രാജ്യത്തെ വിഭജിക്കാൻ പാക്കിസ്ഥാനു കഴിഞ്ഞില്ല, മോദിക്കു സാധിച്ചു: കേജരിവാൾ |

കോൽക്കത്ത: പശ്ചിമ ബംഗാൾ മുഖ്യമന്ത്രി മമത ബാനർജി സംഘടിപ്പിച്ച പ്രതിപക്ഷ പാർട്ടികളുടെ റാലിയിൽ ബിജെപി നേതൃത്വത്തിനെതിരേ രൂക്ഷ വിമർശനവുമായി ഡൽഹി മുഖ്യമന്ത്രി അരവിന്ദ് കേജരിവാൾ. 70 വർഷമായി പാക്കിസ്ഥാനു സാധിക്കാൻ കഴിയാത്ത ഇന്ത്യയെ വിഭജിക്കുക എന്ന ലക്ഷ്യം അഞ്ചു വർഷംകൊണ്ട് പ്രധാനമന്ത്രി നരേന്ദ്ര മോദിക്കും ബിജെപി അധ്യക്ഷൻ അമിത് ഷായ്ക്കും സാധിച്ചെടുക്കാൻ കഴിഞ്ഞെന്ന് കേജരിവാൾ കുറ്റപ്പെടുത്തി.

സമൂഹമാധ്യമങ്ങൾ സ്ത്രീകൾക്കെതിരേ അധിക്ഷേപ പരാമർശങ്ങൾ ഉന്നയിക്കുന്നവരെ സമൂഹമാധ്യമങ്ങളിൽ പ്രധാനമന്ത്രി പിന്തുടരുന്നത് നാണക്കേടാണ്. 70 വർഷം ശ്രമിച്ചിട്ടും പാക്കിസ്ഥാനു ചെയ്യാൻ കഴിയാതിരുന്നതെന്തോ, അതാണ് അഞ്ചു വർഷംകൊണ്ട് പ്രധാനമന്ത്രി നരേന്ദ്ര മോദിയും ബിജെപി അധ്യക്ഷൻ അമിത് ഷായും ചെയ്തത്. അവർ രാജ്യത്തെ വിഭജിച്ചു- അരവിന്ദ് കേജരിവാൾ പറഞ്ഞു.

ഇന്ത്യയെ വിഭജിക്കുക എന്നത് പാക്കിസ്ഥാന്‍റെ സ്വപ്നമാണ്. മതത്തിന്‍റെയും ഭാഷയുടെയും പേരിൽ രാജ്യത്തെ വിഭജിച്ച്, ജനങ്ങളിൽ ശത്രുത സൃഷ്ടിക്കുന്ന അതേ ദിശയിലേക്കാണ് ബിജെപി സർക്കാർ പോകുന്നതെന്നും കേജരിവാൾ കുറ്റപ്പെടുത്തി. രാജ്യത്തെ കർഷകർ വൻ പ്രതിസന്ധി നേരിടുകയാണെന്നും തൊഴിലവസരങ്ങൾ സൃഷ്ടിക്കുന്നതിൽ സർക്കാർ പരാജയപ്പെട്ടെന്നും കേജരിവാൾ ആരോപിച്ചു.