അഞ്ച് കോടിക്കു മുകളിൽ വിറ്റുവരവുള്ളവർക്ക് ഓഗസ്റ്റ് മുതൽ ഇ-ഇൻവോയ്‌സിംഗ് : Deepika.com Business News |

Click here for detailed news of all items

അഞ്ച് കോടിക്കു മുകളിൽ വിറ്റുവരവുള്ളവർക്ക് ഓഗസ്റ്റ് മുതൽ ഇ-ഇൻവോയ്‌സിംഗ്

Saturday, May 20, 2023 12:36 AM IST

തിരുവനന്തപുരം: അഞ്ചു കോടി രൂപയ്ക്കു മുകളിൽ വാർഷിക വിറ്റുവരവുള്ള വ്യാപാരികളുടെ ബിസിനസ് - ടു - ബിസിനസ് വ്യാപാര ഇടപാടുകൾക്ക് ഓഗസ്റ്റ് ഒന്ന് മുതൽ ഇ - ഇൻവോയ്‌സിംഗ് നിർബന്ധമാക്കി.

2017-2018 സാമ്പത്തിക വർഷം മുതൽ, മുൻ സാമ്പത്തികവർഷങ്ങളിൽ ഏതെങ്കിലും വർഷത്തിൽ അഞ്ചു കോടിയോ അധികമോ വാർഷിക വിറ്റ് വരവുള്ള വ്യാപാരികൾ ഓഗസ്റ്റ് ഒന്ന് മുതൽ ഇ - ഇൻവോയ്‌സ് തയാറാക്കണം.

ഇ - ഇൻവോയ്‌സിങ് ബാധകമായ വ്യാപാരികൾ നികുതി ബാധ്യതയുള്ള ചരക്കുകൾക്കും, സേവനങ്ങൾക്കും കൂടാതെ വ്യാപാരി നൽകുന്ന ക്രഡിറ്റ്/ഡെബിറ്റ് നോട്ടുകൾക്കും ഇ - ഇൻവോയ്‌സ് തയാറാക്കണം. നിലവിൽ 10 കോടി രൂപയിലധികം വിറ്റുവരവുള്ള വ്യാപാരങ്ങൾക്കാണ് ഇ-ഇൻവോയ്‌സിംഗ് നിർബന്ധമാക്കിയിട്ടുള്ളത്. ഇതാണ് ഓഗസ്റ്റ് മുതൽ അഞ്ചു കോടി രൂപയായി കുറച്ചത്.

ഇ - ഇൻവോയ്‌സ് എടുക്കാൻ ബാധ്യതയുള്ള വ്യാപാരികൾ ചരക്കുനീക്കം നടത്തുന്നതിന് മുൻപ് തന്നെ ഇ-ഇൻവോയ്‌സിംഗ് നടത്തണം. ഇതിനായി 2023 ഓഗസ്റ്റ് ഒന്നിനു മുൻപായി ഇ -ഇൻവോയ്‌സ് പോർട്ടലായ https://einvoice1.gst.gov.in ൽ രജിസ്റ്റർ ചെയ്ത് ‘യൂസർ ക്രെഡൻഷ്യൽസ് ’ കൈപ്പറ്റണം. ഇ-വേ ബിൽ പോർട്ടലിൽ ‘യൂസർ ക്രെഡൻഷ്യൽസ്’ ഉള്ള വ്യാപാരികൾക്ക് അതിനായുള്ള യൂസർ ഐഡിയും പാസ്‌വേർഡും ഉപയോഗിച്ച് ഇ- ഇൻവോയ്‌സിംഗ് പോർട്ടലിൽ ലോഗ് ഇൻ ചെയ്യാം.

ഇ-ഇൻവോയ്‌സിംഗ് ബാധ്യതയുള്ള വ്യാപാരി ഇൻവോയ്‌സ് നടത്തിയില്ലെങ്കിൽ സ്വീകർത്താവിന് ഇന്പുട് ടാക്‌സ് ക്രെഡിറ്റിന് അർഹതയുണ്ടാവില്ല.

ജിഎസ്ടി നിയമ പ്രകാരം നികുതിരഹിതമായ ചരക്കുകൾ കൈകാര്യം ചെയ്യുന്ന വ്യാപാരികൾക്ക് ഇ- ഇൻവോയ്‌സിംഗ് ആവശ്യമില്ല. സെസ് യൂണിറ്റുകൾ, ഇൻഷ്വറൻസ്, നോൺ ബാങ്കിങ് ഫിനാൻഷ്യൽ കമ്പനികൾ അടക്കമുള്ള ബാങ്കിംഗ് മേഖല, ഗുഡ്‌സ് ട്രാൻസ്‌പോർട്ടിംഗ് ഏജൻസികൾ, പാസഞ്ചർ ട്രാൻസ്‌പോർട് സർവീസ്, മൾട്ടിപ്ലെക്‌സ് സിനിമ അഡ്മിഷൻ, എന്നീ മേഖലകളെയും ഇ - ഇൻവോയ്‌സിംഗിൽനിന്ന് ഒഴിവാക്കിയിട്ടുണ്ട്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.