്, രജിസ്ട്രാര് എന്നിവര് ജീവനക്കാരുടെ സംഘടനാ നേതാക്കളുമായി നടത്തിയ ചര്ച്ചയിലാണ് നടപടി. സെക്ഷന് ഓഫീസര് ഷിബുവിനെ മര്ദിച്ച പരാതി പോലീസിനു കൈമാറും. സംഭവത്തെക്കുറിച്ച് പ്രൊ വൈസ് ചാന്സലര് അധ്യക്ഷനും രജിസ്ട്രാര്, പരീക്ഷാ കണ്ട്രോളര് എന്നിവര് അംഗങ്ങളുമായുള്ള സമിതി അന്വേഷണം നടത്തി റിപ്പോര്ട്ട് നല്കും.
പരീക്ഷാഭവനിലേക്കുള്ള വിദ്യാര്ഥികളുടെ പ്രവേശനം പാസ് മൂലം നിയന്ത്രിക്കും. രാവിലെ പത്തര മുതല് ഉച്ചയ്ക്ക് ഒന്നുവരെയാകും പ്രവേശനം. ഫ്രണ്ട് ഓഫീസ് സംവിധാനം കാര്യക്ഷമമാക്കും. ഫ്രണ്ട് ഓഫീസില് കംപ്യൂട്ടറും ഇന്റര്നെറ്റ് സൗകര്യവും ഒരുക്കും. വിദ്യാര്ഥികളുടെ പരീക്ഷാ വിവരങ്ങള് ഡിജിറ്റല് സ്റ്റുഡന്റ്സ് സെന്ററായ സുവേഗ വഴി നല്കും. പരീക്ഷാ ഭവന് ബ്രാഞ്ചുകളില് കൂടുതല് സുരക്ഷാ ജീവനക്കാരെ നിയോഗിക്കും.