മൂവാറ്റുപുഴ: ദീപികയെ ഒരു വികാരമായി നെഞ്ചിലേറ്റിയ ദീപിക ഫ്രണ്ട്സ് ക്ലബ്ബിന്‍റെ ദ്വിദിന സംസ്ഥാനതല സംഗമം മൂവാറ്റുപുഴ നെസ്റ്റ് പാസ്റ്ററൽ സെന്‍ററിൽ ആരംഭിച്ചു. ഡിഎഫ്സി സംസ്ഥാന പ്രസിഡന്‍റ് ഡോ. സണ്ണി വി. സഖറിയ അധ്യക്ഷത വഹിച്ച സമ്മേളനത്തിൽ കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ നേതൃസംഗമം ഉദ്ഘാടനം ചെയ്തു. സഭയും സമുദായവും കൂടുതൽ ഐക്യത്തിലേക്കു വളരേണ്ട സമയമായിരിക്കുന്നുവെന്നു മാർ ജോർജ് മഠത്തിക്കണ്ടത്തിൽ ചൂണ്ടിക്കാട്ടി.
കേരളസഭ പ്രതിസന്ധികളിലൂടെ കടന്നുപോകുകയാണ്. ജലപ്രളയത്തെയും അതോടൊപ്പം മാധ്യമപ്രളയത്തെയും എങ്ങനെ അതിജീവിക്കാൻ സാധിക്കുമെന്നു നാം ചിന്തിക്കേണ്ട കാലഘട്ടമാണിത്. സഭയെ ആക്രമിച്ചു തളർത്താൻ ഒത്തിരി പരിശ്രമങ്ങൾ ചുറ്റും നടക്കുന്നു. നാം ഒന്നിച്ചുനിൽക്കേണ്ടതിന്‍റെ ആവശ്യകത മനസിലാക്കണം. ഒറ്റതിരിഞ്ഞ് ആക്രമിച്ചു നമ്മളെ ഇല്ലായ്മ ചെയ്യാമെന്നു ചില ശക്തികൾ വിചാരിക്കുന്നു. അതിനെ പരാജയപ്പെടുത്തേണ്ടതു ഒന്നിച്ചുനിന്നാണ്.
ഡിഎഫ്സി വെറുമൊരു ക്ലബ്ബ ല്ല, ഒന്നിച്ചുനിന്നു സഭയെ സംരക്ഷിക്കേണ്ടവരാണ്. വലിയ ഉത്തരവാദിത്വമാണു സഭയിൽ ഡിഎഫ്സിക്കുള്ളത്. ദീപികയുടെ പ്രാധാന്യവും മൂല്യവും ഓരോ കുടുംബവും തിരിച്ചറിയേണ്ട സമയമാണ്. പരസ്പരം അറിയാനും വളരാനും ഡിഎഫ്സിയുടെ നേതൃസംഗമങ്ങൾ ഉപകാരപ്പെടുമെന്നും മാർ മഠത്തിക്കണ്ടത്തിൽ പറഞ്ഞു. രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടർ മോണ്. ഡോ. മാണി പുതിയിടം ആമുഖപ്രസംഗം നടത്തി.
മഴുവഞ്ചേരി സ്പെഷാലിറ്റി ഡെന്‍റൽ ക്ലിനിക് ഡയറക്ടർ ഡോ. ജിജോ പോൾ, വീവിംഗ് ബേർഡ് വസ്ത്രസ്ഥാപനത്തിന്‍റെ ഡയറക്ടർ എസ്. ജിബിൻ എന്നിവരെ ചടങ്ങിൽ രാഷ്‌ട്രദീപിക കന്പനി ആദരിച്ചു. ദീപിക മാർക്കറ്റിംഗ് ജനറൽ മാനേജർ കെ.സി. തോമസ് ഇരുവരെയും പരിചയപ്പെടുത്തി. എൽദോ ഏബ്രഹാം എംഎൽഎ രാഷ്‌ട്രദീപികയുടെ ഉപഹാരം സമ്മാനിച്ചു. മാർ ജോർജ് മഠത്തിക്കണ്ടത്തിൽ പൊന്നാടയണിയിച്ചു.
കോതമംഗലം രൂപത വികാരി ജനറാൾ മോണ്. ഡോ. ജോർജ് ഓലിയപ്പുറം, ദീപിക കൊച്ചി റസിഡന്‍റ് മാനേജർ ഫാ. മാത്യു കിലുക്കൻ തുടങ്ങിയവർ പ്രസംഗിച്ചു. കോതമംഗലം സോണ് പ്രസിഡന്‍റ് ജിബോയിച്ചൻ വടക്കൻ സ്വാഗതവും സംസ്ഥാന ജനറൽ സെക്രട്ടറി പോളി അഗസ്റ്റിൻ നന്ദിയും പറഞ്ഞു.
