ഇമ്രാൻ ഖാന് ജാമ്യമില്ലാ അറസ്റ്റ് വാറന്‍റ്
Wednesday, March 29, 2023 10:37 PM IST
ഇസ്‌ലാമാബാദ്: വനിതാ ജഡ്ജിയെ ഭീഷണിപ്പെടുത്തിയെന്ന കേസിൽ പാക്കിസ്ഥാനിലെ മുൻ പ്രധാനമന്ത്രി ഇമ്രാൻ ഖാനെതിരേ ഇസ്‌ലാമാബാദ് കോടതി ജാമ്യമില്ലാ വാറന്‍റ് പുറപ്പെടുവിച്ചു. ഇമ്രാനെ ഏപ്രിൽ 18നു മുന്പ് കോടതിയിൽ ഹാജരാക്കാനാണ് നിർദേശം.
ഓഗസ്റ്റിൽ നടത്തിയ പ്രസംഗത്തിൽ ഇസ്‌ലാമാബാദ് അഡീഷണൽ ജില്ലാ സെഷൻസ് ജഡ്ജി സേബാ ചൗധരിക്കും പോലീസിനും എതിരേ ഭീഷണി മുഴക്കിയെന്നതാണു കേസിനാധാരം.
ഇമ്രാനെതിരേ മുന്പും ജാമ്യമില്ലാ വാറന്‍റ് പുറപ്പെടുവിച്ചിരുന്നെങ്കിലും 24ന് ജാമ്യമെടുക്കാൻ കോടതി അനുവദിച്ചിരുന്നു. എന്നാൽ ഇന്നലെ കോടതിയിൽ ഹാജരാകണമെന്ന നിർദേശം ഇമ്രാൻ പാലിച്ചില്ല.
തൊഷാഖാന അഴിമതി കേസിലെ ജാമ്യമില്ലാ വാറന്‍റ് പ്രകാരം ഇസ്‌ലാമാബാദ് കോടതി നേരത്തേ ഇമ്രാനെ ലാഹോറിലെ വസതിയിൽനിന്ന് അറസ്റ്റ് ചെയ്യാൻ നടത്തിയ ശ്രമങ്ങൾ വലിയ സംഘർഷത്തിലാണു കലാശിച്ചത്.