സെനറ്റ് തെരഞ്ഞെടുപ്പ്: വോട്ടർപട്ടിക പ്രസിദ്ധീകരിച്ചു
കണ്ണൂർ സർവകലാശാല സെനറ്റ് തെരഞ്ഞെടുപ്പിനോടനുബന്ധിച്ച് അന്തിമ വോട്ടർപട്ടിക പ്രസിദ്ധീകരിച്ചു. വോട്ടർപട്ടിക സർവകലാശാല വെബ്സൈറ്റിൽ (WWW.kannuruniversity.ac.in) ലഭ്യമാണ്.
ഇന്റേണൽ മാർക്ക്
അഫിലിയേറ്റഡ് കോളജുകളിലെ അഞ്ചാം സെമസ്റ്റർ ബിരുദ വിദ്യാർഥികളുടെയും മൂന്നാം സെമസ്റ്റർ ബിരുദാനന്തര ബിരുദ വിദ്യാർഥികളുടെയും ഇന്റേണൽ മാർക്കുകൾ നാളെമുതൽ 12 വരെ ഓണ്ലൈൻ മുഖേന അപ്ലോഡ് ചെയ്യണം.
ഒന്നാം സെമസ്റ്റർ എംഎസ്ഡബ്ല്യു പരീക്ഷാഫലം
ഒന്നാം സെമസ്റ്റർ എംഎസ്ഡബ്ല്യൂ ഒക്ടോബർ 2017 പരീക്ഷാഫലം പ്രസിദ്ധീകരിച്ചു. ഫലം സർവകലാശാല വെബ്സൈറ്റിൽ (www.kannuruniversity.ac.in) ലഭ്യമാണ്. പുനർമൂല്യ നിർണയത്തിനും ഫോട്ടോകോപ്പിക്കും സൂക്ഷ്മ പരിശോധനയ്ക്കുമുള്ള അപേക്ഷകൾ 16 വരെ സ്വീകരിക്കും.
നാഷണൽ സർവീസ് സ്കീം : സംസ്ഥാനതല പുരസ്കാരം കണ്ണൂർ സർവകലാശാലയ്ക്ക്
കണ്ണൂർ: നാഷണൽ സർവീസ് സ്കീം പ്രവർത്തനങ്ങളിൽ മികച്ച പ്രവർത്തനം കാഴ്ചവച്ചതിനുള്ള പുരസ്കാരം കണ്ണൂർ സർവകലാശാലയ്ക്ക്. വിവിധ തലങ്ങളിൽ നടത്തിയ പ്രവർത്തനമികവ് കണക്കിലെടുത്താണ് പുരസ്കാരം. മികച്ച പ്രോഗ്രാം കോഓർഡിനേറ്ററായി കണ്ണൂർ സർവകലാശാലയിലെ പത്മനാഭൻ കാവുന്പായിയെ തെരഞ്ഞെടുത്തു. എംജി യൂണിവേഴ്സിറ്റി ഏർപ്പെടുത്തിയ ഏറ്റവും മികച്ച പദ്ധതി നടത്തിപ്പിനുള്ള അവാർഡും കണ്ണൂർ സർവകലാശാലയ്ക്ക് ലഭിച്ചിരുന്നു. സർവകലാശാലയിലെ നാട്ടുമാവിൻ തോട്ടം, കശുമാവിൻ തോട്ടം, ഔഷധത്തോട്ടം ജൈവവൈവിധ്യ പാർക്കുകൾ, ശുദ്ധജല മത്സ്യക്കൃഷി, മറ്റ് ബോധവത്കരണ പരിപാടികൾ, യൂണിറ്റുകളിലൂടെ നടത്തിയ വൈവിധ്യമാർന്ന പരിപാടികൾ, ജൈവം 17 എന്നപേരിൽ പിണറായി പഞ്ചായത്തിൽ നടത്തിയ സമ്പൂർണ ജൈവകൃഷി ബോധവത്കരണം, ഒരു വർഷത്തിനിടെ 12 സ്നേഹവീടുകൾ നിർമിച്ചു നൽകിയത് എന്നിവയുൾപ്പെടെയുള്ള പ്രവർത്തനങ്ങളാണ് കണ്ണൂർ സർവകലാശാലയെ പുരസ്കാരത്തിന് അർഹമാക്കിയത്.