‘മാറുന്ന കാലഘട്ടം-ഉണരേണ്ട ക്രൈസ്തവ നേതൃത്വം-മാധ്യമ വെല്ലുവിളി’ എന്ന വിഷയത്തിൽ മോണ്. ഡോ. മാണി പുതിയിടം, ‘ക്രൈസ്തവാസ്തിത്വം വാർത്തകളിലൂടെ’ എന്ന വിഷയത്തിൽ ദീപിക ചീഫ് എഡിറ്റർ ഫാ. ബോബി അലക്സ് മണ്ണംപ്ലാക്കൽ, ‘ഒറ്റയ്ക്കു വളർന്നൊടുങ്ങണോ, ഒരുമിച്ചുവളരാൻ തുടങ്ങണോ’ എന്ന വിഷയത്തിൽ ഡിഎഫ്സി സംസ്ഥാന ഡയറക്ടർ ഫാ. റോയി കണ്ണൻചിറ സിഎംഐ, ‘ക്രൈസ്തവ ജീവിതവും മാധ്യമങ്ങളും’ എന്ന വിഷയത്തിൽ ഡിഎഫ്സി സംസ്ഥാന ജോയിന്റ് ഡയറക്ടർ ഫാ. ജിനോ പുന്നമറ്റത്തിൽ എന്നിവർ ക്ലാസെടുത്തു.
മാധ്യമ അവബോധത്തിലേക്ക്, നസ്രാണി പാരന്പര്യവും മൂല്യസംരക്ഷണവും എന്നീ വിഷയങ്ങളിൽ ഗ്രൂപ്പുചർച്ചയും റിപ്പോർട്ട് അവതരണം, അവലോകനം, ചോദ്യോത്തരവേദി തുടങ്ങിയവയും നടന്നു.
സമാപനദിനമായ ഇന്നു രാവിലെ 8.30നു പുതിയ സംസ്ഥാന ഭാരവാഹികളുടെ സത്യപ്രതിജ്ഞ നടക്കും. തുടർന്ന് ‘നിയമക്കുരുക്കിലാകുന്ന മാധ്യമപ്രവർത്തനം’ എന്ന വിഷയത്തിൽ ദീപിക സീനിയർ അസോസിയേറ്റ് എഡിറ്റർ റ്റി.സി. മാത്യുവും ‘ദീപിക ഫ്രണ്ട്സ് ക്ലബിന്‍റെ ഫലദായക പ്രവർത്തനരീതി’ എന്ന വിഷയത്തിൽ ഫാ. ജിനോ പുന്നമറ്റത്തിലും ‘ഡിഎഫ്സിയും പുതുയുഗപ്പിറവിയും’ എന്ന വിഷയത്തിൽ ഫാ. റോയി കണ്ണൻചിറ സിഎംഐയും ക്ലാസെടുക്കും. മോണ്. ഡോ. മാണി പുതിയിടം സമാപനസന്ദേശം നൽകും.
രണ്ടു ദിവസം നീണ്ടുനിൽക്കുന്ന നേതൃസംഗമത്തിനു ദീപിക ഡെപ്യൂട്ടി ജനറൽ മാനേജർ -സർക്കുലേഷൻ ജോസഫ് ഓലിക്കൽ, ഡിഎഫ്സി സംസ്ഥാന ട്രഷറർ ടോമി തുരുത്തിക്കര, കോതമംഗലം സോണ് ജോയിന്റ് ഡയറക്ടർ ഫാ. സെബാസ്റ്റ്യൻ പോത്തനാമൂഴി, പ്രസിഡന്‍റ് ജിബോയിച്ചൻ വടക്കൻ, സംസ്ഥാന ഉപദേശസമിതി അംഗങ്ങളായ ജോയി നടുക്കുടി, ഡിഗോൾ കെ. ജോർജ്, സോണ് ഭാരവാഹികളായ തോമസ് കുണിഞ്ഞി, ടോം ജെ. കല്ലറയ്ക്കൽ, സിബി പൊതൂർ, പോൾ ലൂയിസ്, മിനി മാനുവൽ, ലൂസി മൈക്കിൾ, റോസിലി ജേക്കബ്, മെറ്റി ടോബൻ തുടങ്ങിയവർ നേതൃത്വം നൽകുന്നു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.