ഇതിനു മുന്നോടിയായി സംഘടനാ പുനഃസംഘടന പൂർത്തിയാക്കാനും ശ്രമിക്കുന്നുണ്ട്. കെപിസിസി ജനറൽ സെക്രട്ടറി തലത്തിൽ ചില മാറ്റങ്ങൾ ഉണ്ടാകും. പ്രവർത്തനരംഗത്തു സജീവമല്ലാത്ത ചിലരെ മാറ്റും. അതോടൊപ്പം കെപിസിസി സെക്രട്ടറിമാരെയും നിയമിക്കേണ്ടതുണ്ട്.
പ്രവർത്തനത്തിൽ വേണ്ടതു പോലെ തിളങ്ങാൻ സാധിക്കാത്ത ഏതാനും ഡിസിസി പ്രസിഡന്‍റുമാർക്കും മാറ്റമുണ്ടാകും. ഇതു സംബന്ധിച്ച സംസ്ഥാന ഘടകത്തിന്‍റെ നിർദേശങ്ങൾ ഹൈക്കമാൻഡിന്‍റെ മുന്പാകെയുണ്ട്. തദ്ദേശ തെരഞ്ഞെടുപ്പിലേക്കു സംഘടനയെ സജ്ജമാക്കണമെങ്കിൽ പുതിയ ഭാരവാഹികളെ നിയമിക്കേണ്ടതുണ്ട്.
ഡിസിസി മുതൽ മണ്ഡലം തലം വരെയുള്ള നേതാക്കളെ നേരിൽകണ്ടു പ്രവർത്തനം വിലയിരുത്തുന്നതിനായി കേരളത്തിന്‍റെ ചുമതലയുള്ള എഐസിസി സെക്രട്ടറിമാരായ വി.കെ. അരിവഴകൻ, പി.വി. മോഹൻ, മൻസൂർ അലി ഖാൻ എന്നിവർ പര്യടനം ആരംഭിച്ചിട്ടുണ്ട്. തെക്ക്, മധ്യം, മലബാർ എന്നിങ്ങനെ മൂന്നു മേഖലകളാക്കി തിരിച്ചാണ് ഇവർ താഴേത്തട്ടിൽ വരെ എത്തുന്നത്.
താഴേത്തട്ടുവരെയുള്ള നേതാക്കളുടെ പ്രവർത്തനത്തിന്‍റെ ഗുണ, ദോഷങ്ങളും അവരുമായി നടത്തുന്ന കൂടിക്കാഴ്ചയിൽ നിന്നു ലഭിക്കുന്ന വിവരങ്ങളും അടങ്ങുന്ന റിപ്പോർട്ട് ഇവർ ഹൈക്കമാൻഡിനു സമർപ്പിക്കും. ഇതിന്‍റെ കൂടി അടിസ്ഥാനത്തിലാകും തദ്ദേശതെരഞ്ഞെടുപ്പിലേക്കുള്ള പാർട്ടിയുടെ തന്ത്രങ്ങൾക്ക് അന്തിമരൂപം നൽകുക.