തിരുവനന്തപുരം: ഉന്നതവിദ്യാഭ്യാസകേന്ദ്രങ്ങള്, ഗവേഷണ സ്ഥാപനങ്ങള് എന്നിവയുമായി സഹകരിച്ച് ഹയര് സെക്കന്ഡറി വിഭാഗം അധ്യാപകര്ക്ക് സേവനകാല പരിശീലനം നല്കുന്നതിന്റെ സംസ്ഥാനതല ഉദ്ഘാടനം നാളെ രാവിലെ 10ന് തിരുവനന്തപുരം ഗവ. വിമന്സ് കോളജില് പൊതുവിദ്യാഭ്യാസ മന്ത്രി പ്രഫ. സി. രവീന്ദ്രനാഥ് നിര്വഹിക്കും.
വിദ്യാര്ഥികള്ക്ക് മികച്ച പഠനാനുഭവങ്ങള് ഒരുക്കി ഹയര്സെക്കന്ഡറി വിദ്യാഭ്യാസം ശക്തിപ്പെടുത്താന് അധ്യാപകരെ സജ്ജരാക്കുകയാണ് ഇതിന്റെ ലക്ഷ്യം. ശില്പ്പശാലാ മാതൃകയില് മുഴുവന് സമയപങ്കാളിത്തത്തോടെയുള്ള റസിഡന്ഷ്യല് കോഴ്സായാണു പരിശീലനം. പത്തു ദിവസം നീണ്ടുനില്ക്കുന്ന ടീച്ചര് ട്രാന്സ്ഫോര്മേഷന് പ്രോഗ്രാമില് ഗവേഷണ പരിപാടികള്, അതിഥി പ്രഭാഷണങ്ങള്, ചര്ച്ചകള്, സംവാദങ്ങള്, ലാബ്-ലൈബ്രറി പ്രവര്ത്തനങ്ങള്, ഫീല്ഡ് ട്രിപ്പ്, കലാസ്വാദനവേളകള്, അവതരണങ്ങള്, വിവിധ വൈദഗ്ധ്യ മേഖലകളിലുള്ള പരിശീലനങ്ങള് തുടങ്ങിയവയാണ് ഉള്പ്പെടുത്തിയിട്ടുള്ളത്.
കേരളത്തിലെ ഏറ്റവും മികച്ച ബിരുദാനന്തര ബിരുദ പഠനസൗകര്യമുള്ള കോളജുകളാണു പഠനകേന്ദ്രങ്ങളായി തെരഞ്ഞെടുത്തിട്ടുള്ളത്. ഉന്നതവിദ്യാഭ്യാസ കേന്ദ്രങ്ങളിലെ ലൈബ്രറി, ലാബ്, മള്ട്ടീമിഡിയാ സൗകര്യങ്ങള് തുടങ്ങിയവയും ഗവേഷണ സ്ഥാപനം എന്ന നിലയിലുള്ള മികവുകളും പരിശീലനത്തിനായി പ്രയോജനപ്പെടുത്തുക എന്നതാണ് ഇതിലൂടെ ലക്ഷ്യമാക്കുന്നത്. നിശ്ചിത കാലയളവിനുള്ളില് മുഴുവന് അധ്യാപകരും കോഴ്സ് പൂര്ത്തീകരിക്കണം. തെരഞ്ഞെടുക്കപ്പെടുന്ന നാല്പ്പതു പേര്ക്കാണ് ഒരു കേന്ദ്രത്തിലെ ഒരു വിഷയത്തിന് പ്രവേശനം നല്കുന്നത്. ഒരു വിഷയത്തിന് രണ്ടു കേന്ദ്രങ്ങള് വീതം ഒരുക്കിയിട്ടുണ്ട്.
മലയാളം, ഇംഗ്ലീഷ്, മാത്തമാറ്റിക്സ്, ഫിസിക്സ്, കെമിസ്ട്രി, ബയോളജി, ഹിസ്റ്ററി, ഇക്കണോമിക്സ്, പൊളിറ്റിക്കല് സയന്സ്, കൊമേഴ്സ് എന്നീ വിഷയങ്ങള്ക്കാണ് ഈ വര്ഷം കോഴ്സ് സംഘടിപ്പിക്കുന്നത്.
ഉദ്ഘാടന ചടങ്ങില് പൊതുവിദ്യാഭ്യാസവകുപ്പ് സെക്രട്ടറി, കോളജ് വിദ്യാഭ്യാസ ഡയറക്ടര്, പൊതുവിദ്യാഭ്യാസ ഡയറക്ടര്, എസ്സിഇആര്ടി ഡയറക്ടര്, തുടങ്ങിയവര് സംസാരിക്കും.
കോഴ്സ് നടക്കുന്ന സ്ഥാപനങ്ങള് - ഗവ. കോളജ് കോഴിക്കോട് (ഹിസ്റ്ററി), ഗവ. കോളജ് മടപ്പള്ളി (ഫിസിക്സ്), ബ്രണ്ണന് കോളജ് (മലയാളം, കൊമേഴ്സ്), ഗവ. കോളജ കാസര്ഗോഡ് (ഇക്കണോമിക്സ്), മഹാരാജാസ് എറണാകുളം (പൊളിറ്റിക്കല് സയന്സ്, ബയോളജി), ഗവ. കോളജ് ചിറ്റൂര് (മാത്തമെറ്റിക്സ്), ഗവ. കോളജ്, തൃപ്പൂണിത്തുറ (ഇംഗ്ലീഷ്), വിമന്സ് കോളജ്, തിരുവനന്തപുരം (കെമിസ്ട്രി, കൊമേഴ്സ്), ഇന്സ്റ്റിറ്റ്യൂട്ട് ഓഫ് ഇംഗ്ലീഷ് (ഇംഗ്ലീഷ്), യൂണിവേഴ്സിറ്റി കോളജ്, തിരുവനന്തപുരം (ബയോളജി, ഫിസിക്സ്), ഗവ. കോളജ്, നെടുമങ്ങാട് (ഹിസ്റ്ററി), കുസാറ്റ് (ഇക്കണോമിക്സ്), സെന്റ്. ജോണ്സ്, അഞ്ചല് (പൊളിറ്റിക്കല് സയന്സ്), എസ്എന്ജി കോളജ്, പട്ടാമ്പി (കെമിസ്ട്രി, മലയാളം).