എൽ ക്ലാസിക്കോയിൽ 100 ജയം തികച്ച് ബാഴ്സ : Deepika.com Sports News |

Click here for detailed news of all items

എൽ ക്ലാസിക്കോയിൽ 100 ജയം തികച്ച് ബാഴ്സ

Tuesday, March 21, 2023 1:10 AM IST

ബാഴ്സലോണ: ലോക ക്ലബ് ഫുട്ബോളിലെ ആവേശപ്പോരാട്ടമായ എൽ ക്ലാസിക്കോയിൽ പിന്നിൽ നിന്നശേഷം എഫ്സി ബാഴ്സലോണ 2-1ന് റയൽ മാഡ്രിഡിനെ കീഴടക്കി.

സ്പാനിഷ് ലാ ലിഗയിൽ അരങ്ങേറിയ എൽ ക്ലാസിക്കോയിൽ ഇഞ്ചുറി ടൈമിന്‍റെ രണ്ടാം മിനിറ്റിൽ ഫ്രാങ്ക് കെസിയെ നേടിയ ഗോളിലായിരുന്നു എഫ്സി ബാഴ്സലോണയുടെ ജയം.

ഇതോടെ എൽ ക്ലാസിക്കോയിൽ എഫ്സി ബാഴ്സലോണ 100 ജയം തികച്ചു. ഈ സീസണിലെ നാലാം എൽ ക്ലാസിക്കോയ്ക്കാണു ബാഴ്സയുടെ തട്ടകമായ കാന്പ് നൗ സാക്ഷ്യം വഹിച്ചത്. ബാഴ്സയുടെ തുടർച്ചയായ മൂന്നാം എൽ ക്ലാസിക്കോ ജയമാണിത്.

മത്സരത്തിന്‍റെ ഒന്പതാം മിനിറ്റിൽ റൊണാൾഡ് അരൗജോയുടെ സെൽഫ് ഗോളിൽ റയൽ മാഡ്രിഡ് 1-0ന്‍റെ ലീഡ് നേടി. എന്നാൽ, ആദ്യപകുതിയുടെ അവസാനം സെർജി റോബർട്ടോ (45’) ബാഴ്സയെ ഒപ്പമെത്തിച്ചു. മത്സരം തീരാൻ 10 മിനിറ്റ് ശേഷിക്കേ റയൽ മാഡ്രിഡ് അസെൻസിയോയിലൂടെ ബാഴ്സയുടെ വല കുലുക്കി. എന്നാൽ, വിഎആറിലൂടെ റഫറി ഓഫ് സൈഡ് വിധിച്ചു.

100: ഒന്നാമൻ ബാഴ്സ

ചരിത്രത്തിൽ റയൽ മാഡ്രിഡിനെതിരേ 100 ജയം സ്വന്തമാക്കുന്ന ആദ്യ ടീമാണ് എഫ്സി ബാഴ്സലോണ. 241 മത്സരങ്ങളിൽ 76 ജയം നേടിയ അത്‌ലറ്റിക്കോ മാഡ്രിഡ് ആണ് ബാഴ്സയ്ക്കു തൊട്ടുപിന്നിൽ. 253-ാം ഔദ്യോഗിക എൽ ക്ലാസിക്കോയായിരുന്നു കാന്പ് നൗവിൽ അരങ്ങേറിയത്. എൽ ക്ലാസിക്കോയിൽ റയൽ മാഡ്രിഡ് 101 ജയം നേടിയിട്ടുണ്ട്.

ജയത്തോടെ 26 മത്സരങ്ങളിൽനിന്ന് 68 പോയിന്‍റുമായി ബാഴ്സലോണ ലാ ലിഗ കിരീടത്തിലേക്ക് അടുക്കുന്നു. 56 പോയിന്‍റുമായി റയൽ മാഡ്രിഡാണു രണ്ടാം സ്ഥാനത്ത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.