വളർച്ചയിൽ കേരളം ഏറ്റവും പിന്നിൽ : Deepika.com Business News |

Click here for detailed news of all items

വളർച്ചയിൽ കേരളം ഏറ്റവും പിന്നിൽ

Wednesday, January 23, 2019 12:32 AM IST

മുംബൈ: കഴിഞ്ഞ സാന്പത്തിക വർഷം രാജ്യത്തെ ഏറ്റവും കുറഞ്ഞ സാന്പത്തിക വളർച്ച കേരളത്തിലെന്നു സ്വകാര്യ റേറ്റിംഗ് ഏജൻസി. ചില്ലറ വിലക്കയറ്റത്തിൽ കേരളം മുൻ പന്തിയിലുമാണ്.

വലുതും ഇടത്തരവുമായ 17 സംസ്ഥാനങ്ങളെ താരതമ്യം ചെയ്താണു ക്രിസിൽ റിസർച്ച് റിപ്പോർട്ട് തയാറാക്കിയത്. 2017-18-ലെ കേരളത്തിന്‍റെ ജിഡിപി വളർച്ച അഞ്ചു ശതമാനമാണ്. ഏറ്റവും മുന്നിൽ നിൽക്കുന്ന ബിഹാറിൽ 11.3 ശതമാനം വളർച്ച ഉണ്ടായി. ഗുജറാത്തിൽ 11.1ശതമാനവും.

ചില്ലറ വിലക്കയറ്റം കേരളത്തിലാണ് ഏറ്റവും കൂടുതൽ - ആറുശതമാനം. 2.2 ശതമാനം മാത്രം വിലക്കയറ്റവുമായി ഒഡീഷ അക്കാര്യത്തിൽ ഏറ്റവും മികച്ചതായി. സംസ്ഥാനത്തിന്‍റെ ധനകമ്മി കഴിഞ്ഞ വർഷം സംസ്ഥാന ജിഡിപിയുടെ 3.4 ശതമാനമായിരുന്നു. 2013-17 കാലയളവിലെ ശരാശരി ധനകമ്മിയാകട്ടെ 3.9 ശതമാനവും.

ധനകമ്മി കൂടിയതുമൂലം സംസ്ഥാന കടവും വർധിച്ചു. സംസ്ഥാന ജിഡിപിയുടെ 31.6 ശതമാനം വരും കടം. വളർച്ചയിൽ അയൽ സംസ്ഥാനങ്ങൾ കേരളത്തെ ബഹുദൂരം പിന്നിലാക്കി. തമിഴ്നാട് 8.1-ഉം കർണാടകം 9.3 -ഉം ശതമാനം വളർന്നു. ആ രണ്ടു സംസ്ഥാനങ്ങളിലും ധനകമ്മി 2.8 ശതമാനമേ ഉള്ളൂ.

വളർച്ചയിൽ പിന്നോട്ടു പോയതു സംസ്ഥാന സർക്കാരിന്‍റെ വരുമാനത്തെ ബാധിക്കുകയും അതു കമ്മി വർധിപ്പിക്കുകയുമാണ്. ഇതുമൂലം കടബാധ്യത കൂടുന്നു. 2013-ൽ സംസ്ഥാന ജിഡിപിയുടെ 26.7 ശതമാനമായിരുന്നു കടം. അത് 2018-ൽ 31.6 ശതമാനമായി.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.