കൊച്ചി: അബുദാബിയിൽ സമാപിച്ച സ്പെഷൽ ഒളിന്പിക്സിൽ കേരളത്തിനും രാജ്യത്തിനും അഭിമാനനേട്ടം കൈവരിച്ച ഇന്ത്യൻ ടീമിലെ മലയാളി താരങ്ങൾ മടങ്ങിയെത്തി. നെടുന്പാശേരി വിമാനത്താവളത്തിൽ ടീമിന് ഊഷ്മള വരവേൽപു നൽകി.
83 സ്വർണവും 153 വെള്ളിയും 124 വെങ്കലവുമുൾപ്പെടെ 362 മെഡലുകൾ വാരിക്കൂട്ടിയാണ് ഇന്ത്യൻ ടീം റിക്കാർഡ് നേട്ടം സ്വന്തമാക്കിയത്.
ഇതിൽ മൂന്നു സ്വർണവും 16 വെള്ളിയും 11 വെങ്കലവും മലയാളി മിടുക്കരുടെ സംഭാവനയാണ്. ഗെയിംസിന്‍റെ ചരിത്രത്തിൽ ഇന്ത്യയുടെ ഏറ്റവും വലിയ നേട്ടമാണിത്. 284 അത്‌ലറ്റുകളും 71 പരിശീലകരുമടങ്ങുന്ന സംഘമാണ് ഇന്ത്യയ്ക്കായി സ്പെഷൽ ഒളിന്പിക്സിൽ പങ്കെടുത്തത്. കേരളത്തിൽനിന്ന് 24 പേർ മെഡൽ നേടി.
വിശ്വനാഥ് (അക്വാട്ടിക്സ്), എം. എസ്. ശ്രുതി (ബാഡ്മിന്‍റണ്‍), ഫർസീൻ (ഹാൻഡ്ബോൾ) എന്നിവരാണ് സ്വർണനേട്ടം കൈവരിച്ച മലയാളികൾ.
എം.എസ്. സൂര്യ, ആര്യ, ഗോകുൽ മനോജ്, പി. വിറ്റോ, ആതിര സോമൻ, ജ്യോതി, റിൻലി, അഭിലാഷ് ടോണി, ഡെസിമോൾ, ഷിമിതി എന്നിവർ വെള്ളിമെഡൽ നേടി. സൈക്കിളിംഗിൽ അപ്ലോണിയ ജോർജ് രണ്ടു വെങ്കലം സ്വന്തമാക്കി. ശ്രുതി, ത്രേസ്യ, മഞ്ജു, ബിജിമോൾ, വിമൽ, രാഹുൽ, സാലു എന്നിവരും വെങ്കലജേതാക്കളാണ്.
195 രാജ്യങ്ങളിൽനിന്ന് ഏഴായിരത്തോളം അത്‌ലറ്റുകളും നാലായിരത്തോളം പരിശീലകരും 20000 വോളണ്ടിയർമാരും സ്പെഷൽ ഒളിന്പിക്സിനായി അബുദാബിയിൽ എത്തിയിരുന്നു. അബുദാബിയിലെ എട്ടും ദുബായിലെ രണ്ടും വേദികളിലാണു മത്സരങ്ങൾ നടന്നത്. സ്പെഷൽ ഒളിന്പിക്സ് ഭാരത് എന്ന പേരിലാണ് ഇന്ത്യ മേളയിൽ പങ്കെടുത്തത്.
കേരളതാരങ്ങളെ എസ്ഒബി കേരള പ്രോഗ്രാം മാനേജരും മണ്ണയ്ക്കനാട് ഹോളിക്രോസ് സ്പെഷൽ സ്കൂൾ പ്രിൻസിപ്പലുമായ സിസ്റ്റർ റാണി ജോ, തൊടുപുഴ പ്രതീക്ഷാഭവൻ സ്പെഷൽ സ്കൂളിലെ കായികാധ്യാപിക ജെയ്നമ്മ, ഏറ്റുമാനൂർ സാൻജോസ് സ്പെഷൽ സ്കൂളിലെ കായികാധ്യാപകൻ ഷിബു എന്നിവർ നയിച്ചു. സംസ്ഥാനത്തു വിവിധ സ്പെഷൽ സ്കൂളുകളിൽ പരിശീലനം നേടുന്ന ഭിന്നശേഷിയുള്ള വിദ്യാർഥികളാണു മേളയിൽ പങ്കെടുത്തത്.
ചെയർമാൻ ഡോ. എം.കെ. ജയരാജ്, വൈസ് ചെയർപേഴ്സണ്‍ പി. രാജലക്ഷ്മി, ഏരിയാ ഡയറക്ടർ ഫാ. റോയി കണ്ണൻചിറ, ജോയിന്റ് സെക്രട്ടറി സിസ്റ്റർ റാണി, ട്രഷറർ ദീപു ജോണ്, സ്റ്റേറ്റ് സ്പോർട്സ് ഡയറക്ടർ എം. മൻസൂർ, ഡിസെബിലിറ്റി എക്സ്പർട്ട് സുശീല കുര്യച്ചൻ എന്നിവരടങ്ങുന്ന സംസ്ഥാന സമിതിയും ജില്ലാ കോ -ഓർഡിനേറ്റർമാരുമാണു കേരളത്തിൽ സ്പെഷൽ ഒളിന്പിക്സിനു നേതൃത്വം നൽകുന്നത്.
അബുദാബിയിൽ നടന്ന സ്പെഷൽ ഒളിന്പിക്സിലെ ശ്രദ്ധേയനേട്ടം സ്പെഷൽ സ്കൂൾ പ്രവർത്തകർക്കും മാതാപിതാക്കൾക്കും സമർപ്പിക്കുന്നുവെന്നു ഡോ. എം.കെ. ജയരാജ്, ഫാ. റോയി കണ്ണൻചിറ എന്നിവർ പറഞ്ഞു.
വിമാനത്താവളത്തിൽ സ്പോർട്സ് കൗണ്‍സിൽ ജില്ലാ പ്രസിഡന്‍റ് പി.വി. ശ്രീനിജൻ, എസ്ഒബി കേരള ഭാരവാഹികൾ തുടങ്ങിയവർ ചേർന്നു ടീമംഗങ്ങൾക്കു വരവേല്പു നൽകി.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.