അവയവ കച്ചവടം, മരുന്നുപരീക്ഷണം എന്നിവയ്ക്കും കുട്ടികള്‍ ഇരയാക്കപ്പെടുന്നു. ഒളിച്ചോടുന്നവര്‍ കൂടുതലും എത്തിപ്പെടുന്നത് സെക്സ് റാക്കറ്റുകളുടെയോ മനുഷ്യക്കടത്തുകാരുടെയോ കരങ്ങളിലാണ്. ഇവരില്‍ പലരും കൊല്ലപ്പെടുന്നതായി നാഷണല്‍ ക്രൈം റിക്കാര്‍ഡ്സ് ബ്യൂറോ വിലയിരുത്തുന്നു.
കുട്ടികളെ അംഗഭംഗം വരുത്തി ഭിക്ഷാടനത്തിന് ഉപയോഗിക്കുന്ന മാഫിയ എക്കാലത്തുമുണ്ട്. ആന്ധ്ര, തമിഴ്നാട്, മുംബൈ, ഡല്‍ഹി തുടങ്ങി ദേശീയതലത്തില്‍ കണ്ണികളുള്ള ഭിക്ഷാടക മാഫിയ ഒട്ടേറെ കഞ്ഞുങ്ങളെ കേരളത്തില്‍നിന്ന് മോഷ്ടിച്ചുകൊണ്ടുപോയിട്ടുണ്ട്.
തെരുവില്‍ അലയുകയും ഉറങ്ങുകയും ചെയ്യുന്ന കുഞ്ഞുങ്ങളെ ഇക്കൂട്ടര്‍ അപഹരിച്ച സംഭവങ്ങളും പലതാണ്. കുട്ടികളെ റാഞ്ചിയെടുത്ത് വൃക്ക അടക്കമുള്ള അവയവങ്ങള്‍ എടുത്തശേഷം ഉപേക്ഷിക്കുന്നതും അസാധാരണമല്ല. വര്‍ധിച്ചുവരുന്ന സെക്സ് ടൂറിസവും കുട്ടികളുടെ തിരോധാനത്തില്‍ വലിയ പങ്ക് വഹിക്കുന്നു.
മാതാപിതാക്കളുടെയും ബന്ധുക്കളുടെയും നെഞ്ചില്‍ തീയിട്ടുകൊണ്ടാണ് ഓരോ അപ്രത്യക്ഷമാകലും. നിസാര കാര്യങ്ങള്‍ക്കുപോലും മാതാപിതാക്കളോടു വഴക്കിട്ടു വീടുവിട്ടിറങ്ങുന്ന കുട്ടികളുണ്ട്.
ബസ് സ്റ്റാന്‍ഡിലോ റെയില്‍വേ സ്റ്റേഷനിലോ എത്തിപ്പെടുന്ന ഇവരെ റാഞ്ചാന്‍ അധോലോകസംഘങ്ങള്‍ കാത്തിരിപ്പുണ്ടാകും. ബാലവേലയ്ക്കോ അംഗഭംഗം വരുത്തി ഭിക്ഷാടനത്തിനോ ഇവരെ ഉപയോഗിക്കുന്നു.
നവമാധ്യമങ്ങള്‍ ഇക്കാലത്ത് കുട്ടികളെ വഴിതെറ്റിക്കുന്നതില്‍ ചെറുതല്ലാത്ത പങ്കുവഹിക്കുന്നു. പെണ്‍കുട്ടികളാണ് ഇങ്ങനെ പ്രണയക്കുരുക്കില്‍ വീണ് ചതിക്കപ്പെടുന്നത്.
2016 മുതല്‍ ഈ വര്‍ഷം മാര്‍ച്ച് വരെയുള്ള കാലയളവില്‍ കുട്ടികളെ തട്ടിക്കൊണ്ടു പോയതുമായി ബന്ധപ്പെട്ട് 1341 കേസുകളാണ് കേരളത്തില്‍ രജിസ്റ്റര്‍ ചെയ്തത്. ഇക്കൊല്ലം ഇതുവരെ 110 കേസുകള്‍ രജിസ്റ്റര്‍ ചെയ്തു. ഇതെല്ലാം തട്ടിക്കൊണ്ടു പോകല്‍ കേസുകളാണ്. ഇതിനു പുറമെയാണ് കുട്ടികളെ കാണാതാകുന്ന കേസുകള്‍.
2016 മുതല്‍ ഈ വര്‍ഷം ഏപ്രില്‍ വരെ കുട്ടികളും മുതിര്‍ന്ന സ്ത്രീ-പുരുഷന്‍മാരും ഉള്‍പ്പെടെ 63,176 പേരെ കാണാതായതായാണ് കേരള പോലീസ് രജിസ്റ്റര്‍ ചെയ്ത കണക്ക്. ഇതില്‍ ഭൂരിഭാഗം പേരെയും പിന്നീട് പല കാലയളവുകളിലായി കണ്ടെത്തി. എന്നാല്‍ ഇനിയും കണ്ടെത്താന്‍ കഴിയാതെ കാണാമറയത്ത് കഴിയുന്ന ഒരുപാട് പേരുണ്ടെന്ന് പോലീസ് പറയുന്നു.