ഉപതെരഞ്ഞെടുപ്പ് : പ്രധാനപ്പെട്ട തസ്തികകളിൽ കൂട്ട സ്ഥലംമാറ്റം : Deepika.com Kerala News |

Click here for detailed news of all items

ഉപതെരഞ്ഞെടുപ്പ് : പ്രധാനപ്പെട്ട തസ്തികകളിൽ കൂട്ട സ്ഥലംമാറ്റം

Saturday, September 14, 2019 12:59 AM IST

കണ്ണൂർ: നിയമസഭാ ഉപതെരഞ്ഞെടുപ്പു നടക്കാനിരിക്കുന്ന മണ്ഡലങ്ങളുടെ പരിധികളിൽ തഹസിൽദാർ, ഡെപ്യൂട്ടി തഹസിൽദാർ, റിട്ടേണിംഗ് ഓഫീസർ തസ്തികകളിലേക്ക് ഭരണാനുകൂല സംഘടനയിൽപ്പെട്ടവരെ നിയമിച്ചുകൊണ്ടുള്ള സർക്കാർ ഉത്തരവ് വിവാദത്തിലേക്ക്.

പുതിയ വോട്ടർമാരെ ചേർക്കുക, പേര് വെട്ടിമാറ്റുക തുടങ്ങി വോട്ടർ പട്ടികയുമായി ബന്ധപ്പെട്ട കാര്യങ്ങൾ കൈകാര്യം ചെയ്യാൻ ഉത്തരവാദപ്പെട്ട റിട്ടേണിംഗ് ഓഫീസർ, തഹസിൽദാർ, ഇലക്‌ഷൻ ഡെപ്യൂട്ടി തഹസിൽദാർ, ഇലക്‌ഷൻ ഡെപ്യൂട്ടി കളക്‌ടർ എന്നിവരെ മാറ്റി നിയമിച്ചുകൊണ്ടാണ് സർക്കാർ ഉത്തരവായത്. വോട്ടർപട്ടികയിൽ തിരിമറി നടത്തിയും മറ്റും തെരഞ്ഞെടുപ്പു ഫലം തങ്ങൾക്കനുകൂലമാക്കി മാറ്റുന്നതിനുവേണ്ടി ഇടതുപക്ഷ സർക്കാർ നടത്തിയ നീക്കമാണിതെന്ന് പ്രതിപക്ഷ സംഘടനാ നേതാക്കൾ ആരോപിച്ചു.

നിലവിൽ പ്രസ്തുത തസ്തികയിലിരിക്കുന്നവരിൽ വേണ്ടപ്പെട്ടവരെ നിലനിർത്തുകയും മറ്റുള്ളവരെ മാറ്റി ഇടതുപക്ഷ അനുകൂലികളെ പുതുതായി നിയമിക്കുകയുംചെയ്തുവെന്നാണ് ആരോപണം.

കണ്ണൂർ താലൂക്ക് തഹസിൽദാർ വി.എം. സജീവനെ മഞ്ചേശ്വരം താലൂക്ക് തഹസിൽദാരായാണ് മാറ്റിയിരിക്കുന്നത്. തിരുവനന്തപുരം താലൂക്ക് തഹസിൽദാർ ജി.കെ. സുരേഷ് കുമാറിനെ പുനലൂർ താലൂക്ക് തഹസിൽദാരായും കോന്നി താലൂക്ക് തഹസിൽദാർ സി.ആർ. സോമനാഥൻ നായരെ കോന്നി താലൂക്ക് തഹസിൽദാരായും (എൽആർ) ചേർത്തല താലൂക്ക് തഹസിൽദാർ ആർ. ഉഷയെ എറണാകുളം ജിസിഡിഎയിൽ സ്പെഷൽ തഹസിൽദാരാ(എൽആർ)യും കണയന്നൂർ താലൂക്ക് തഹസിൽദാർ ബീന പി. ആനന്ദിനെ കോതമംഗലം താലൂക്ക് തഹസിൽദാരായും പുനലൂർ താലൂക്ക് തഹസിൽദാർ ജി. നിർമൽകുമാറിനെ തിരുവനന്തപുരം താലൂക്ക് തഹസിൽദാരായും തിരുവനന്തപുരം ലാൻഡ് ബോർഡ് സീനിയർ സൂപ്രണ്ട് എൻ. ബാലസുബ്രഹ്‌മണ്യനെ കോന്നി താലൂക്ക് തഹസിൽദാരായും മല്ലപ്പള്ളി താലൂക്ക് തഹസിൽദാർ (എൽആർ) റോയ് തോമസിനെ ചേർത്തല താലൂക്ക് തഹസിൽദാരായും കോതമംഗലം താലൂക്ക് തഹസിൽദാർ എം.ഡി. ലാലുവിനെ കണയന്നൂർ താലൂക്ക് തഹസിൽദാരായും കോന്നി താലൂക്ക് തഹസിൽദാർ (എൽആർ) റോഷ്ന ഹൈദ്രോസിനെ മല്ലപ്പള്ളി താലൂക്ക് തഹസിൽദാരായും (എൽആർ) മാറ്റി നിയമിച്ചു.

കൊല്ലം കളക്‌ടറേറ്റിലെ അജിത് ജോയിയെ തിരുവനന്തപുരം താലൂക്ക് ഇലക്‌ഷൻ ഡെപ്യൂട്ടി തഹസിൽദാരായും തിരുവനന്തപുരത്തെ കെ.ജി. മോഹൻരാജിനെ കൊല്ലത്തേക്കും ആലപ്പുഴയിലെ പി.എ. സജീവ് കുമാറിനെ കണയന്നൂർ താലൂക്ക് ഇലക്‌ഷൻ ഡെപ്യൂട്ടി തഹസിൽദാരായും എറണാകുളത്തെ മധുസൂദനൻ നമ്പൂതിരിയെ ചേർത്തല താലൂക്ക് ഇലക്‌ഷൻ ഡെപ്യൂട്ടി തഹസിൽദാരായും കണ്ണൂരിലെ കെ.കെ. ശശിയെ മഞ്ചേശ്വരം താലൂക്ക് ഇലക്‌ഷൻ ഡെപ്യൂട്ടി തഹസിൽദാരായും പത്തനംതിട്ടയിലെ സി. ഗംഗാധരൻ തമ്പിയെ കോന്നി താലൂക്ക് ഇലക്‌ഷൻ ഡെപ്യൂട്ടി തഹസിൽദാരായുമാണ് നിയമിച്ചിരിക്കുന്നത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.